Icumi Pali Vino Vilacitika Uku Nkoleelo
Uzye mwatala mwelenganyapo pa vilacitika ku nkoleelo? Baibo ikatunena pa vintu ivicindame ivili nu kucitika likwene nupya vilakuma antu yonsi pano nsi.
Yesu walondolwile vino tulamanyilako ukuti “Uwene wakwe Leza uli pipi nu kwiza.” (Luka 21:31) Wasoowile nu ukuti kulaya inkondo zikulu zikulu, vilundumusi vikulu, vipowe, ni mpungo ivintu vino tukulola vikucitika ndakai.—Luka 21:10-17.
Baibo ikatunena ukuti cimwi icilacitika mu manda akusyalikizya amu mitekele ya antu icakuti antu aingi yalaya ni miyele ipisye. Mungawelenga vino Baibo yalondolola pali vii api lembelo lyakwe 2 Timoti 3:1-5. Nga mwalola miyele ii ni vikucitika ndakai, mungasininkizya ukuti usoowelo uu uwa muli Baibo ukufikiliziwa ndakai.
Uzye cii cikusenula cani? Insita yatipalama iyakuti Uwene wakwe Leza usenule ivintu nupya ukucita vivyo kulalenga umi pano nsi kuzipilako. (Luka 21:36) Muli Baibo, Leza walaya ivintu ivisuma vino alacitila insi alino antu alikalamo. Katulande pali vimwi vino alacita.
UTEESI USUMA
“Wene wapilwe amaka, ululumbi nu utesi, kuti misango yonsi ya antu, na antu amu nko zyonsi ni ndimi, yangamutumikila. Amaka yakwe autesi yalatwalilila amanda pe, nu wene wakwe utalasila.”—DANIELI 7:14.
Vino cii cikusenula: Mungaipakizya umi usuma mu uteeko uno Leza wimika muno wasonta Umwanakwe ukuya Umwene.
UMI USUMA
“Patalaya nanti wenga alailizyanya apakulwala.”—EZAYA 33:24.
Vino cii cikusenula: Mutalatala mulwalepo nanti kulemala; mulaikala sile ukwaula ukufwa.
MUTENDE UMALILIKE
“Wene akalesya inkondo pano nsi yonsi. Akakontola amalapwa, avunola masumo nu kusumbila visyangu apa moto mpaka ivipya!”—MASAMU 46:9.
Vino cii cikusenula: Kutalaya ukutiina inkondo nu ucuzi onsi uno ikaleta.
INSI ILAZULAMO ANTU ASUMA
“Umwipe atalaya penepo . . . aicefya yalapyana impanga.”—MASAMU 37:10, 11.
Vino cii cikusenula: Kutalaya antu aakacita iviipe, lelo mulaya sile antu aakauvwila Leza.
INSI YONSI ILAYA PALADAISE
“Yalakuula amang’anda ya kwikala mwenemo, yalaalima ni vyalo vya matingi nu kulya iviseekwa vya mwenemo.”—EZAYA 65:21, 22.
Vino cii cikusenula: Insi ilazipa cuze. Leza alafikilizya mapepo yano tukapepa aakuti ukulonda kwakwe kukacitike pano nsi.—Mateo 6:10.