Uzye Mapepo Yangamwazwa Uli?

Ya Pamela yalwile ulwale wakwe kansa nupya yalondekwanga ukulola ya dokota asambilila sana pali kansa. Lelo yapefile na kuli Leza kuti ayapeele amaka ya kuzizimizya. Uzye ipepo lyayazwile?

Ya Pamela yalondolwile ukuti: “Lino yandwazyanga, lyonsi nuvwanga intete. Nomba lino napefile kuli Yeova Leza, nuvwile ningo nu kuta ukuvwa intete. Ncili nkauvwa ukuwaika, nomba ipepo likangazwa ukuzizimizya. Antu nga yanguzya vino nkuvwa, nkati ‘ncili nkuvwa ukulwala, lelo naya ni nsansa!’”

Nomba tutalinzile ukulolela lino twakwata intazi izipisye alino itutandika ukupepa. Swensi kwene tukakwata intazi, izikalamba ni zinono nupya tukalonda uwazwilizyo pakuti tuzizimizye. Uzye ipepo lingatwazwa?

Baibo ikalanda ukuti: “Uwatuula masakamiko yako kuli Yawe, nawe amakuwakanga. Wene asitazyela umuntu musuma ukuti yamutonsye foo.” (Masamu 55:22) Amazwi yaa yakatukomelezya wakwe cimwi! Uzye lyene ipepo lingamwazwa uli? Ndi cakuti mwapepa kuli Leza umu nzila isuma, alamupeela vino mukulondekwa pakuti muzizimizye intazi.—Lolini na kambokosi kakuti: “Vino Mapepo Yangamwazwa.”

Vino Mapepo Yangamwazwa

Ukuya na melenganyo asuma

“Lelo pepini pa mulandu wa vintu vyonsi, mule mukulenga Leza. Lyene pa mulandu wakuti mwemwe yakwe Klistu, Leza alamupeela mutende uno kusi umuntu nanti wenga angaumanyikisya. Mutende kwene uu, ulatungulula umi winu ni myelenganyizizye inu.” (Filipi 4:6, 7) Ndi cakuti mukulondolwela Leza vyonsi vikumusakamika, alamwazwa ukuya nu mutende nupya mulapingula ningo pa vintu lino muli namasakamika.

Ukuya na mano afuma kuli Leza

“Ndi umwi uwa munomuli ulilwa mano, wene alinzile kulenga Leza, nga nawe alamupeela, pano Leza akapeela kuli yonsi kwaula kasoozi.” (Yakobo 1:5) Ilingi tusipingula ningo pa vintu ndi cakuti itusakamikwa. Ndi cakuti mwapepa ukuti Leza amupeele amano, angamwiusya ivisinte ivingamwazwa ivyaya umwi Izwi lyakwe, Baibo.

Ukuya na maka nu kutekeziwa

“Klistu wampeela maka akulungatana ni miyele ili yonsi.” (Filipi 4:13) Pa mulandu wakuti Yeova a Leza wa maka yonsi, angamupeela amaka yano mukalondekwa pakuti muzizimizye intazi nanti ukucimvya intazi zino mukupitamo. (Ezaya 40:29) Nupya Baibo ikalanda pali Yeova ukuti “ali ntulo ya kutekeziwa konsi! Wene akatwazwa mu ntazi zitu zyonsi.”—2 Kolinto 1:3, 4.