Viombelo Vino Tukaomvya pa Kusambilizya
1. Uzye Aina Klistu aakakosoola ilandwe lisuma, yakolana uli na antu aamanya vyakupanga-panga?
1 Antu aamanya sana ivyakupanga-panga, yakaomvya iviombelo ivipusane-pusane. Iviombelo vimwi yasiviomvya sana, lelo vimwi vyene yakaviomvya sana. Antu kwene yaa, lyonsi yakakwata iviombelo umu kambokosi vino yakaomvya sana, nupya ali vino yamanyikisya ukuomvya. Baibo ikakomelezya Umwina Klistu wensi ukuti aasimikila nupya alinzile ukuya u “muomvi wino asi ni nsonyi.” (2 Tim. 2:15) Uzye i ciombelo ci cicindame sana cino twakwata? Iizwi lyakwe Leza pano u mwaya ivyeo vino tukaomvya ku kucita antu “kuya alondezi.” (Mate. 28:19, 20) Fwandi tulinzile ukumanya ivya kusambilizya ningo “ilandwe lya cumi cakwe Leza.” Lelo, kwaya iviombelo ivikaomviwa sana pa kusambilizya, vino swensi kwene tulinzile ukumanya ningo ivyakuviomvya lino tukusambilizya antu icumi.—Mapi. 22:29.
2. I viombelo ci vino tukaomvya sana pa kusambilizya?
2 Iviombelo Vino Tukaomvya Sana: Uzye tukaomvya sile Baibo pa kusambilizya? Awe, kwaya na vyuze kwene vino tukaomvya. Iciombelo cakutandikilapo cino tukaomvya sana, i buku ilyakuti: Uzye Baibo Ikasambilizya Ukuti Uli? Ndi twamala ukusambilila nu musambi umwibuku lii, tukatandika ukuomvya ibuku ilyakuti: “Ikalini mu Kutemwa Kwakwe Leza,” pakuti twazwe umusambi ukuti aalondela ivisinte ivyaya muli Baibo. Acino tulinzile ukumanya sana ivyakuomvya mabuku yaa yaili. Kwaya nu tumabuku tumwi tuno tulinzile ukuomvya pa kusambilizya. Kabuku kaakuti: Ilyasi Lisuma Lino Leza Akutuneena! nako kaaya pa viombelo ivikalamba vino tungaomvya pa kutandika masambililo. Ndi cakuti umu ncende ino tukasimikila mwaya antu aatamanya sana ukuwelenga nanti aakalanda ululimi luno impapulo zitu zitavula sana nanti limwi tutakwata impapulo zizyo umu lulimi luno yakavwanga, lyene tungaomvya kabuku kaakuti: Mwauvwila Leza nanti akaakuti: Mwauvwila Leza Alino Mulikala Amanda Pe. Lyene pakuti twazwe asambi ukumanya vino iuvi litu lyaya, tukaomvya kabuku kaakuti: Uzye Ndakai Aaweni Aakacita Vino Yeova Akaalonda? Nupya kwaya nu tumavidyo tuno tukaomvya pakuti tucite antu ukuya alondezi, wakwe tuu: U Mulandu ci Uno Mulinzile Ukusambilila Baibo?, I vyani Vikacitika pa Ng’anda ya Wene?, alino na kauze akaaya mu Cizungu akaakuti Uzye Leza Wakwata Izina? Fwandi nato kwene i viombelo vino tulinzile ukumanya ningo ivyakuomvya.
3. Uzye ivyeo ivimayanga umu Mulimo Witu Uwa Wene vilatwazwa ukucita cani?
3 Fwandi umu Mulimo Witu Uwa Wene uumafumanga, mwakulaya ivyeo ivimatwazwanga ukumanya vino tungaomvya impapulo zino tukaomvya sana pa kusambilizya. Ndi cakuti twamanya vyakuomvya impapulo zii, tulaalondela amazwi aafuma kuli Leza aakuti: “Uisunge nupya ucenjele umu kusambilizya kwako. Utwalilile kucita ivintu vii, pano ndi wacita cii, ale lyene ulaituula wemwisikulu nga na yao akukuvwa.”—1 Tim. 4:16.