Kukomaana Kwa Kuya Umu Mulimo Ukungalenga Twaomba Ningo

1. U mulandu ci uno kwayela ukukomaana kwa kuya umu mulimo wa kusimikila?

¹ Insita imwi, lino Yesu atatala watuma alondezi yakwe aali 70 uku kusimikila, watazile akomaana nayo. (Luka 10:1-11, NW) Wayakomelizye lino wayanenyile ukuti yataali nu kuya yonga, nu kuti Yeova, Umwine wa uzombozi, u wali nu kulayatungulula. Nupya wayanenyile ivyakucita ivyali nu kuyazwa ukuomba ningo, alino ayatuma “yaili yaili.” Na ndakai kwene ukukomaana kuno tukakomaana lino tutaatala twaya umu mulimo, kukaomba umulimo uliumwi nu kukomaana kuno Yesu wakweti na asambi yakwe—kulikuti kukatukomelezya, kutusambilizya, nu kutwazwa pakuti twaomba ningo.

2. Uzye ukukomaana kwa kuya umu mulimo kufwile kusila umu mamineti yanga?

² Ndakai, ukukomaana kwa kuya umu mulimo kukaaya mu mamineti 10 ukufika kuli 15; mu nsita kwene ii ali muno mukaya ukwankanya ya kasimikila, kuyalanga icifulo ukwakuombela, alino nu kupepa ipepo. Nomba ivintu vima-aluka. Ukutandika umu Epulelo, ukukomaana kwa kuya mu mulimo kumayanga mamineti 5 kufika kuli 7. Lelo ndi cakuti ukukomaana kukuya pacisila ca kulongana, lyene ale mufwile ukwipimpazya na sana pa mulandu wakuti ale ya kasimikila yatiyasambilila mpiti ivyeo ivya muli Baibo lino iyakulongana. Ukwipimpazya ukukomaana kwa kuya umu mulimo, kulalenga ukuti swensi twakwata insita ikulu iya kusimikila. Nakapya, kulalenga nu kuti ya painiya nanti ya kasimikila aaliyatandiike ukusimikila lino ukukomaana kutatala kwatandika, yatapumvyanyiziwa sana.

3. Uzye mufwile ukutantika uli ukukomaana kwa kuya umu mulimo wa kusimikila pakuti kwa-azwa sana ya kasimikila?

³ Ukukomaana kwa kuya umu mulimo kufwile ukutantikwa ningo pakuti kwa-azwa sana ya kasimikila. Mu vilongano ivingi cazipapo ukukomaanila umu maumba ukucila ukukomaana mwensi pa ncende yonga. Kucita vivyo, kungalenga cangupale kuli ya kasimikila ukufika zuwa paakukomaanila nanti mu cifulo icakuombelamo. Cingaangupala sana ukwankanya ya kasimikila, alino cingaangupalila na angalizi ya maumba ukwika sana mano kuli ya kasimikila aaya umu maumba yao. Fwandi iumba lyakwe ya eluda lingelenganya pali vino uku ncende yao kwaya, pakuti lingapingula vino lyalola ukuti i vingazipa ukucita. Lino mutatala mwapepa ipepo ilipi lya kumaliilila ukukomaana, yonsi yalinzile ukumanya kuno yamaombela alino na wino yamaomba nawe.

4. U mulandu ci uno tutafwile ukulola kwati ukukomaana kwa kuya umu mulimo kutacindama?

⁴ Nako Kwene Kwacindama wa Kulongana Konsi: Ukukomaana kwa kuya umu mulimo kwayelako ukwazwa aakuya umu kusimikila, fwandi asi yonsi aaya umu cilongano angazwanwako. Nomba citakusenula ukuti tufwile ukulalola kwati limwi ukukomaana kuu kutacindama. Wakwe vino ukulongana konsi kwaya, ukukomaana kwa kuya umu mulimo nako kwaya pa vintu visuma vino Yeova watupeela ivikatwazwa kuti twakomelezyanya. (Ayeb. 10:24, 25) Acino fwandi, katungulula alinzile ukupekanya ningo sana pakuti vino yakulanzyanya vyazwe yonsi atiyazanwako nu kucindika Yeova. Ndi cakuti cilongano capekanya ukuti yakomaana, lyene ya kasimikila yafwile ukwezya na maka pakuti yazanwako.

