Mwaomvya Kabuku Akakuti “Vino Tukasambilila Umwi Zwi Lyakwe Leza”—Pa Kutandika Ukulanzyanya na Antu
1. I ciombelo ci icipya cino twapokelela ica kuomvya lino tukusimikila?
1 Muli Baibo yako New World Translation ipitulukwemo, mwaya iciputulwa cakutandikilako icikati “Vino Tukasambilila Umwi Zwi Lyakwe Leza.” Umu ndimi zimwi yapanga akabuku kamwi akanono amuno iika ivyeo kwene vii. Uzye tungaomvya uli vyeo ivyaya mu kabuku kaa lino tukupekanya ivya kuyalanda apa kusimikila? Kabuku kaa kakwata malembelo pa malyasi apusane-pusane, wako vino ibuku lyakuti Ukupelulula lyaya, fwandi cingangupala sana ukutandika ukulanzyanya na antu.
2. Uzye tungaomvya uli kabuku kakuti “Vino Tukasambilila Umwi Zwi Lyakwe Leza” lino tukusimikila?
2 Mungaomvya iuzyo 8 nu kulanda ukuti: “Tukutandalila antu mu cifulo citu, pano antu aingi yakauzya yati, ‘Uzye Leza aliwe walenga ukuti antu yaacula?’ [Umu vifulo vimwi cikaombeka ningo sana ukulanga wino tukusimikila iuzyo kwene lii.] Uzye mwemo mukaelenganyapo uli? [Lekini yasuke.] Baibo ika-asuka ningo sana iuzyo kwene lii.” Welengini ilembelo lyonga nanti ukucilapo pali yano yatantikwe alino pacisila mulanzyanye . Ndi cakuti wino mukusimikila waloleka ukuti akulondesya ukusambilila, mungamulanga mauzyo 20 aya umu kabuku kwene kaa alino mumunene asoolole iuzyo lino angatemwa ukwizalanzyanya umuku uze uno mulamutandalila. Nanti limwi mungamupeela ulupapulo luno tukaomvya pa kusambilizya antu umuli vyeo na vyuze pi lyasi kwene lino mwalanzyanya nawe.
3. Uzye tungaomvya uli kabuku kakuti “Vino Tukasambilila Umwi Zwi Lyakwe Leza” pa kutandika ukulanzyanya na antu aaya mu mipepele iisi ya Ina Klistu?
3 Ukuomvya iuzyo 4 alino na 13 kufika uku 17, kungamwazwa ndi cakuti mukusimikila mu vifulo umwaya antu aya umu mipepele iisi ya Ina Klistu. Nga mwasoolola ivyeo ivili api uzyo 17 limwi mungalanda muti: “Tukutandalila antu pa kasita akanono sile pakuti twavwe indupwa. Uzye mungazumila ukuti ndakai mu ndupwa mwaya sana intazi? [Lekini yasuke.] Atwalane aingi yazana ukuti amazwi yaa yakayaazwa sana aakuti: “Cila mwanaci alinzile kucindika iya wakwe.” [Asi kuti mufwile ukulanda ukuti ivyeo vivyo vifumile pali Efeso 5:33. Ngi cakuti mukusimikila ku mwanaci, lyene mungalanda pa mazwi aya pali Efeso 5:28.] Uzye vwilini amazwi yaa yangavwa atwalana ukuya ni nsansa umu cupo?”
4. I vyani vino mungacita ndi cakuti mwamala ukulanzyanya nu muntu uwaya mu mipepele iisi ya Ina Klistu?
4 Nga mwamala ukulanzyanya, mungapangana ukuti mukatwalilile ukulanzyanya umuku uze. Limwi mungapekanya ukuti mukalande pi lembelo na lyuze ilili pi uzyo kwene lino mwalanzyanya. Insita ino mulalola ukuti icilinga, mungaca mu munene ukuti vino mukalanzyanya nawe vikafuma muli Baibo. Kulingana na vino mwalanzyanyizye nu muntu kwene wiyo na vino akaelenganya pali Baibo, mungamupeela ulupapulo luno mukulola ukuti angatemwa.—Lolini ipepala lya mukasi mu Mulimo Witu Uwa Wene wakwe Dizemba 2013.