Kuomba Ningo Umu Mulimo—Kulanda Amazwi Aangalenga Mukwate Apakuyatandikila Lino Mulaswililako

Cino Cacindamila: Ndi cakuti twazana umwi aakulondesya ukuvwa, cingazipa kucaswililako uwanda uno alazanwa pa ng’anda pakuti tungaya tukakontelele imbezu zya cumi zino twatiile. (1 Kol. 3:6) Ilingi kwene lino tutaatala twafuma pali wino tukusimikila, tufwile ukumuuzya uwanda uno tungaswililako. Cingazipa nu kumuzya iuzyo lino tungaca tukalanzyanye nga twaswililako. Cii, cingalenga wino tukusimikilako aalondesya kuti tukaswilileko, nupya ndi cakuti wazana icasuko mu lupapulo luno twamusilile, cingalenga nu kuti atemwe ukuwelenga lupapulo luulo. Kukwata apakuyatandikila, kungalenga cangupale kuyalanzyanya lino twaswililako pano ale twasoolwile calimwi vino tulaya tukalanzyanye, na wino tukusimikila, nawe kwene angamanyila limwi pano tulaya tukatandikile. Lino twaswililako, tungamulondolwela tuti twaweela umu kwiza aasuka iuzyo liili lino twasiile.

Vya Kucita:

Lino tukupekanya ivya kuyalanda umu kusimikila uku ng’anda ni ng’anda, alino tungapekanya ni iuzyo lya kuya-asuka umuku uno tulaswililako. Iuzyo lino mungamuuzya, limwi lingafuma umu vyeo vino imulanzyanya umu lupapulo luno imumusiila, nanti mu lupapulo lumwi ulwa kusambililamo luno mungaya mukamulange nga mwaswilila.
Lino mukulanzyanya amazwi akulekelezya nu muntu akulonda ukuvwa, mufwile kumuneena ukuti mukulonda muce mulande nawe nupya, lyene alino mungamuuzya iuzyo lino imupekanya lya kuyalanzyanya nawe. Mumwi muno tukaombela, antu yapamviwa cakuti yakasiitoka pakuti yazumile ukuti tuce tuswilileko nupya. Ndi cakuti avino cikaaya, limwi mungayuzya muti: “Uzye yii ili nsita isuma ino mukaazanwa apa ng’anda? [Lekini yasuke.] Mulungu ukwiza ningatemwa kuti tukalandeko panono api uzyo lii . . . Ndi cakuti mulapamviwa uwanda uno ndiza, muce muneene pakuti imanye.”
Ndi muvwana nawino mukusimikila ukuti mulaswililako, mufwile ukuya pa nsita kwene ino muvwana. (Mate. 5:37) Ndi mwaaya mwalanzyanya, lyene pa kusondwelela mulande amazwi nayauze aalalenga ukuti mukwate apakuyatandikila lino mulayako nupya kwene.

Umwezi Uu Muce Mwezye Ukucita Vii:

Lino mukupekanya amazwi aakuyalanda, alino mukapekanye ni iuzyo lya kuya-asuka ndi mwaca mwaswililako. Muce muneeneko ya kasimikila yauzo yano mukuomba nayo iuzyo lino iimupekanya.