Vino Mungasambilizya Antu Umu Kabuku Kakuti Ilyasi Lisuma
1. Uzye kabuku kakuti Ilyasi Lisuma kalembwa umu musango ci?
1 Wakwe vino twasambilile umu Mulimo Witu Uwa Wene wakwe Julai, iciombelo conga icicindame cino tukaomvya pa kusambilizya, a kabuku kakuti Ilyasi Lisuma Lino Leza Akutuneena! Amalembelo aya umu kabuku kaa yatakopololwa, fwandi wino tukusimikila angasambilila umu kulungatika ukufuma muli Baibo. Akabuku kaa kapusana ni mpapulo izyasyala zino umuntu angasyala akusambilila na lino ali wenga ukwaula uwa kumusambilizya, lelo pakuti umuntu asambilile kabuku kaa, afwile ukukwata uwa kumusambilizya. Fwandi lino twapeela umuntu kabuku kaa, tulinzile ukumulangilila vyakusambilila pakuti ailolele usuma uwaya umu kusambilila ilyasi lisuma ilyaya muli Baibo.—Mate. 13:44.
2. Uzye tungaomvya uli kabuku kakuti Lyasi Lisuma, pa muku uno twatandika ukulanzyanya nu muntu?
2 Pa Muku Wakutandikilapo Ukulanzyanya: Limwi mungalanda muti: “Namutandalila pa mulandu wakuti antu aingi ndakai iyasakamala sana pa vintu ivikucitika umu nsi. Uzye mukwelenganya ukuti ivintu vilatala viziipe? [Lekini yasuke.] Muli Baibo mwaya ilyasi lisuma ilingatutekezya. Lolini mauzyo yaa yano Baibo ika-asuka.” Peelini wino mukusimikila kabuku, nupya munenini asoolole iuzyo limwi pa mauzyo aali uku nkupo yakusyalikizya. Lyene muomvye palagalafu iyakutandikilapo umwisambililo lino atasoolola pakuti mumulangilile vyakusambilila. Inzila nayuze ino mungaomvya, u kuuzya iuzyo lisuma lino muntu angatemwa ilili umwisambililo lino imusoolola, lyene mufwile ukumulangilila vino kabuku kangamwavwa ukuzana icasuko muli Baibo. Ndi cakuti ivyeo ivili umwisambililo lilyo vikuvwana na kavidyo kamwi akaya pa jw.org, ya kasimikila yamwi yakatambisya wino yakusimikila kavidyo kwene kako.
3. Londololini vino tungacita pakutungulula isambililo umu kabuku kakuti Ilyasi Lisuma.
3 Vyakucita Pakutungulula Isambililo: (1) Mufwile ukuwelenga iuzyo ilyalembwa umu vilembo ivitifi pakuti wino mukusambilizya auvwikisye icisinka. (2) Mufwile ukuwelenga palagalafu ili apisika liuzyo. (3) Mufwile ukuwelenga malembelo aalembwa umu vilembo iviyendame, nupya mulinzile ukuuzya mauzyo asuma pakuti mwavwe wino mukusambilizya ukulola vino malembelo yakwasuka iuzyo ilili papela yakwe palagalafu. (4) Ndi cakuti api uzyo lilyo pali mapalagalafu na yauze, mulinzile ukulondela vino itulanda pa cisinka namba 2 na 3. Ndi cakuti kuli kavidyo kamwi kano mutatala mwatambisya wino mukusambilizya, akatikalinga sana ni iuzyo lino mukulandapo, mungamutambisya lino mukulanzyanya nawe. (5) Lyene pa kusyalikizya mulinzile ukuuzya nupya kwene iuzyo ilitifi ilili papela yakwe palagalafu pakuti wino mukusambilizya auvwikisye.
4. I cani icilatwavwa ukumanya ningo ivyakuomvya iciombelo cii icisuma cuze?
4 Mufwile ukuyelezya ivyeo ivyaya umu kabuku kaa kasuma cuze. Mwakaomvya insita yonsi lino calinga ukucita vivyo. Lino mutatala mwatandika ukusambilila nu musambi, mwatala imwelenganya pa musambi wenga na wenga, alino ni nzila isuma ino mungalanzyanyizizyamo nawe malembelo aali umwisambililo lino mukusambilila. (Mapi. 15:28, 29; Mili. 17:2, 3) Cumi kwene ndi mwaelezya ukuomvya kabuku kaa, ala mulaakalola ukuti i ciombelo icisuma sana cakuomvya uku kusambilizya antu icumi!