VINO TUNGACIMVYA ULUPATO

4 | Leza Angamwazwa Ukucimvya Ulupato

Vino Baibo Ikasambilizya:

“Imiyele iikafuma ku mupasi wa muzilo, u kutemwa, insansa, umutende, ukuteeka umwenzo, icikuuku, usuma, utailo, ukufuuka nu kuikaanya.”—GALATIYA 5:22, 23.

Vino Cikapiliula:

Leza nga watwazwa tungata ukuya nu lupato. Umupasi wa muzilo ungatwazwa ukuya ni miyele ino tutanga tukwanisye ukukwata pa lwitu. Fwandi nga tukulonda ukucimvya ulupato, tutalinzile ukusintilila pa maka itu, lelo tulinzile ukusintilila pa kwazwa kwakwe Leza. Nga twacita vivyo, naswe tulayuvwa wakwe vino umutumwa Paulo wayuvwile uwalemvile ukuti: “Umu vintu vyonsi nakwata maka ukupitila muli wino akampeela maka.” (Filipi 4: 13) Nupya tulalanda nu kuti: “Uwazwilizyo wane umafuma kuli Yawe [Yeova].”—Masamu 121:2.

Vino Mungacita:

“Yeova wangazwa ukuta ukuya nu unkalwe nupya wangazwa ukuya umuntu uwa mutende.”—YA WALDO

Mwapepa kuli Yeova, nupya mwamulenga ukuti amupeele umupasi wakwe uwa muzilo. (Luka 11:13) Mwamulenga pakuti amwazwa ukuya ni miyele isuma. Mwasambilila pali vino Baibo ikalanda pa miyele ingamwazwa ukucimvya ulupato wakwe, kutemwa, mutende, kuteekela, nu kuikaanya. Mwalola vimwi ivingamwazwa ukutandika ukuya ni miyele iyo. Nupya insita ikulu mwaya pamwi na antu aakalonda ukukwata imiyele iyo. Antu yayo yangamwazwa ‘nu kumucincizya umu kutemwa nu mu kuomba imilimo isuma.’—Aebele 10:24.

Ivyacitikile Yamwi—YA WALDO

Yacimvizye Ulupato Ulwalenganga Yaya nu Unkalwe

Lino ya Waldo yakulanga yakwatanga sana intazi, na cii calenzile ukuti yaye nu unkalwe. Yalondolwile ukuti: “Ilingi twalwisyanyanga na antu aakakazya imilembo iikavulunganya uwongo . . . Uwanda umwi iumba lya yantu yano twalwisyanyanga nayo lyalipiile umonsi umwi uwamanyikwe ukuti wali inkomi iipisye kuti aize ankome, nomba nakwanisye ukuutuka, nupya wancisile sile.”

Ya Waldo yatatemilwe lino aci yao yatandike ukusambilila Baibo na ya Nte Yakwe Yeova. Yalanzile iyati: “Napasile ya Nte nupya nayanenanga mazwi aipe. Lelo yene yatancitilangapo iviipe.”

Lyene pa cisila, ya Waldo izile iyatandika ukusambilila Baibo. Yalanzile ukuti: “Cantalilanga ukuomvya vino nasambililanga. Nupya nayuvwanga ukuti ntanga nkwanisye ukuta ukuya ni cipyu nu unkalwe.” Lelo kwali cimwi cino yasambilile muli Baibo icayazwile ukusenuka sana.

Ya Waldo yalondolwile ukuti: “Wanda umwi ya Alejandro aansambilizyanga Baibo yanenyile ukuti mbelenge Galatiya 5:22, 23. . . . Ya Alejandro yanenyile ukuti ningaya ni miyele iyo ndi cakuti umupasi wakwe Leza uwa muzilo wangazwa, asi uku maka yane foo. Vii vino yanenyile vyalenzile nsenuke sana muli vino nelenganyanga.”

Ya Waldo izile iyata ukuya nu unkalwe pa mulandu wakuti yataile ukuti Leza angayazwa. Yalanzile iyati: “Ya lupwa yane na ya cuza yafizilwe ukuzumila ukuti nasenwike.” Nupya yalanzile nu kuti: “Yeova wangazwa ukuta ukuya nu unkalwe nupya wangazwa ukuya umuntu uwa mutende.”