Inyimbo Izipya Zya Kuomvya pa Kupepa Leza!
1 Apa kukomaana kwa pa mwaka kwakwe ya Watch Tower Bible and Tract Society of Pennsylvania ukwaliko pa 4 Okotoba, 2014, kwali icimanyisyo cakuti inyimbo zino tukaomvya ndakai yamazipitulukamo nu kuzilembulula. Cazifile cuze ukuvwa ilyasi lilyo! Yonsi aazanyilweko yayacinkwile ukuti tufwile ukulola inyimbo zya Wene ukuti zyacindama sana lino tukupepa Leza.—Masa. 96:2.
2 Limwi munguzya muti, ‘Ngi cani cino yakulembulwila inyimbo zii?’ Kuli imilandu iingi iyatilenga. Inkoleelo, imyuvwile ya Malembelo ikalukusenuka, fwandi kulikuti na mazwi aalembwa umu nyimbo zitu yafwile yasenulwe. (Mapi. 4:18) Umulandu nauze aewu: Amazwi aingi aalembwa umu nyimbo zitu yaayakopolwile muli Baibo wa Cizungu uwampiti uwakuti New World Translation. Mazwi yayo yafwile yasenulwe pakuti yaye wakwe vino yali muli Baibo witu umupitulukwemo. Pa kulembulula inyimbo zii, cilasenda insita itali, fwandi yapingwilepo ukuti kulaya ukongezyapo inyimbo izipya nazyuze izinono.
3 Uzye tulaloleela mpaka ibuku lyonsi ilya nyimbo izipya lice lipulintwe nga alino tuce twaziomvya? Awe. Tuli nu luzango cuze ukumumanyisya ukuti inyimbo izipya izikupangwa yamaziikanga pali Webusaiti itu iya jw.org, nupya cilasenda imyezi iingi ukuomba umulimo uu. Nga ulwimbo ulupya lwapangwa, yalalutantika ukuti lukimbwe pa Kulongana Kwa Mulimo ala iyalembapo ukuti “lwimbo ulupya.”
4 Vya Kucita Pakuti Mumanye Inyimbo Izipya: Kwene citangupala ukumanya ivya kwimba ulwimbo ulupya. Lelo lino tuli pa kulongana tufwile ukwimba sana nu kukolanya kalemba wa masamu umwi uwatiile, “umwenzo wane ukulumbanye ukwaula ukutonta.” (Masa. 30:12.) Fwandi, pakuti musambilile ulwimbo ulupya mwalondela vii:
Mwakutikako sana ku lwimbo luno yalizya ulwaya pali Webusaiti itu. Nga mukukutikako sana kuli vino yalizya, cilamwangukila ukulwiusya.
Mwasambilila mazwi aalembwa mu lwimbo lulo nu kuyasungila.
Mwalondela icilimba lino cikulila ala mukukonka mazwi aali umu lwimbo. Nupya mwacita vivyo kwene mpaka imuelezya ulwimbo.
Lino muli pa Kupepa Kwa Lupwa, mwapitulukamo umu nyimbo nu kwimbila pamwi mpaka yonsi mu lupwa yalumanye.
5 Mu myezi ikwiza, ndi cakuti iyatantika ukuti kumaya ukwimba ulwimbo ulupya pa mpela ya Kulongana Kwa Mulimo, yonsi aali umwiumba yalaatala iyakutika ku lwimbo umuku onga. Lyene yalaimbila pamwi ni vilimba wakwe vino tukacita lyonsi.
6 Cumi namwe kwene mungazumila ukuti ukwimbako inyimbo lino tuli pa kulongana iinzila isuma ino tukalumbanyizizyamo Yeova. Acino fwandi tutafwile ukuya ni cielezyo ca kufuma panzi icifume-fume lino yatunena ukuti twimbe ulwimbo pa kulongana.
7 Kwaya inzila nayuze ino tungalangilamo ukuti tukataizya pa nyimbo zyakwe Leza zino twakwata. Pa maukongano yakalamba, yakalizya inyimbo zya vilimba vitupu lino kwasyala panono ukuti tutandike ukulongana. Imiku iili cila-mwaka, aina na ya nkazi ukufuma uku mpanga zipusane-pusane yakaipeelesya ukuomvya impiya zyao ukupita ulendo utali ukuyafika uku Patterson, New York, pakuti yakapange nu kulizya inyimbo izisuma zino tukaomvya pa kupepa Leza. Acino fwandi, lino tuli pa ukongano, nga ceyamani wati twikale nu kukutika uku nyimbo zino yalizya, tulinzile ukucita vivyo kwene. Ukucita vivyo kulatwavwa ukupekanya umwenzo, pakuti lino yakulanda malyasi itwiza tuvwikisya.—Ezila 7:10.
8 Pa kumalilila ukulongana ilelo, tumaimba ulwimbo ulupya ulukweti umutwe wakuti “Ndakai Uwene Ukuteeka—Lekini Wize!” Ulwimbo luu luno yaomvizye na pa kukomaana kwa pa mwaka ukwaliko likwene, yalupanzile kuti lulande sana pa Wene uwati-uteeka pa myaka 100.
9 Cumi inyimbo zii izipya i “vintu visuma” vino Yeova watatupeela. (Mate. 12:35a) Acino fwandi, lekini tulemasye ukusambilila inyimbo zii izipya nu kuzimbanga nu mwenzo onsi, pakuti twalumbanya nu kucindika Leza witu!—Masa. 147:1.