Mulinzile ukulola ukukomaana kwa kuya umu mulimo ukuti kwacindama sana wa kulongana kuze

5. (a) U mulimo ci uno umwangalizi wa mulimo wakwata pa kutantika ukukomaana kwa kuya umu mulimo? (b) Uzye nkazi angatungulula uli ukukomaana kwa kuya umu kusimikila?

⁵ Vino Katungulula Afwile Ukupekanya: Pakuti umwi apekanye nu kwizalanda ningo ilyasi pa kulongana, afwile ukupeelwa lino kucili insita. Vikwene avino caya na pa kukomaana kwa kuya umu kusimikila. Kuya kwene, ndi cakuti ya kasimikila yakukomaana mu maumba, lyene angalizi ya maumba nanti ya kaazwa yao aliyo yangatungulula. Lelo, ndi cakuti maumba yonsi yakukomaana pamwi, mwangalizi wa mulimo angatantika uwa kutungulula. Angalizi ya mulimo yamwi yakatantikila limwi ya katungulula, alino iyapeela kope kuli katungulula wenga na wenga lyene kope muze iyakambatika pa cipampa ca vyeo. Umwangalizi wa mulimo alinzile ukumanya ningo katungulula wenga na wenga lino akutantika akutungulula, napya alinzile ukumanya ukuti pakuti kukomaana kuu kwa-azwa ya kasimikila nu kuyasambizya ningo ivya kuomba umulimo, cilasintilila pali wiyo akutungulula. Ngi cakuti kusi eluda, umuomvi, nanti umwina umulinge uwa kutungulula pa kukomaana, mwangalizi wa mulimo anganena nkazi mulinge ukuti aliwe atungulule.—Lolini cipande cikuti “Lino Nkazi Angatungulula.”

6. U mulandu ci uno cacindamila kuti katungulula aapekanya ningo?

⁶ Ndi cakuti yatupeela ilyasi umwi Sukulu Lya Mulimo Wakwe Leza nanti mu Kulongana Kwa Mulimo, tukaikako sana mano nupya tukapekanya ningo. Aanono sana aakalolela mpaka uwanda wa kulongana ufika alino yatandika ukwelenganya pali vino yamaya yakalande. Tufwile ukwikako mano lino yatupeela ukutungulula ukukomaana kwa kuya umu mulimo, wakwe vino tukacita ndi yatupeela malyasi mu kulongana. Fwandi lyene vino insita ya kuomvya pa kukomaana kwa kuya umu mulimo imacepelako, cimalondekwanga sana ukuti twapekanya ningo pakuti ukukomaana kwazipa nupya kwasila ukwaula ukupitilila umu nsita. Apa kupekanya ningo mufwile nu kumanyila limwi cifulo ukwa kuombela.

7. I vyani vimwi-vimwi vino katungulula angalanzyanya na ya kasimikila aakuya umu mulimo?

⁷ Vino Mulinzile Ukulanzyanyapo: Muomvi mutailwe ataatutantikila malyasi aakuti twalanzyanya lyonsi lino twakomaana, pano ivintu ivikacitika mu vifulo vino tukaombelamo vyapusana-pusana. Kambokosi akakweti umutwe wakuti: “Pa Kukomaana Kwa Kuya Umu Mulimo Mungalanzyanya Pali Vii,” kakulondolola pali vimwi-vimwi vino tungalandapo. Ilingi kwene ukukomaana kuu kufwile ukuya u kwa kulanzyanya. Insita zimwi limwi mungacita ni cilangililo cino imupekanya ningo sana nanti sile ukutamba kavidyo kamwi aka pa jw.org. Lino katungulula akupekanya ivyakuyalanda pa kukomaana kwa kuya umu mulimo, afwile ukwelenganya pa vyeo vino angaya akalande ivingakomelezya alino nu kusambilizya yonsi aakuya mu kusimikila pa wanda kwene uwo.

