Mwakolanya ya Kasesema—Habakuku
1. Uzye ivyacitikanga umu manda yakwe kasema Habakuku vyakolana uli ni vikaacitika ndakai?
1 Vino intazi zikavulilako sile muno nsi, limwi tungalanguluka ndi vino Habakuku walangulukanga nu kuzya Yeova ati: “Uzye pacani cino ukulonda kuti nalukulola amacuzi kwene yaa? Uzye pacani ukuzumilizya kuti ukakasi utwalilile?” (Haba. 1:3; 2 Tim. 3:1, 13) Ndi tukwelenganya sana api lyasi lyakwe Habakuku, alino na vino wali nu utailo, cingatwavwa sana lino tukuloleela uwanda wa upinguzi wakwe Yeova.—2 Pet. 3:7.
2. Uzye umuntu wa utailo mungamumanyila kuli vyani?
2 Mwaya Acumi Lyonsi: Nanti icakuti kwali iviipe ivyacitikanga mu manda yakwe Habakuku, wene watwalilile ukuya umupempule muli ukapepa. (Haba. 2:1) Yeova wanenyile Habakuku ukuti amazwi yano walanzile yaali nu kufikiliziwa, nu kuti, “yonsi akacita vyaololoke yalaya nu umi pano yene acumi kuli Leza.” (Haba. 2:2-4) Uzye Aina Klistu yangasambililako vyani uku mazwi yaa, lino yali umu manda yaa aakusyalikizya? Icacindama ukuluta u kutaila ukuti impelelekezyo iliza, aasi kumanya lino ilacitika. Fwandi ndi tuli nu utailo cilatwavwa sana ukuya apempule nu kwika sana amano uku mulimo wa kusimikila.—Ayeb. 10:38, 39.
3. U mulandu ci uno tulinzile ukuyela ansansa lino tukuombela Yeova?
3 Mwazangila Muli Yeova: Lino Gogi wa ku Magogi alazanza antu yakwe Yeova, utailo witu uleziwa. (Ezek. 38:2, 10-12) Inkondo zikaleta intazi, nanti sile a kuli yaayo kwene aakucimvya auze. Vyakulya vingatala nupya ivyuma vingononeka nanti sile uwikalo limwi ungatala sana. Uzye ndi cakuti intazi zyatucitikila tulacita uli? Habakuku wenekelanga ukuti intazi zilacitika, fwandi wapingwilepo ukutwalilila ukuombela Yeova ni nsansa. (Haba. 3:16-19) Nafwe kwene, ‘uluzango luno Yeova akapeela’ u lulatwavwa ukuzizimizya amezyo alayako uku nkoleelo.—Neem. 8:10; Ayeb. 12:2.
4. Uzye u luzango ci luno tungakwata ndakai alino nu ku nkoleelo?
4 Antu yonsi aalapusuka apa wanda wa upinguzi wakwe Yeova, yalatwalilila ukusambilila pali Leza. (Haba. 2:14, NW) Na yaaya kwene alatuutuluka yalasambilila pali Yeova. Acino lekini na ndakai kwene lino twakwata isyuko, twalanda pali Yeova alino na pa milimo yakwe iyakuzunguka!—Masa. 34:1; 71:17.