Mauzyo Yano Aakabelenga Yakauzya

Pa Ina Levi 19:16 paya isunde ilyakuti “utacita icintu icili consi cino cingaleta uzanzo” ku muzo. Uzye isunde lii likapiliula cani?

Yeova wanenyile Aina Izlaeli ukuya antu amuzilo. Pakuti ayazwe ukuti yaya amuzilo wayanenyile ukuti: “Utapitanapitana ku na ku kukusalanganya ufi pakasi ka mutundu wako. Utacita icintu icili consi cino cingaleta uzanzo ku umi wa mwinipamba wako. Nene Yawe [nanti Yeova].”—Levi 19:2, 16.

Amazwi aakuti “Utacita icintu icili consi” yasenulwa ningo sana ukulingana ni Ciebele, nomba uzye mazwi yaa yakapiliula cani? Lupapulo lumwi Lwa Kulondelezyamo Ivyeo ulukalanda api buku ilya Ina Levi lukati: “Icikomo cii . . . catala ukuvwikisya pano amazwi aaya mu Ciebele yangasenulwa nu kuti ‘utaimilila umupiipi.’”

Asambilila yamwi yakaelenganya ukuti amazwi yaa yalemana na mazwi aaya umu cikomo 15 aakati: “Uye umufumacumi lino ukupingula imilandu. Utacita kasoozi pakasi ka muntu mupina nu mukama. Lelo wapingula umuntu muzo mu ulungami.” (Levi 19:15) Isunde ilyaya umu cikomo 16 ilyakuti “Utacita icintu icili consi” ku muzo lyapiliulanga ukuti umwina Izlaeli atalinzile ukucita icintu icingalenga ukuti ataya nu mulinganya wakwe lino yali umu cilye na lino yakucita uculuzi nanti umu lupwa. I cacumi ukuti tutalinzile ukucita ivintu vivyo, nomba kwaya inzila na yuzye ingalenga tuvwikisye amazwi aaya umu cikomo 16.

Lolini amazwi akutandikilapo umu cikomo 16. Leza wanena antu yakwe ukuti yatalinzile ukulasalanganya ufi. I cacumi ukuti umuntu aakasalanganya malyasi pa yantu yauze angalenga kuye intazi. Nomba cikaipisya ndi cakuti umuntu akulanda malyasi yaufi pa muntu muze. (Mapi. 10:19; Kasa. 10:12-14; 1 Tim. 5:11-15; Yako. 3:6) Umuntu aakalanda malyasi yaufi pali yauze ilingi akamanya nu kumanya ukuti akubepa. Umuntu angalanda nu ufi nanti cakuti ukucita vivyo kungalenga umi wa muntu wino akubepezya ukuya umu uzanzo. Iusyini ukuti aonsi yalanzile ivya ufi pali Naboti, na cico calenzile ukuti yamufyenge nu kumupoola amawe. (1 Yamw. 21:8-13) Fwandi wakwe vivi kwene vino amazwi alondelelapo umwi buku lya Ina Levi 19:16 yakalanda, umuntu aakasalanganya malyasi yaufi angacita icintu icili consi icingalenga umi wa muntu muze ukuya umu uzanzo.

Nupya umuntu angasalanganya malyasi yaufi pa muntu muze pa mulandu wakuti wamupata. Pali 1 Yoani 3:15, pakati: “Wensi uwapata umwinakwe wene iinkomi, nupya mwamanya ukuti inkomi yonsi italaya nu umi wa pe.” Nupya lino Leza walanzile ukuti “utacita icintu icili consi cino cingaleta uzanzo,” walanzile nu kuti: “Utaya na kaikila ku muntu umwi mu mwenzo.”—Levi 19:17.

Fwandi ali mulandu uno isunde ilyaya pa Ina Levi 19:16 lyacindamila sana uku ina Klistu. Tutalinzile ukuya na melenganyo aipe apa yantu yauze nanti ukulayabepezya. Fwandi nga tukucita “icintu icili consi cino cingaleta uzanzo” uku muntu muze nanti tukulanda malyasi yaufi pali aliwe, ala tukulanga ukuti twamupata. Aina Klistu yatalinzile ukupata aliwensi.—Mate. 12:36, 37.