Uzye Mwemo Mulaomba Mutuuli?
Iciusyo Cino Tuli nu Kukwata Likwene Cilatwazwa Ukulanga Ukuti Tukataizya
1. Uzye i syuko ci iliiyeele lino Iciusyo cikatupeela?
1 Iciusyo ca mfwa yakwe Yesu icilayako apa 14 Epulelo, cilatupeela isyuko lya kulangizya ukuti tukataizya pa usuma wakwe Yeova. Pali Luka 17:11-18 pakalanga vino Yesu na Yeova yakalola umuntu aakataizya. Ica ulanda i cakuti, wenga sile pa yantu ikumi alwile tembwe yano Yesu wapozizye, u wizile kuli Yesu nu kutaizya. Uku nkoleelo, imfwa yakwe Yesu ilaleenga ukuti antu yapole uku ndwala zyonsi nu kwikala manda pe! Ukwaula nu kutwisika, swensi kwene tulaataizya Yeova cila-wanda pa mulandu ni vintu kwene vii ivisuma. Nomba uzye umu milungu iikwiza tulacita uli pa kulanga ukuti tukataizya?
2. Uzye tungacita uli pakuti twalanga ukuti tukataizya pali vino Yesu watukulula?
2 Ombesyini Pakuti Mwataizya: Vino tukaelenganya i vikalenga ukuti twalondesya ukutaizya. Icingatwavwa ukutaizya sana pali vino Leza watukulula, u kuwelenga malembelo aakalanda pa Ciusyo yano yatantika pali kalenda, nu mu kabuku akakuti Ukubebeta Amalembo Cila Bushiku. Cingaziipa ukuti muce mwawelengela pamwi umu lupwa. Nga tukucita vivyo, tulaataizya sana pali vino Yesu watukulula. Cii cilaleenga ukuti imiyele itu izipe nupya tulaacita ivisuma.—2 Kol. 5:14, 15; 1 Yoa. 4:11.
3. Uzye umu nsita ya Ciusyo, iinzila ci zino tungalangilamo ukuti tukataizya?
3 Langizyini ukuti mukataizya: Ivicitwa vya muntu i vikasininkizya ndi cakuti akataizya nanti foo. (Kolo. 3:15) Umuntu wiya wenga pali yano Yesu wapozizye tembwe, waombisye pakuti azane Yesu nu kumutaizya. Ukwaula nu kutwisika, walandanga sana nu ku yantu pali vino Yesu wamupozizye. (Luka 6:45) Uzye naswe tuli nu kuombesya ukwama antu uku Ciusyo pa kulanga ukuti tukataizya pali vino Yesu watukulula? Ukuombako Upainiya wa nsita inono, nanti ukuombesya umu mulimo wa kusimikila umu nsita ya Ciusyo, iinzila na yuze ino tungalangilamo ukuti tukataizya. Pa wanda uno kulaya Iciusyo amanguzi, tulaazengela aaliza uku kulongana pamwi naswe, alino nu kwasuka amauzyo yano yalauzya; cii cilalaanga ukuti tukataizya.
4. Uzye tungacita uli pakuti tutaca twalanguluka ndi Ciusyo ca mwaka uu capita?
4 Uzye Iciusyo ca mwaka uu ali ca kusyalikizya? (1 Kol. 11:26) Mukwai tutamanyile. Nomba, cino tumanyile sile i cakuti ndi capita, ale ni syuko kwene iliiyeele ilya kulanga ukuti tukataizya lyati-lipita. Uzye Mwemo Mulaomba Mutuuli? Fwandi lekini vino tukalanda ukuti tukataizya, alino na melenganyo ya mu myenzo itu vyazanzya Yeova, uwalenzile ukuti tukululwe.—Masa. 19:14.