Mauzyo Yano Aakabelenga Yakauzya

Aemwi muno Yesu walozizye lino watiile: “Ntiiza uku kuleta umutende”?

Yesu wasambilizye antu ukuya nu mutende. Nomba pa nsita imwi wanenyile atumwa yakwe ati: “Mutelenganya ukuti niiza uku kuleta umutende pano nsi; ntiiza uku kuleta umutende, suka ulupanga. Pano niiza uku kupaatukanya umwana umonsi na isi, nu mwana umukazyana na nyina, nu mukazyana uwatwalwa na nyinavyala.” (Mate. 10:34, 35) Aemwi muno Yesu walozizye?

Yesu atalondanga ukupaatukanya indupwa, lelo wamanyile ukuti vino wasambilizyanga vyali nu kulenga umu ndupwa muye ukupaatukana. Nomba yonsi aakulonda ukuya asambi yakwe Klistu nu kubatiziwa yalinzile ukumanyila limwi ivilayacitikila ndi cakuti yasoololapo ukucita vivyo. Insita zimwi yano yatwalana nayo nanti ya lupwa yauze yangayakaanya, na cico cingalenga yavilwe ukutwalilila ukuya acisinka kuli vino Klistu wasambilizyanga.

Baibo ikakomelezya Aina Klistu “ukuya amutende ku yantu yonsi.” (Loma 12:18) Nomba vino Yesu wasambilizyanga vingaya wa “lupanga” umu ndupwa zimwi. Cico cingacitika ndi cakuti umwi umu lupwa wazumila ivisambilizyo vyakwe Yesu nomba yauze yene yatandika ukukaanya ivisambilizyo vivyo. Nga caya vivyo ya lupwa yayo yakaya “alwani” yakwe wino akusambilila icumi.—Mate. 10:36.

Asambi yakwe Yesu aaya umu ndupwa muno mwaya antu aasipepa ukuli kumwi, yalinzile ukupingulapo ndi cakuti yamazanzyanga Yeova na Yesu nanti ya lupwa. Limwi ya lupwa aasilongana yangayapatikizya ukuzevyako ukuzevya ukusiuvwana nu kupepa kwa cumi. Ndi cakuti vya musango uwo vyacitika yalinzile ukupingulapo wino yalinzile ukuzanzya. Yesu watiile: “Wensi uwatemwa sana isi nanti nyina ukucila nene atalinzile ukuya umusambi wane.” (Mate. 10:37) Nomba Yesu atalozizye umukuti yayo aakusambilila icumi yalinzile ukuta ukutemwa avyazi yao pakuti sile yaye asambi yakwe. Lelo cino wayasambilizyanga i cakuti yalinzile ukupingulapo ivilinzile ukuya ivicindame sana umu umi wao. Ndi cakuti ya lupwa aasi ya kapepa yakutukanya ukupepa Yeova, tukatwalilila ukuyatemwa nomba tukailuka ukuti ukutemwa Leza ali cintu cicindamisye.

Ukwaula nu kutwisika, ukucuziwa na ya lupwa kukalenga tuye sana nu ulanda. Nomba nanti ciye vivyo, asambi yakwe yalinzile ukulaiusya amazwi yakwe aakuti: “Wensi aakakana ukusenda icimuti cakwe ica kucuziwilwapo nu kundondela, atalinzile ukuya umusambi wane.” (Mate. 10:38) Umu mazwi yauze tungati, Aina Klistu yakalola ukucuziwa na ya lupwa ukuti kwaya pa vintu vino asambi yakwe Klistu yalinzile ukuitemelwa ukuzizimizya. Nomba yakatwalilila ukutaila ukuti pa mulandu ni miyele yao isuma, ya lupwa yao yangasenuka nu kutandika ukulonda ukusambilila icumi ca muli Baibo.—1 Pet. 3:1, 2