Lino katungulula akupekanya ivyakuyalanzyanya pa kukomaana, alinzile ukwelenganya pa vyeo ivingakomelezya nu kwazwa yonsi akuya umu kusimikila uwanda uwo

8. I vyeo ci visuma vino mungalanzyanya lino muli pa kukomaana kwa kuya umu mulimo pa Ciwelusi na pa Mulungu?

⁸ Mu Viwelusi, ya kasimikila aingi yakapeela antu Lupungu Lwa Mulinzi na Loleni! Aingi aakaya uku kusimikila umu Viwelusi yasiya umu mulimo mukasi ka mulungu, fwandi cingayatalila ukwiusya vino yalanzyanyizye pa Kupepa Kwa Lupwa. Fwandi cingazipa sana ukuti akutungulula ukukomaana kwa kuya umu mulimo apitulukamo mu mazwi akutulangilila ivya kucita akaya ukwi fwa lya kusyalikizya umu Mulimo Witu Uwa Wene. Inzila zyuze, zingaya u kulanzyanya pali vino mungalanda nu muntu pi lyasi limwi ilikuvwika uku ncende iyo, nanti pa wanda wa mwikalwe, pakuti mumusiile magazini, nanti sile ukulanzyanya pali vino tungacita pakuti tuce tuswilile kuli wino twasiila magazini. Ndi cakuti yamwi ati-yazanwa pa kukomaana kuko yapeelapo antu ya magazini yano tukuomvya umu mwezi kwene uwo, lyene katungulula angayuuzya kuti yalandeko panono pa nzila zimwi zimwi zino tungapeelelamo antu ya magazini yayo nanti ukuleka ukuti yalande pali vimwi vyakukomelezya ivyacitike. Ndi cakuti mukukomaana pa Mulungu, napo kwene katungulula limwi angasoolola ukulanda pa lupapulo luno mukupeela antu mu mwezi kwene uwo. Impapulo izyakuomvya pa kusambilizya antu Baibo izili wa kabuku kakuti Ilyasi Lisuma na Mwauvwila Leza alino ni buku ilyakuti Vino Baibo Ikasambilizya, vyene mungaapeela antu pa wanda uli onsi, fwandi katungulula angalanda sile panono pali vino mungapeela antu impapulo kwene zizyo.

9. I vyani vino mungalanzyanya pa mpela ya mulungu ndi cakuti kuli ukuomba kampeni iiyeele?

⁹ Ndi cakuti pa mpela ya mulungu ya kasimikila yakuomba kampeni iiyeele, lyene wino akutungulula ukukomaana angalanda pali vino tungapeela antu ya magazini apya pali pamwi nu tupepala utwakwamilako antu nanti kapepala kilandwe, limwi angalanda na vino tungacita ndi cakuti twazana umuntu akulondesya ukusambilila. Inzila yuze, mungalanzyanya pa visuma ivikucitika lino mukuomba kampeni.

10, 11. U mulandu ci uno cacindamila ukuti ya kasimikila yapekanya lino yatali yaye mu kukomaana, napya ukucita vivyo kungalenga uli ukuti kukomaana kwa kuya umu mulimo kwazipa?

¹⁰ Vino ya Kasimikila Yafwile Ukupekanya: Ya kasimikila nayo kwene yangaalenga kuti ukukomaana kuu kwazipa. Ndi cakuti yakupekanyizya calimwi, wakwe lino yali pa kupepa kwa lupwa, cingalenga ukuti yaakwata ivyakunenako ya kasimikila yauze. Ukupekanya ningo kukalondekwa nu kukwatila calimwi ya magazini ni mpapulo izyakuomvya lino mutaatala mwaya ku kukomaana; kucita vivyo kungalenga ukuti mutawayawaya ukupita umu mulimo lino ukukomaana kwasila.

