“Twalililini Ukuya Na Mano, Cenjelini!”

1. I vyani vino Yesu wanenyile asambi yakwe pa mpelelekezyo ya nsi, nupya i vyani vino wayacelwile?

LINO kwasyazile sile manda anono ukuti Yesu afwe, asambi yakwe 4 yamuzizye ukuti: “I cani icilaya icimanyililo . . . ca mpelelekezyo ya nsi?” (Mate. 24:3) Asambi yakwe yafwile yasakamile pali vino yali nu kumanyilako lino Yelusalemu ni tempele vyali nu kononwa. Lino Yesu wasukanga, atalanzile sile pali vino Yelusalemu ni tempele vyali nu kononwa, lelo walanzile na pa “mpelelekezyo ya nsi” ino tukwikalamo ndakai. Lino walandanga pa vilacitika umu nsita ya mpelelekezyo watiile: “Lelo ukulozya ku wanda uuwa nanti insita, kusi uwamanya, nanti sile aamalaika ya kwi yulu nanti Umwana, suka sile Tata.” Nupya wacelwile na asambi yakwe yonsi ukuti “Mwaya aiteyanye.”—Mako 13:32-37.

2. U mulandu ci uno cacindamiile uku Ayuda aikalanga umu manda akusyalikizya pa nsita iya ukuya aiteyanye?

² Aina Klistu Ayuda akutandikilapo yalondekwanga ukuya aiteyanye pakuti yangapususya maumi yao. Yesu wanenyile alondezi yakwe vino yali nu kumanyilako ukuti manda akusyalikizya amu nsita ya Ayuda iyapalama. Watiile: “Lino mulalola asilika iyazinguluka Yelusalemu, muce mumanye ukuti ali apiipi nu kononwa.” Pa nsita iyo yalondekwanga ukuvwila ukucelula kwakwe Yesu nu kutandika “ukuutukila uku myamba.” (Luka 21:20, 21) Yayo yonsi auvwilile ukucelula yapuswike lino asilika Aina Loma yononyile umusumba wa Yelusalemu.

3. I vyani vino tumasambilila umu cipande cii?

³ Ndakai tukwikala umu manda a mpelelekezyo muno insi ii iipe yasya iyononwe. Fwandi naswe kwene tulinzile ukutwalilila ukuya na mano nu kutwalilila ukuya aiteyanye. Umu cipande cii tumasambilila vino tungatwalilila ukwika mano kuli vyakwe Leza nu kwika mano ku vintu ivikucitika ndakai ivikulangilila ukuti tuli umu manda akusyalikizya, alino na pali vino tungaya acenjele nu kuomvya ningo insita iyatisyala.

MWATEEKELA LINO MUKULOLA IVINTU IVIKUCITIKA UMU NSI

4. U mulandu ci uno tulinzile ukuyela ateekele lino tukulola ivintu ivikucitika umu nsi vikufikilizya usesemo wa muli Baibo?

⁴ Kwaya vimwi ivisuma ivikalenga twaika mano ukukulola kuno ivintu ivikucitika umu nsi vikufikilizya usesemo wa muli Baibo. Wakwe, Yesu walanzile pali vimwi umu kulungatika ivyali nu kucitika ku kulangilila ukuti insi ii yakwe Satana ili umupiipi nu kononwa. (Mate. 24:3-14) Umutumwa Petulo watukomelizye ukutwalilila ukwika amano kuli vino amausesemo yakufikiliziwa pa kuti tungatwalilila ukuya nu utailo ukome. (2 Pet. 1:19-21) Ibuku lya kusyalikizyako muli Baibo lyatandikilako na mazwi yakuti: “Kusokolola kwakwe Yesu Klistu, kuno Leza wamupeezile, ukwa kulanga aomvi yakwe ivintu ivili nu kucitika likwene.” (Kuso. 1:1) Fwandi tukaika sana amano kuli vino vikucitika ndakai, nupya tukalonda ukumanya vino vikufikilizya usesemo wa muli Baibo. Nupya tungalondesya ukulanzyanya na antu pa vintu kwene vii ivikucitika.

