Isukulu Lya Mulimo Wakwe Leza Ilya mu 2015 Lilatwavwa Ukuya ya Kasambilizya Yasuma

¹ Davidi, kalemba wa masamu walemvile ati: ‘Sungala upokelele amazwi ya pa kanwa kane, na melenganyo amu mwenzo wane, we Yeova, we ciliwe cane napya katuula wane!’ (Masa. 19:14) Naswe kwene tukalonda ukuti amazwi itu yazanzya Yeova, pano twacindika sana isyuko lino twapeelwa ilya kulanda icumi cakwe umu cilongano nalino tukusimikila. Isukulu Lya Mulimo Wakwe Leza lyaya pa vintu visuma vino Yeova akaomvya pa kutusambilizya ivya kusimikila ningo. Cila-mulungu yakatusambilizya umu vilongano ivyacila pali 111,000 umu nsi yonsi. Isukulu lilyo lyazwilizya aina na ya nkazi apusane-pusane umu nsi yonsi ukuya ya kakosola yasuma ailandwe lisuma, nupya yamanya ukusambilizya ningo sana ukwaula intete.—Mili. 19:8; Kolo. 4:6.

² Utantiko wi sukulu mu 2015 ukulangilila ukuti tulaasambilila ivyeo ukufuma umu kabuku kaakuti Ifyaba mu Cebo ca kwa Lesa na muli magazini wa Lupungu Lwa Mulinzi uwa Ciyemba, ni buku lyakuti Ikalini mu Kutemwa Kwakwe Leza. Nakapya, kuli ukwaluka pa nsita ino yalaomvya pa kulanda ivisinka vya mu kuwelenga Baibo ni Lyasi Na. 1. Kwaluka kuu, alino na masunde yauze pali vino malyasi yalaalandwa umwi sukulu, ivilondololwa mu mapalagalafu aalondelelapo.

³ Visinka mu Kuwelenga Baibo: Umwina wensi wino yapeela ukulanda ivisinka vya mu kuwelenga Baibo, alaaomvya mamineti yaili sile ukulanda icisinka conga icili umu kuwelenga Baibo ukwa mulungu icingavwa icilongano. Ukupekanya ningo u kulavwa aina ukunenako aali umwiumba pa cisinka conga mu nsita kwene iyo ino yapeezilwe. Ndi umwina wamala ukulanda, alaasyako mamineti 6 akuti aali umwiumba nayo iyalandapo cila-muntu mu masekondi 30 nanti kucepako, pa visinka vino yaatemilwe sana umu kuwelenga Baibo kwa mulungu kwene uwo. Cikalondeka ukupekanya sana nu kuisunda pakuti umuntu alande icisinka mu masekondi 30, nomba ukucita vivyo kukatwavwa sana. Nupya cikalenga ukuti antu nayauze iyakwata insita ya kulandapo pali vino nayo yasambilile lino yalondelezyanga ivyeo.

⁴ Lyasi Na. 1: Insita ino umwina afwile ukuwelenga Baibo yaticepako; lyene imayanga mamineti yatatu nanti ukucepako, nupya ivyeo vyakuwelenga vilaaya sile mavesi anono. Yonsi apeelwa ilyasi lii lya kuwelenga yafwile ukupitulukamo sana maila ingi ala yakulandisya vino yakuwelenga, nu kwikako sana mano kuli vino yakulumbula mazwi, nu kuwelenga ningo kwati yakulanda sile pakuti visinka vino yakuwelenga vyauvwika. Antu yakwe Yeova yonsi yalinzile ukuombesya ukuti yawelenga ningo, pano ukuwelenga kwacindama sana muli ukapepa witu. Tukazanga cuze ukulola kuno ana anono aingi sana yakuwelenga ningo! Tufwile ukutaizya sana avyazi pali vino yakaombesya ukwavwa ana yao ukuti yaaya ya kawelenga yasuma.

⁵ Lyasi Na. 2: Ilyasi lii lilalandwa mu mamineti 5 nupya lilaapeelwa kuli ya nkazi. Musambi alinzile ukulanda pa mutwe uno yamupeezile. Ndi cakuti ivyeo vya kuomvya vifumile umu kabuku kakuti Ifyaba mu Cebo ca kwa Lesa, nanti ndi cakuti yatalangiliile umwakufumya ivyeo, musambi afwile ukulanda ilyasi kwati ali mu mulimo wa kusimikila, alino alinzile ukulanda ukulingana na vino vikacitika umu cifulo cinu. Lyene ngi cakuti ivyeo vikufuma mu Lupungu Lwa Mulinzi nanti umwi buku lyakuti Ikalini mu Kutemwa Kwakwe Leza, ale umusambi alinzile ukuwelenga sana ivyeo vivyo ivikulanda pa muntu umwi uwalumbulwa muli Baibo pakuti asoolola ningo malembelo yakuomvya, nu kulangilila vino tungasambilila ku muntu wiyo uwa muli Baibo. Musambi nga akulonda angaomvyako malembelo nayauze aakulingana ni lyasi ilikulandwapo. Umwangalizi wi sukulu aliwe alaatantika kazwa wa musambi.