¹¹ Cacindama ukufika paakukomaanila pa kuya umu mulimo lino kucili insita. Ukuya kwene, cacindama ukuti lyonsi twaezya kufika zuwa uku kulongana ukuli konsi. Lelo ukucelwa uku kukomaana kwa kuya umu mulimo kwene u kukapumvyanya sana. I cani cino twalandila vivyo? Pano umwina akutungulula ukukomaana akalolekesya pa vintu ivingi lino atali aankanye ya kasimikila. Ndi cakuti ya kasimikila atiyazanwako anono, limwi katungulula angasoololapo ukuti yonsi yaombele umu cifulo cino mutaombelamo sana. Ngi cakuti yamwi ati-iza pa kukomaana yakwatile ivifulo vya kusimikilamo ukutali, katungulula angayankanya na yayo akweti ya motoka nanti majinga. Ngi cakuti umu cifulo cino yakuombelamo mwaya sana unkalwe, katungulula angankanya aina pi umba lyako yankazi, nanti limwi aina yangaombela mupipi na kuno yankazi yakuombela. Ya kasimikila alemale nanti alwalilile limwi yangayankanya ukuti yaombele mu museo usuma nanti ukuombela sile umupipi. Ya kasimikila apya yangayankanya ukuombela pamwi na ya kasimikila aelezya. Nomba ngi cakuti ya kasimikila yacelwa, cingalenga kuti katungulula aambe ukwankanya cipya cipya pakuti ati-yacelwa nayo yakwate akuomba nayo. Lelo kwene insita zimwi kungaya vimwi ivingalenga kuti tucelwe. Nomba ngi cakuti twakwata iciyelezyo ca kucelwa, cingazipa twayuzya tuti: Uzye icikalenga kuti nacelwa a pa mulandu wakuti nsitaizya pa kukomaana kwa kuya umu mulimo? Nanti uzye a pa mulandu wakuti nkafilwa ukuipekanya lino kucili insita?

12. Ngi cakuti ilingi mukaisoolwela vino mumaomba, i vyani vino mulinzile ukwelenganyapo?

¹² Ya kasimikila aakwiza uku kukomaana kwa kuya umu mulimo ndi yakulonda, yangapangana na wino yamaomba nawe lino kukomaana kutali kutandike, nanti limwi yangayankanya na wino yamaomba nawe pa kukomaana kwene. Ndi cakuti ilingi mukaisoolwela wino mumaomba nawe, uzye citange cizipe kuti ‘mwayula imyenzo inu’ ukuti mwaomba na ya kasimikila apusane-pusane kucila ukuomba na aali yamwi lyonsi? (2 Kol. 6:11-13) Uzye insita zimwi mukasoolola ukuomba na ya kasimikila apya pakuti muyazwe ukulunduluka? (1 Kol. 10:24; 1 Tim. 4:13, 15) Mwakutikisya sana vyonsi vino yamaminena ukucita kumwi sile na kuno yati akuno mumatandikila ukuombela. Nga ukukomaana kwasila, mutalinzile ukwalula vino iyamwankanya, nupya mufwile ukuya zuwa kuno mumaombela.

13. Ngi cakuti swensi tukupekanya ningo nu kuomba vino tulinzile ukuomba, uzye ukukomaana kwa kuya umu mulimo kungatwazwa uli?

¹³ Pa cisila ca kusimikila, asambi yakwe Yesu 70 “yawezile nu luzango.” (Luka 10:17, NW) Kwaula ukutwisika kukomaana kuno Yesu wakweti na asambi yakwe lino yatali yaye mu kusimikila kwayazwizye ukuomba ningo. Na ndakai kwene ukukomaana kwa kuya mu kusimikila kuka-azwa sana ya kasimikila. Ngi cakuti swensi tukupekanya ningo nu kuomba vino tulinzile ukuomba, ukukomaana kwa kuya umu mulimo kungatukomelezya, ukutusambilizya nu kutwazwa ningo pakuti tungaomba umulimo uno twapeelwa uwa “kukosoola ilandwe ku antu amu nko zyonsi.”—Mate. 24:14.

