Lino Wino Mwatemwa Wafwa

NDI CAKUTI mwafwilwapo umwi wino mwatemwa, namwe kwene mufwile mwayuvwile uyi umu nzila izipusane pusane, wakwe ulanda, kuzukilwa alino nu kuti ivintu vitalazipa. Limwi namwe mwasokanga, ukuyuvwa uwa mulandu nu kuya ni ntete. Limwi mwelenganyanga ndi cakuti icicindama ukutwalilila ukuya nu umi.

Citaipa ukutwalilila ukuvwa ulanda. Kukalangilila sile vino mwatemilwe umuntu wiyo. Nomba uzye kuli vimwi ivingamwazwa ukumala ulanda uwo?

VINTU VIMWI VINO MUNGEZYA UKUCITA IVYAZWILIZYA YAMWI

Nanti i cakuti cingaloleka ukuti mutalata ukuya nu ulanda, vimwi vino tumalandapo vingamuteekezya.

NDI CAKUTI CALINGA UKULILA MUNGALILA

Asi yonsi akalosya umu nzila ili imwi nanti ukuloosya pa utali wa nsita uli umwi. Nomba ukulila kungamwazwa ukucefyako icikonko. Vanessa wino itulandapo watiile: “Nalilanga sile pakuti ncefyeko ulanda.” Ya Sofia yano kaci muze wafwile ukwaula ukwenekela yatiile: “Ukwelenganya sana pali vino vyacitike kwalenganga nauvwa sana uyi cali kwati u kuyula pa cilonda nu kucifula sana. Cikawaya sana, nomba cikalenga icilonda ukupola.”

MWALANDA PALI VINO MUKWELENGANYA NA VINO MUKUYUVWA

Ukulanda sile cisinka insita zimwi mungalonda ukuya sile mwenga. Nomba kuzizimizya ulanda mwenga kungalenga sile uwavya ukukulilako. Jared aali ni myaka 17, wino ya isi yafwa akaiusya ukuti: “Nanenangako yauze pali vino nayuvwanga. Ntanzi vino nalandanga nga vyali sile ningo, nomba cazifile ukuti nalandangako vino nkuyuvwa.” Ya Janice yano itulandapo umu cipande ca kutandikilako yalanzile ivisuma na vyuze ivikacitika ndi tukunenako yauze, yatiile: “Ukulandako na yauze kwanteekizye sana. Naweni ukuti iyansakamala nupya ntayuvwanga ukuzukilwa.”

MWAZUMILA UKWAZWIWA

Dokota umwi walanzile ukuti: “Ndi cakuti aakulosya wazumilizya ya cuza na ya lupwa yakwe ukumwazwa pa cisila sile lino umutemwikwa wakwe wafwa, cilamwangukila ukuzizimizya nu kucimvya intazi.” Lekini ya cuza inu yamanye vino yangacita pakuti yamwazwe, yangalonda ukumwazwa nomba ale yatamanyile ivyakucita.—Mapinda 17:17.

PALAMINI KULI LEZA

Ya Tina yalanzile ukuti: “Lino ya wane yafwile sile pa mulandu na kansa, natiile ukuyanena intazi zino nakweti, masakamika alino na vino nayuvwanga, fwandi nanenanga Leza vyonsi. Cila wanda natandikanga ni pepo ukumulenga ukuti angazwe ukuomba ningo uwanda onsi. Leza wangazwilizye umu nzila izingi zino ntange nkwanisye ukulondolola.” Ya Tarsha aali ni myaka 22 lino ya nyina yafwile yalanzile ukuti: “Ukuwelenga Baibo cila wanda kwantekezyanga sana. Kwalenganga nkwateko vimwi ivyakwelenganyapo ivyankomelezyanga.”

MWAELENGANYA PA KUTUUTULUKA

Ya Tina yalanzile nu kuti: “Ukulanda sile icisinka ukwelenganya pa kutuutuluka kutantekezyanga pano nalondekwanga ya wane nupya ana yane yalondekwanga ya isi pa nsita kwene iya. Nomba lino papisile imyaka 4 nataile sana umu kutuutuluka. Ukucita vii kukantekezya sana nupya kukangazwa ukuzizimizya lino nkwika amano uku nkoleelo lino tulaya ni nsansa.”

Mutalatandika ukuvwa ningo lino wino mwatemwa wafwa sile. Nomba nanti ciye vivyo ivyacitikile Vanessa vingatukomelezya sana. Watiile, “Mungelenganya ukuti ivintu vitalatala vizipe, nomba lino papita amanda ivintu vilaya vikuzipilako sile panono panono.”

Mwaiusya ukuti nanti icakuti mutange mute ukuluuka umuntu wino mwafwilwa, umi ungatwalilila ukuzipa nu kuya ucindame. Mungatwalilila ukuipakizya umi nupya usuma pano ala Leza akumusakamala. Nupya likwene sile Leza wasya atuutulule afwe. Akalonda mukakumbatiile atemwikwa inu nupya. Lyene ulanda uno mwakwata ulasila.