5. I vyani vino tutalinzile ukucita, nupya i vyani vino tungacita? (Loliniko ni vikope.)

⁵ Lino tukulanzyanya pa usesemo wa muli Baibo tutalinzile ukulatunganya. U mulandu ci? A pa mulandu wakuti tusilonda ukulanda ivili vyonsi ivingalenga umu cilongano mutaya ukulemana. Wakwe, limwi munguvwa kuno intunguluzi zikulanzyanya pali vino zikulonda ukusisyapo ivimvulunganya nu kuleta umutende nu kucingililwa. Ukucila ukulatunganya nu kuzumila ukuti ivyeo vii vikufikilizya ukusesemo ukazanwa pali 1 Tesalonika 5:3, tulinzile ukumanya ivyeo ivipya ivikulanda api lyasi kwene lilyo. Nga tukulanda ivintu ukulingana na vino impapulo zitu zikalanda, tulalenga umu cilongano muye ukulemana nu “kuya na mano ali yamwi na melenganyo ali yamwi.”—1 Kol. 1:10; 4:6.

6. I vyani vino tungasambilila uku mazwi aaya pali 2 Petulo 3:11-13?

⁶ Belengini 2 Petulo 3:11-13. Umutumwa Petulo watwazwile ukutwalilila ukwelenganya pa mulandu uno tulinzile ukusambililila amausesemo ya muli Baibo. Watunenyile “ukwelenganya sana pa kuyapo kwa wanda wakwe Yeova.” U mulandu ci? Asi pa mulandu wakuti tukaombela “wanda uuwa ni nsita” lino Yeova alaleta Amagedoni, lelo a pa mulandu wakuti tukalonda ukuomvya ningo insita iyatisyala uku kucita ivintu ivingalenga tuye “antu aya ni miyele ya muzilo nupya aipeelesya umu kuombela Leza.” (Mate. 24:36; Luka 12:40) Tukalonda ukucita ivisuma nu kusininkizya ukuti tukuombela Yeova pa mulandu wakuti twamutemwa sana. Pakuti tutwalilile ukucita vivyo, tulinzile ukuya acenjele.

UZYE CIKAPILIULA CANI UKUYA ACENJELE?

7. Uzye tungalanga uli ukuti twaya acenjele? (Luka 21:34)

⁷ Yesu wanenyile asambi yakwe ukukanaika sile mano uku vintu ivyacitikanga pa nsita iya, lelo wayanenyile nu kwika mano kuli vino yacitanga. Icisinka cii calangililwa ningo umu mazwi akucelula aya pali Luka 21:34. (Belengini.) Elenganyini pa mazwi yakwe Yesu akuti: “Cenjelini.” Umuntu umucenjele akamanya ivintu ivingonona ucuza wakwe na Yeova nupya akaezya na maka ukutaluka uku vintu vivyo. Ukucita vivyo, kukalenga atwalilile ukuya cuza wakwe Leza.—Mapi. 22:3; Yuda 20, 21.

8. I vyani vino umutumwa Paulo wanenyile Aina Klistu?

⁸ Umutumwa Paulo wanenyile Aina Klistu ukuti yalinzile ukuya acenjele. Wanenyile Aina Klistu aku Efeso ukuti: “Cenjelini pakuti mutaapita wa yawelewele lelo mwapita wa yantu ya mano.” (Efes. 5:15, 16) Satana akaezya na maka ukutononela ucuza witu na Yeova, lelo Baibo ikatucelula ukuti twailuka “vino ukulonda kwakwe Yeova kwaya” pakuti twacimvya iviteyo vyonsi vyakwe Satana.—Efes. 5:17.

