Twalililini Ukupepa Pakuti Leza Amutemwe

Leza wapeezile antu uwila uiyele uwakuti yalanda nawe nu kumunena vino yakuyuvwa ukupitila umwipepo. Kasesema Davidi wapeefile ukuti: “Pano wemo ukauvwa amapepo, antu yonsi yamaizanga kuli wewe.” (Masamu 65:2) Nomba tungapepa uli kuli Leza pakuti auvwe nu kutupaala?

MWAYA AICEFYE NUPYA MWAPEPA UKUFUMA PANSI YA MWENZO

Ukupepa lino muli mwenga kukalenga mwanena Leza amacuzi inu yonsi pakuti mumulange vino mukuyuvwa. (Masamu 62:8) Uwa Maka Yonsi watemwa mapepo aakufuma pansi ya mwenzo.

MWALANDA NA LEZA UKUOMVYA IZINA LYAKWE

Nanti cakuti Leza wakwata amazina ya mucinzi aingi, wakwata sile izina lyonga. “Nene indi [Yeova], lilyo lili zina lyane.” (Ezaya 42:8) Izina lyakuti Yeova likazanwa imiku 7,000 umu Malembelo ya Muzilo. Ya kasesema aingi yaomvyanga izina lyakwe Leza nga yakupepa kuli aliwe. Abulaamu wapefile ukuti: “Napapata we Yeova, . . . nzumilizye ndande nupya.” (Utandiko 18:30, NWT.) Naswe kwene tulinzile ukuomvya izina lyakwe Leza ilyakuti Yeova, lino tukupepa.

MWAPEPA UMU LULIMI LWINU

Leza wamanya vino tukaelenganya nu kuyuvwa asi mulandu nu lulimi luno tukalanda. Izwi lyakwe likatunena ukuti: “Leza ataya na kasoozi pa muntu ali wensi. Wino wensi akamoopa nu kucita vyawololoke, wene akazengelwa nawe” asi mulandu nu mutundu.—Milimo 10:34, 35.

Nomba pakuti Leza atupaale tulinzile ukucita ivintu na vyuze ukucila sile ukupepa. Umu cipande icalondelelapo, tumalanda pali vino tulinzile ukucita.