Vino Mukacita Vingalenga Ivintu Vikamuziipile Nanti Foo

Imyaka umupiipi na 3,500 iyatipita, Yeova Leza wanenyile ya kapepa yakwe vino yalinzile ukucita pakuti yakaye nu umi usuma. Watiile: “Ndakai inamupeela cakuti musolole mweisikulu, pakasi ka umi ni mfwa, pakasi ka upolelelo wakwe Leza ni ntipu yakwe Leza. . . . Acino sololini umi.”—Malango 30:19.

Pakuti antu yaa yakaye nu umi usuma, yalondekwanga ukusoolola ningo ivyakucita. Naswekwene ali vino tulinzile ukucita. Baibo ikalondolola ningo ukuti tungaca tuye nu umi usuma, ‘ndi cakuti tukutemwa Yeova Leza witu, nu kumuvwila.’—Malango 30:20.

TUNGACITA ULI PAKUTI TUTEMWE YEOVA NU KULAMUVWILA?

TULINZILE UKULASAMBILILA BAIBO: Pakuti tutemwe Yeova, tulinzile ukutandikila ukusambilila pali aliwe muli Baibo. Lino tukucita vivyo, tulamanya ukuti a Leza uwaya nu kutemwa, nupya akalonda ivintu vyatuziipila. Akamukomelezya ukuti mwapepa kuli aliwe “pano wene akamusakamala.” (1 Petulo 5:7) Baibo yatulaya ukuti ndi cakuti tukwezya na maka ukupalama kuli aliwe, “nawe alapalama” kuli sweswe.—Yakobo 4:8.

MWAOMVYA VINO MUKUSAMBILILA: Ukuvwila Leza cikasenula ukulondela utunguluzi wakwe uwa mano uwaya muli Baibo. Nga mwacita vivyo, ‘mulatunguluka nupya mutalapoosiwa.’—Yoswa 1:8.