I Vyani Ivikalanga Vino Umi Winu Ulaya Uku Nkoleelo?
Antu aingi yazumila umu vintu ivisiloleka ukuti i vingalenga yatunguluke umu umi. Pa mulandu na vivyokwene vino yazumilamo, calenga ukuti yacitako intambi zimwi zino yakalola ukuti zingalenga yatunguluke umu umi.
VINO ANTU AINGI YAZUMILAMO
UKUPENDOLA UKUOMVYA INTANDA: Antu aingi yazumila ukuti ivilayacitikila uku nkoleelo vyamanyikwa mpiti pa mulandu na vino intanda zyali pa wanda uno yaviilwe. Yakauzya kuli yano yakapendola ukuomvya intanda pakuti yamanyile limwi ivilayacitikila uku nkoleelo, nu kumanya vino yangacita pakuti yaicingilile.
UKUSAPOOLA: Yamwi nayo yazumila ukuti icingayazwa ukutunguluka, u kuuzya ya sing’anga pakuti yayaneene vino yalinzile ukucita. Yakaelenganya ukuti ndi cakuti yakucita vino yayaneena, ivintu vyonsi vilayaziipila. Nupya yakapingulapo ukulingana na vivyokwene vino ya sing’anga yayaneena.
UKUPEPA IVIKOLWE: Antu yamwi yacili yazumila ukuti yalinzile ukulapepa ivikolwe vyao ivyafwa, nanti ukupeela ivyaupe uku antu yao afwa, pakuti yayapaala nu kuyacingilila. Ya Vana aakaikala uku Vietnam yalanzile ukuti, “Nazumila ukuti ndi cakuti nkucindika ivikolwe vyane, ningaya nu umi usuma ndakai nu ku nkoleelo pamwi na ana yane.”
UKUTUUTULUKILA UMU CINTU CUZE: Aingi yazumila ukuti ndi cakuti umuntu wafwa akavyalilwa umu cintu cuze. Yazumila ukuti ivisuma nanti iviipe ivikayacitikila ndakai, a pa mulandu na vino yacitanga lino yali nu umi umu cintu cuze.
Nomba aingi, yakaelenganya ukuti umu vizumilo vivyo mwaya ivya ulozi. Nanti cakuti yamanya vivyo, yacili yakapima imisilwa ya mu minwe, ukupendola ukuomvya intanda, alino nu kuomvya ivintu vyuze ivikauvwana ni mipasi. Yakaelenganya ukuti ukucita ivintu vivyo, kungayazwa ukumanya ivilayacitikila uku nkoleelo.
IVIKAFUMA UMU KUZUMILA UMU VINTU VII
Uzye antu aataila umu vizumilo vii nu kuvicita, yazana umi usuma nupya yalacingililwa?
Uvwini ivyacitikiile ya Hào aakaikala uku Vietnam. Yuzyanga kuli yano yakapendola ukuomvya intanda, ukupepa ivikolwe, nu kucita ivyakolineko na vii pakuti yatunguluke umu umi. Uzye yatungulwike? Yailandiile aineco iyati: “Uculuzi wavulungine, nakweti sana inkongole, twapusananga umu lupwa, nupya nasakamikwanga sana.”
Ya Qiuming aa ku Taiwan, nayokwene yazumiile umu kupendola ukuomvya intanda, ukuti kwaya ukutuutulukila umu cintu cuze, yapepanga ivikolwe, nu kucitako ivintu vyuze ivyuvwananga ni mipasi. Pa cisila ca kwelenganya sana pa vizumilo vii, yatile: “Nilwike ukuti ivisambilizyo vii ni ntambi visiuvwana nupya vikavulunganya sile. Nazanyile ukuti ukupendola ukuomvya intanda kutali ukwa cumi. Lyene ukutuutulukila umu cintu cuze nako, ndi cakuti umuntu atanga aiusye ivyacitikanga lino wali nu umi, angasenuka uli nu kulacita ivisuma lino watuutulukila umu cintu cuze?”
“Nilwike ukuti ivisambilizyo vii ni ntambi visiuvwana nupya vikavulunganya sile.”—YA QIUMING, AA KU TAIWAN
Wakwe vino ya Hào, ya Qiuming, alino na yauze izile iiluka, tutanga tumanye ivilatucitikila uku nkoleelo ukupitila umu maka yamwi aasiloleka, intanda, ivikolwe ivyafwa, nanti ukutuutulukila umu cintu cuze. Uzye cii cikupiliula ukuti tutakwata amaka pali vino umi witu ulaya uku nkoleelo?
Antu aingi yakaelenganya ukuti ukuya uku masambililo ya papela nu kukwata ivyuma i vingalenga yakaye nu umi usuma. I vyani ivyacitikila yamwi aelenganyanga ivya musango uwo?
a Mazina aali umu cipande cii ni vilondeliilepo asi mazina yao acumi.
b Amazwi yaa yakazanwa muli Baibo pali Galatiya 6:7. Icisinka icaya api lembo lii, caomviwa nu mu mvwango izyamanyikwa sana wakwe, nga wakomela ivibilika, ulazombola ivibilika kwene; nga wakomela cilemba, ulazombola cilemba kwene.