⁶ Lyasi Na. 3: Ilyasi lii lilaalandwa umu mamineti 5 nupya lilaapeelwa uku ina nanti ya nkazi. Ndi cakuti nkazi aliwe watapeelwa, alaalondela masunde aati yalandwa pali vino Ilyasi Na.  2 lilaalandwa. Ndi cakuti umwina aliwe apeezilwe, alino ivyeo vifumile mu Lupungu Lwa Mulinzi nanti mwi buku lyakuti Ikalini mu Kutemwa Kwakwe Leza, afwile ukuvilanda ukwiumba. Musambi alinzile ukulanda ivisinka ukulingana nu mutwe uno apeezilwe, afwile nu kusoolola malembelo akuomvya, alino nu kulondolola vino tungasambilila ku muntu wiyo uwalumbulwa muli Baibo.

⁷ Icipya Icili Umwi Lyasi Na. 3 Cino Aina Yalaacita: Ndi cakuti ivyeo vyakuomvya umwi lyasi lilyo vikufuma umu kabuku kaakuti Ifyaba mu Cebo ca kwa Lesa nanti ndi cakuti yatalangiliile umwakufumya ivyeo, ale ilyasi lilyo lifwile ukuya i cilangililo muno umwina akutungulula ukupepa kwa lupwa nanti akusimikila. Ilingi umwangalizi wi sukulu alaatantikila limwi kazwa ni vikucitika umwi lyasi. Kazwa alinzile ukuya a lupwa aakaikala nu mwina wiyo pa ng’anda nanti afwile ukuya u mwina uwa mu cilongano. Kalanda angaomvya na malembelo nayauze aakulanda pa visinte vya muli Baibo ivikulingana ni lyasi lino akulanda. Insita zimwi eluda ali wino yalaapeela ukulanda ilyasi lii. Ya eluda yene yangaisoolwela kazwa navino icilangililo cifwile ukuya. Tusikutwisika ukuti amu cilongano yalakomeleziwa sana ukulola vino ya eluda yakucita icilangililo na lupwa wao nanti nu mwina muze pali vino tungaya ya kasambilizya yasuma.

⁸ Kwazwa Umusambi: Ndi umusambi wamala ukulanda ilyasi, umwangalizi wi sukulu alaomvya mamineti yaili ukumutaizya nu kumwavwa vino angatwalilila ukulunduluka, ukuomvya ibuku li sukulu. Pa nsita ino umwangalizi wi sukulu akwama umusambi ukwiza landa ilyasi, atalaalandila limwi cisinka cino umusambi wiyo akuombelapo. Cila musambi ndi wamala ukulanda ilyasi, umwangalizi afwile ukumutaizya nu mwenzo onsi, alino alanda icisinka cino umusambi akuombelapo, nu kulondolola umulandu uno akulandila ukuti umusambi wataomba ningo pa cisinka cico, nanti ukulondolola ni cikuku umulandu uno walandila ukuti umusambi afwile akaombelepo nupya kwene pa cisinka cico.

⁹ Foomu ya kucongelapo umusambi yaya apa mafwa 79 kufika uku 81 mwi buku li sukulu. Umusambi ndi walanda ilyasi, umwangalizi wi sukulu alamuzya ukumbali pa nsita yuze ndi cakuti waomvile ivyaya pa mpela yi sambililo lino yamunenyile ukuombelapo, alino alaconga pa cisinka cico umwi buku lya musambi kwene. Kutaizya alino na mazwi yauze aakwavwa umusambi ukuti alunduluka, mungamunena ndi ukulongana kwasila nanti pa wanda uze. Cila-musambi alinzile ukulola vino yakumusambizya umwi sukulu ukuti iinzila isuma sana ingamwavwa ukulunduluka muli ukapepa.—1 Tim. 4:15.

¹⁰ Ndi cakuti umusambi wapitilila umu nsita pa kulanda ilyasi lyakwe, umwangalizi wi sukulu nanti kazwa wa mwangalizi, afwile ukwikako sana mano pakuti amanyisya umusambi ukuti insita yasila, limwi angalizya akalikonsi wakwe ka mbelu. Umusambi alinzile ukuvwila vino yamumanyisya, afwile ukumala sile sentensi wino akulanda nu kufumapo pa pulatifomu.—Lolini ibuku li sukulu, apifwa 282, pala. 4.

¹¹ Antu yonsi atiyalinga tukuyakomelezya ukulembesya umwi Sukulu Lya Mulimo Wakwe Leza. (Lolini ibuku li sukulu, apifwa 282, pala. 6.) Masambililo aaya umwisukulu lii yaka-avwa antu yakwe Yeova ukukosoola nu kusambilizya ilandwe lisuma ilya Wene ukwaula intete, mu mucinzi, nu kutemwa. Cumi kwene Yeova akazanga ukuvwa ukuti antu aakasambiliziwa umwi sukulu lii yakumulumbanya!—Masa. 148:12, 13; Eza. 50:4.