Uzye Mukwiusya?

Uzye mwabelenga ningo ya magazini afumile uno mwaka aa Lupungu Lwa Mulinzi? Lolini vino mungasuka amauzyo aali apisika:

I visuma ci vino tulaipakizya ndi cakuti tukuomvya insita ikulu ukulanda na Yeova, ukukutika kuli aliwe, nu kwelenganyapo?

Tulaapingula ningo pa vintu, kuya ya kasambilizya yasuma, utailo witu ulakoma, nupya tulatemelwako sana Yeova.​—w22.01, pa mafwa 30-31.

Uzye ukutaila Yeova na antu yano akaomvya kungatwazwa uli?

Ikwene ali nsita ino tulinzile ukumanya vino tungacita pakuti twataila vino Leza akaomba ivintu ukwaula ukutunganya sile vino tulinzile ukucita nu kulondela vino ya eluda yatunena. Lino ucuzi ukalamba ulatandika, tulaalondekwa ukuvwila nanti cakuti vino yatunena ukucita tutavitemilwe.​—w22.02, pa mafwa 4-6.

Aemwi muno malaika walozizye lino wanenyile Zakaliya pa “mwando wa kupimilako umu minwe yakwe [musika wa Yayuda] Zelubabeli”? (Zaka. 4:8-10)

Icilolwa cici calenzile antu yakwe Leza ukusininkizya ukuti itempele ilyakuulwanga pa nsita iya lyali nu kusila ukukuulwa nu kuya ukulingana nu kulonda kwakwe Leza.​—w22.03, pa mafwa 16-17.

Tungaya uli “icilangililo . . . umu milandile”? (1 Tim. 4:12)

Nga tuli umu mulimo wa kusimikila tukalanda ni cikuuku nu mucinzi, ukwimba nu mwenzo onsi, ukwasukapo lyonsi pa kulongana, ukulanda ivya cumi nu kukomelezya yauze nu kukanalanda amazwi aipe.​—w22.04, pa mafwa 6-9.

Uzye ivimanyililo vya vilyanyi 4 (mawene) ivyalandwapo muli Danieli cipande 7 vikalolekela uli umu cilyanyi conga icalandwa pa Kusokolola 13:1, 2?

Cilyanyi icalandwapo umu Kusokolola cipande 13 cisiimililako sile uteeko onga nanti uwene, wakwe uteeko wa Ina Loma. Lelo cikaimililako mauteeko ya yantu aakateeka antu ukufuma na mpiti.​—w22.05, apifwa 9.

Inzila ci icindame ino tungalangilamo ukuti twataila ukuti Leza alalenga ivintu vizipe nu kulenga kuye umulinganya?

Ndi cakuti umwi watupontela, ukutusosya nanti ukutucitila iviipe, tutalinzile ukutwalilila ukusoka nanti ukuya nu lupato, lelo tulinzile ukusiila sile Yeova. Pano wene alafumyapo iviipe vyonsi ivikacitika pa mulandu nu luyembu.​—w22.06, pa mafwa 10-11.

I vyani vino umwina aakupepa pa kulongana alinzile ukwiusya?

Tutalinzile ukunenola yauze lino tukupepa nanti ukumanyisya vimwi. Nupya tutalinzile ukuomvya “mazwi aingi” sana sana umwi pepo lya kutandikilako. (Mate. 6:7)​—w22.07, pa mafwa 24-25.

U mu nzila ci muno yayo “acitanga iviipe yalatuutulukila uku upinguzi”? (Yoa. 5:29)

Yatalapingwilwa pali vino yacitanga mpiti. Lelo yalapingwilwa pa miyele yao na pali vino yalacita pa cisila ca kutuutululwa.​—w22.09, Apifwa 18.

I vyani vino Umwina J. F. Rutherford wakomelizye antu pa ukongano uwaliko umu Sepetemba 1922?

Pa ukongano uwaliko umu Cedar Point, Ohio, ku U.S.A., Umwina Rutherford watiile: “Lumbanyini Umwene aakuteeka. Mwapeelwa umulimo wa kunena antu pali vii. Acino, manyisyini, manyisyini, manyisyini Umwene nu Wene wakwe.”​—w22.10, pa mafwa 3-5.

I vintu ci vitatu vino Ezaya icipande 30 ikalandapo vino Leza akaomvya pa kutwazwa ukuzizimizya?

Cipande cii cikalangilila ukuti (1) akakutika nu kwasuka mapepo itu, (2) akatutungulula, na (3) akatupaala ndakai nupya alacita vivyo uku nkoleelo.​—w22.11, apifwa 9.

U mulandu ci uno tungalandila ukuti amazwi aya pa Masamu 37:10, 11, 29 yafikiliziwe mpiti nupya yalafikiliziwa nu ku nkoleelo?

Amazwi yakwe Devedi yakalondolola ivintu vino Aina Izlaeli yaipakizye, wakwe pa nsita ino Solomoni wateekanga. Yesu walanzile pali paladaise ilayako uku nkoleelo nupya walanzile na mazwi aya pa cikomo 11. (Mate. 5:5; Luka 23:43)​—w22.12, pa mafwa 8-10, 14.