Uzye Ivyaya Umwi Izwi Lyakwe Leza Vyasenuka?

Yamwi yakatwisika ndi cakuti Izwi Lyakwe Leza licili lyaya vivi kwene vino lyali pa kutandika. Kasesema Ezaya walemvile ukuti amazwi yakwe Leza “yakaikalilila amanda pe.” (Ezaya 40:8) Tungasininkizya uli ukuti malayo yakwe Leza yalembwa vivi kwene sile vino walavile?

Leza wakwata amaka akusungilila Izwi lyakwe nu kulicingilila pakuti litononwa. Mpiti, lino ya kalemba yaomvyanga iminwe pa kulemba, yasininkizyanga ukuti vyonsi vilemvilwe vivi kwene vino vyali, pasi amazwi atiyalundwako, atiyasenulwa nanti yano iyafumyamo. Nomba nanti ciye vivyo, antu yatamalilika nupya ya kalemba yamwi yaluvyanyanga.

TUNGASININKIZYA ULI UKUTI AMAZWI YAKWE LEZA AMUZILO NDAKAI YAYA SILE VIVI KWENE VINO YALI?

Kwaya ivyalembwa vya mpiti ivingi sana ivya Malembelo ya Muzilo. Nga twalinganya ivyalembwa kwene vii vipusanepusane, i canguke ukuzana pano yaluvyanyizye.—Pakuti mumanyilepo na vyuze, lolini cipande icaya pa jw.org icakuti “Uzye Baibo Yasenuka?”

Elenganyini pa vyalembwa vya mpiti vino yakati Ivimfungwa Ivyazanyilwe Muli Yemba Mufwe, vino antu amu mutundu wa ya Alabu yazanyile umu ninga izyayela umupipi na Yemba Mufwe umu 1947. Mu vyalembwa kwene vii ivya mpiti mwaya iviputulwa vya Malembelo ya Muzilo ivyalemvilwe imyaka 2000 ku cisila. Aasambilila sana yakolinye ivyalembwa vii vya mpiti ku Malembelo ya Muzilo yano twakwata ndakai. I vyani vino yazanyile?

Yazanyile ukuti ivyaya umwi Izwi Lyakwe Leza lino twakwata ndakai i vyaya nu mu vyalembwa vya kutandikilapo.a Ukulondezya kuu kukalangilila ukuti ivyaya umu vyalembwa vya mpiti vino tukawelenga nu mu Malembelo ya Muzilo ali mazwi yano Leza walanzile. Fwandi tungasininkizya ukuti Leza wasungilila ningo amazwi yakwe umu Malembelo ya Muzilo pakuti naswe twayawelenga.

Acino, tungataila ukuti vyonsi vino tukawelenga umwi Izwi Lyakwe Leza i vya cumi. Lino tukwelenganya pali vii, lekini tulole vino tungasambilila pali Leza kuli yakasesema yakwe.