Lino Kwacitika Uzanzo

“Pa kutandika twayuvwanga ukuti casila ivintu vitalatala viziipe. Vyonsi vino twakweti vyononike lino umwamba wasyolomwike na lino kwali mulamba.”—Ya Andrew, aku Sierra Leone.

“Lino imvula ya cimuza yasizile, twaswilile uku ng’anda. Vyonsi vyononike kutaali icasyazile. Tutakweti nanti vimwi ivya kuvwanga. Umwanane wafukime sile pansi nu kulila sana.” —Ya David, aku Virgin Islands.

NDI CAKUTI namwe mwatala mwaapusukapo uku uzanzo umwi, limwi munguvwikisya vino yauze yakupitamo, vili wa kupeziwa mano, ukuvilwa ukuzumila ukuti icicitika, ukuvulunganyiziwa, ukusakamala alino nu kulota sile iviipe. Aingi yano ivya musango uwo vyacitikila yakavilwa ukukwata amaka ya kutwalilila ukuya nu umi.

Ndi cakuti mwaponzya vyonsi vino mwakweti pa mulandu nu uzanzo umwi, mufwile munguvwa ukuti mutange mukwanisye ukuzizimizya intazi iyo nupya. Mungatandika nu kuyuvwa ukuti umi utacindama. Nomba Baibo ikalondolola ukuti umi wacindama nupya kwaya ivintu ivingi ivingamwazwa ukuya nu upaalilo wakuti ivintu uku nkoleelo vilazipa.

ICUMI ICAYA MULI BAIBO CIKATUPEELA UPAALILO

Pali Kasambilizya 7:8 pakati: “Impelelekezyo ya cintu yazipa ukuluta utandiko wakweco.” Ndi cakuti alino mukutandika sile ukuvwako ningo ukufuma pano uzanzo wacitikile, cikaloleka kwati vintu vitalatala vizipe. Nomba ndi cakuti imuteeka umwenzo lino mukuombesya pakuti mwilileko kuli vivyo, ivintu vilaya vikuzipilako.

Baibo yasoowela pa nsita lino kutalaya “uwakulukusya aminsozi, nanti sile uwakukuuta ati, ‘Tutulwe!’” (Ezaya 65:19) Vivyo vilacitika lino insi ilaya paladaise lino Uwene Wakwe Leza ulateeka. (Masamu 37:11, 29) Kutalaya nupya mazanzo. Ivintu vyonsi iviipe ivingalenga twauvwa uyi vilafumiziwapo, pano Leza wa maka yonsi watulaya ukuti: “Ivyampiti vyonsi vilililika, yatalaviusya nupya.”—Ezaya 65:17.

Elenganyini pali vii: Kaumba wateyanya ‘ukumuletela utailo nu upalilo ukalamba’ kuli kuti umi wa mutende lino Uwene wakwe ulateeka. (Yelemiya 29:11) Ndi cakuti mwamanya icisinka cii, lekini cimwazwe ukuleka umi winu ukuya ucindame. Ya Sally yano itulandapo mu cipande ca kutandikilako yatiile: “Ukulaiusya mweineco ivintu vino Uwene Wakwe Leza ulatucitila uku nkoleelo kungamwazwa ukwililako ivya mpiti nu kuombela pa vilipo.”

Uzye mutange mutemwe ukusambilila ivingi pali vino Uwene Wakwe Leza uli nu kucitila antu? Ukucita vivyo kungamwazwa ukusininkizya ukuti asi mulandu na mazanzo yano mukupitamo, umi wacindama pali ndakai lino mukulolela insita lino kutaya mazanzo. Nomba pa nsita ii, Baibo ikatunena vino tungacita pakuti tuzizimizye ivikacitika ndi kwacitika mazanzo. Lekini tulande pali vimwi.

Malembelo Aangamwazwa

Mwapuza sana.

“Cingazipa ukukwata tunono ukwaula masakamika, kuluta kuivunola ukwaula muzano, umu kwezya ukuzinganya umuza.”—Kasambilizya 4:6.

Aakalondelezya yazana ukuti “ndi cakuti antu yamwi yaponelwa na mazanzo aipisye, yakauvwa sana uyi nu kucuula ndi cakuti yasikulala utulo.” Fwandi cacindama sana ukulala sana.

Mwalandako pali vino mukuyuvwa.

“Ukutwisika kwa muntu kwaya ngi cisendo cinyome mu mwenzo wakwe, lelo amazwi ya mutembo yene yakasansamusya.”—Mapinda 12:25.

Mwalanda na lupwa nanti cuza wino mwataila sana. Nupya ndi cakuti yakumanya vino mukuyuvwa, ya lupwa na ya cuza yangalanda mazwi akukomelezya nu kumwazwa ukulingana na vino mukulondekwa.a

Mwaelenganya pa nsita ya ku nkoleelo lino ivintu vilazipa.

“Lelo swemo tukalolela vino Leza watulaya, mayulu apya ni nsi ipya, muno mulaya kuteekwa na Leza.”—2 Petulo 3:13.

a Umuntu wino akuvwa ulanda nu kusakamala sana pa nsita iitali angalondekwa ukulola ya dokota pa kuti yamwazwe.