“Paulo Ataizya Leza Nga Akomeleka”

Lino amu cilongano ca ku Loma yuvwile ukuti Paulo wali nu kuyatandalila, aina aipeelisye yapisile kufika nu ku makilomita 64 ku kumukomaanya. Uzye Paulo uvwile uli pali vino antu yaa yaipeelisye? “Lino wayalola, Paulo ataizya Leza nga akomeleka.” (Mili. 28:15) Nanti icakuti Paulo wakomelezyanga sana amu vilongano vino watandalilanga, pa muku uu wene uno wali umufungwa, aliwe wakomeleziwe sana.—2 Kol. 13:10.

Ndakai angalizi ya viputulwa yakatandalila ivilongano ku kukomelezya aina na ya nkazi. Wakwe vino caya ku antu yonsi yakwe Leza, insita zimwi yakatonta, kusakamikwa, alino nu kutoovoka. Uzye muku uze uno umwangalizi wa ciputulwa na mamakwe yalamutandalila, i vyani vino mulacita ivilayazwa ukuya asipe, pakuti ‘utailo uno mwakwata ukakomye utailo wao’?—Loma 1:11, 12.

• 

  Muce muzanwe mu kulongana nu kuya mu kusimikila. Mwangalizi wa ciputulwa akakomeleziwa sana ndi cakuti ya kasimikila yaipeelesya nu kutungilila mulungu onsi uiyeele pakuti yaipakizye. (1 Tesa. 1:2, 3; 2:20) Mungelenganya pa kuombako upainiya wa nsita inono mu mwezi uno mwangalizi watandala. Uzye mutanga muipeelesye kuomba nawe mu mulimo na mamakwe nanti sile u kumusenda mu masambililo? Yakauvwa ningo sana kuomba na ya kasimikila apusanepusane, kumwi sile na yaya kwene akayuvwa ukuti yatatala yaelezya sana kuomba mulimo.

• 

  Mukayapokelele. Uzye mungaipeelesya kuyasunga nanti sile kuyapekanyizizyako icakulya? Kucita vii kungalanga ukuti mwatemwa sana umwangalizi wa ciputulwa na mamakwe. Yasilondekwa ivingi foo.—Luka 10:38-42.

• 

  Mwauvwa nu kucita vino yamunena. Umwangalizi wa ciputulwa akatwazwa mu nzila isuma vino tungazifyako miombele itu iya mu mulimo. Insita zimwi, angatukalipila pali vimwi. (1 Kol. 5:1-5) Akauvwa ningo sana nga tuvwa kuli vino watusunda nu kutontela.—Ayeb. 13:17

• 

  Mwalanga ukutaizya. Mukanene umwangalizi na mamakwe vino mwaipakizye pa mulandu nu kuombesya kwao. Mungayanena sile pakanwa nanti ukuyalembela kalata nanti kadi.—Kolo. 3:15.