Lino Nkazi Angatungulula

Nkazi alinzile ukuvimba uku mutwe napya afwile kwikala lino akutungulula ukukomaana kwa kuya mu mulimo. Ivyeo vino wasoolola ukulanzyanya ni umba vifwile ukukolana ni vyeo vino nu mwina angaomvya. Nanti cakuti atalinzile ukucita kwati akusunda aali umwi umba, aliwe alinzile ukutandika ilyasi lya kuti yalanzyanye. Ngi cakuti wanena nkazi muze umuwatiziwe ukuti apepe, nawe kwene alinzile ukuvimba uku mutwe. Ngi cakuti umwina wiza pa cisila lino nkazi watatandika ukutungulula, ale nkazi afwile ukulekela umwina wiyo ukuti aliwe amalilile ukukomaana. Umwangalizi wa mulimo alinzile ukwelenganyizizya limwi ukuti ivya musango uu vingacitika, fwandi alinzile ukunenela limwi ya nkazi pakuti kutaya icimvulunganya. Ku kulangilila, limwi kungaya lino umwina umwance umuwatiziwe uwakuti limwi atali afisye ni myaka 12 wiza uku kukomaana lino nkazi atasoololwa ukuti atungulule, nomba limwi ya eluda yangalola ukuti umwina wiyo atali alinge ukulatungulula ukukomaana. Nga caya vii, umwangalizi wa mulimo afwile ukumanyisya nkazi alino nu mwina kwene wiyo ukuti nkazi aliwe amatungulula, lelo umwina wiyo afwile ukupepa ipepo ngi cakuti ya eluda yalola ukuti watalinga. Nanti limwi tuti kuli umwina umwi umukalamba wino ya eluda yalesya ukuti atange atungulule ukukomaana nanti ukupepa, pa milandu imwi ino ya eluda yamanyile. Nga caya vivyo, ale ya eluda yalinzile ukumanyisya yankazi yano yasoolola ukutungulula ukuti yene yangatungulula nu kupepa nanti cakuti mwina wiyo apano ali, lelo ya eluda yalinzile ukusunga inkama. Nupya, ya eluda yalinzile ukumanyisya umwina wiyo manda yano yankazi yayatantika ukulatungulula ukukomaana.

Pa Kukomaana Kwa Kuya Umu Mulimo Mungalanzyanya Pali Vii:

Mugaomvya mazwi akutulangilila ivya kucita akaya umu Mulimo Witu Uwa Wene.
Mungaomvya kavidyo akaya pa Jw.org akakalanda pa mulimo wa kusimikila.
Mungalanda pa nzila nazyuze zya kusimikililamo, wakwe vino tungatandika ukulanzyanya na antu, vino tungalanda amazwi angalenga ukuti umuntu azumile ukuti tukaswilileko, nanti pali vino tungalondolwela umuntu pa misangulo ndi cakuti wapoka ulupapulo.
Mungalanzyanya pi lembelo limwi likulanda pa mulimo wa kusimikila, nupya lifwile ukukomelezya nu kwazwa ya kasimikila.
Mungalanda pali cimwi icacitike umu mulimo uku ncende inu nanti cino yalemba umu mpapulo zitu.
Mungaomvya ivyeo vimwi mu cipande icaya umu Mulimo Witu Uwa Wene.
Mungaomvya ivyeo vino twacisambilile umwi lyasi limwi ilyali umu Kulongana kwa Mulimo.
Mungalanda pa vyeo ivili mu Lupungu Lwa Mulinzi ivikulanda pa mulimo wa kusimikila.
Mungalanda pa vyeo ivikulanda pa kusimikila wakwe vimwi ivyaya umwi buku li sukulu alino nu mwi buku lya Ciyemba ilyakuti Iseni Mulenkonka.
Mungaomvya ivyeo ivyaya pa jw.org ivingatwazwa lino tukusimikila.
Mungaomvya kabuku kakuti Vino Tukasambilila Umwi Zwi Lyakwe Leza.
Vino tungatandika ukulanzyanya nu muntu umwi wino twazana umu cifulo citu, wakwe yaaya akuti yataazumila muli Leza, yaaya aazumila ukuti ivintu vyasangwike sile, Ahindu nanti Abuuda.
Vino tungasuka wino akulonda paakukanila ukumusimikila.
Vino tungazwa wino tukuomba nawe pakuti aasimikila ningo.
Vino tungacita lino twazana umuntu akuvwanga ululimi luze.
Vino tungasimikila ukuomvya inzila izipusane-pusane izili wa kusimikila uku ng’anda ni ng‘anda, ukusimikila pa foni, kusimikila ukuli antu aingi, kuswilila kuli yano twasimikile, nanti vino tungatungulula isambililo lya Baibo.
Munganenako ya kasimikila pali vino yangaicingilila lino yakusimikila, vino yanga-aluka ukulingana na antu yano yazana, ukuya ni miyele isuma, ukutwalilila ukuomba ni nsansa, nanti sile vyuze.