Kuomba Ningo Umu Mulimo—Mwasambilizya Apya

Cino Cacindamila: Asambi yakwe Yesu apya yafwile “ukucita vyonsi” vino walanzile; muli vino Yesu walanzile mwaya nu kusambilizya antu icumi. (Mate. 28:19, 20) Apya aingi yalembesya nu mu Sukulu Lya Mulimo Wakwe Leza nupya limwi yakanenako yalupwa yao ni vyuza icumi cino yasambilila. Lelo, lino yakulunduluka alino nu kumanya ukuti Yeova akalonda antu yonsi ukuvwa ilandwe lisuma, limwi yangatandika ukulondesya ukusimikilako antu yauze. (Loma 10:13, 14) Ndi cakuti aapya yaaya ya kasimikila aatali yawatiziwe, cikalondekwa ukuyasambilizya ningo sana pakuti yaye asipe lino yakulunduluka muli ukapepa.—Luka 6:40.

Vya Kucita:

Mwa-azwa kasimikila umupya ukuti aapoka impapulo izyakuomvya pa kusimikila na pa kusambilizya. Mwamulangako impapulo zino mukalonga umu coola cinu cino mukaomvya umu mulimo, nupya mwamulondolwela umulandu uno impapulo zizyo zyacindamila.
Lino muli mwensi mwapituluka umu mazwi aakutulangilila ivya kucita yano yakaya umu Mulimo Witu Uwa Wene. Mwakomelezya umupya ukuti ailandila ivyeo vivyo umu mazwi yakwe ukwaula ukuwelenga. Nupya mwapekanya capamwi ukuomvya inzila izipusane-pusane izyakusimikililamo izikazanwa umwibuku lya Ciyemba ilyakuti Nonkelenimo pifwa 82, cingazipa ukuomvya ivikacitika umu cifulo cinu. Mwamunena umulandu uno cacindamila ukuzwala ivyakuzwala ivilinge alino nu kuiemvya ukulinge.—2 Kol. 6:3, 4.
Mwamusambilizya panono-panono. Mwalanga umupya kaadi ya cifulo cakuombelamo, nupya mwamusambilizya na vino angaleemba pa calembwa ca ku ng’anda ni ng’anda. Mwamulangilila vino angalemba mazina aayantu akulonda ukusambilila Baibo. Mwamusambilizya ivyakuomvya jw.org lino akusimikila na kabuku akakuti, Good News for People of All Nations. Mwamwazwa ukumanya vino angatwalilila ukulanzyanya nu muntu akulondesya ukusambilila Baibo.—1 Kol. 3:⁠6.
Mwateeka umwenzo, nupya mwamutaizya. (Mapi. 25:11) Mwacita ivintu ivingalenga ukuti aapya yamukolanya. Ukucincila kwinu alino nu kwikako sana mano uku yapya kulalenga ukuti yaalunduluka.

Mwezi Uu Muce Mwezye Ukucita Vii:

Muce musimikile nu musambi winu uku ng’anda ni ng’anda, nupya muce muswilile nawe kuli yano mwasimikile nanti uku kutungulula isambililo. Ndi cakuti mutakwata umusambi, muce muombe na kasimikila aataatala waelezya ukusimikila.