Kwali Visuma Ivyacitike pa Mulandu nu Kumwentula

AKAZYANA yaili yapitanga umwi tauni ilyayela umu musumba wa Baguio uku Philippines. Yaweni kasitandi ka mpapulo nomba yatapalamilepo. Ya nkazi Helen aimilile umupiipi na kasitandi yayamwentwilile. Akazyana yaa yatimiliile, lelo yatwalilile ukwiusya vino ya Helen yayamwentwilile.

Lino papisile insita, ala akazyana yali muli basi yakuswilila uku ng’anda yaweni Ing’anda ya Wene ala pali icipampa icikulu apalemvilwe jw.org. Iwisye ukuti i vilembo ivili vimwi kwene vino iyalola pali kasitandi ka mpapulo. Yonsi yoili isile muli basi nu kuya pa Ng’anda ya Wene nupya yaweni utantiko apaali insita na manda ya kulongana aavilongano ivipusanepusane.

Akazyana yaa yaili yaile iyazanwa uku kulongana ukwaliko uwanda uwalondelelapo. Lino ingilanga umu Ng’anda ya Wene yazungwike sana ukulola ya Helen, lilyo kwene sile iwisye ukuti ali yaya ayamwentwilile. Ya Helen yalanzile ukuti: “Nuvwile intete lino izile kuli nene, pano ntamanyile umulandu uno iziile. Nelenginye ukuti limwi kuli cimwi cino nacisile.” Nomba akazyana yaa yanenyile ya Helen ukuti yayaweni pali kasitandi ka mpapulo.

Akazyana yaa yaipakizye ukulongana nupya yuvwile ningo ukuya pamwi na ina na ya nkazi. Lino yaweni aina na ya nkazi yamwi yakuzifya Ing’anda ya Wene pa cisila ca kulongana, yuzizye ndi cakuti yangaombako. Kufuma papa kwene umukazyana wenga wafumako uku Philippines, umuze wene watandika ukulongana nu kusambilila Baibo pa mulandu sile nu kumwentula!