9. Uzye tungacita uli pakuti twacita ukulonda kwakwe Yeova?

⁹ Baibo italanda iviipe vyonsi ivingonona ucuza witu na Yeova. Tulinzile ukulaipingwila pa vintu vino Malembo yatalanda umu kulungatika. Pakuti twapingulapo ningo pa vintu tulinzile ukulalondesya ukucita “ukulonda kwakwe Yeova.” Tungacita vivyo ndi cakuti lyonsi tukubelenga Izwi Lyakwe Leza nu kwelenganyapo. Nga tukucita ukulonda kwakwe Yeova nu kwezya ukuya na “melenganyo yakwe Klistu,” tulaya wa “muntu wa mano,” na lino kusi amasunde amu kulungatika akulondela pali vimwi vino tukulonda ukucita. (1 Kol. 2:14-16) Insita zimwi cingatwangukila ukumanya vino tulinzile ukutalukako, lelo insita zimwi zyene cikatutalila ukucita vivyo.

10. I vintu ci vimwi viipe vino tulinzile ukutaalukako?

¹⁰ Pa vintu vimwi vino tulinzile ukutaalukako paya nu kulanga icintemwa, kumwesya uwengwa, kuliisya, ukulanda amazwi aipe pa antu yauze alino nu kutamba ivya unkalwe nanti vya uzelele alino na vyuze ivikolineko. (Masa. 101:3) Mulwani witu Ciwa watwalilila ukulonda inzila zino angaomvya pa konona ucuza witu na Yeova. (1 Pet. 5:8) Ndi cakuti tutacenjile Satana angalenga tuye nu muvimbila, ukukanaya ni cisinka, lunkumbwa, lupato ni cilumba. (Gala. 5:19-21) Pa kutandika tungaelenganya ukuti imiyele ii itaipa. Nomba ndi cakuti tutaombiilepo zuwa ukuta ukuya ni miyele ii, ingatandika ukukula nupya ingalenga tuye ni ntazi.—Yako. 1:14, 15.

11. I micenjelo ci imwi ino tulinzile ukutaalukako, nupya u mulandu ci?

¹¹ Umucenjelo onga uno tulinzile ukutalukako aacuza aipe. Lekini tulangilile. Tuti limwi mukaomba na umwi aasi Nte Yakwe Yeova. Nupya mukalonda umuntu wiyo ukulaelenganya ivisuma pali ya Nte Yakwe Yeova, fwandi mukalanga icikuuku nu kwazwa yauze. Insita zimwi mukaliila pamwi nawe pa nsita ya kupuuza. Lino papita sile insita inono mwatandika ukuliila pamwi lyonsi. Insita zimwi nga mukulanzyanya nu muntu wiyo akalanda iviipe vino musitemwa. Lino papita insita imuyelezya ukuvwa vivyo nupya imuta ukusoka. Nupya wanda umwi umuntu wiyo wamunena ukuti nga mwinuka muye nawe kumwi mukalyeko utwakulya nupya mwazumila. Lino papita insita, imuzana ukuti mukazumilizya umuntu wiyo pali vimwi vino akaelenganya. Nupya patanga palengele mungatandika ukucita ivintu wakwe vino umuntu wiyo akacita. Ukuya kwene tukaya ni cikuuku nu mucinzi uku yantu yonsi, nomba tulinzile ukwiusya ukuti tungatandika ukuya wakwe aliyo ndi cakuti tukuzanwa sana pamwi nayo. (1 Kol. 15:33) Ndi cakuti tuli acenjele wakwe vino Yesu watunenyile ukucita, tutalazanwa sana na antu aasicita ivintu wakwe vino Yeova akalonda twacita. (2 Kol. 6:15) Tulalola uzanzo uwayamo nu kutaaluka uku kucita vivyo.

MWAOMVYA NINGO INSITA

12. I vyani vino asambi yakwe Yesu yali nu kucita lino yakuloleela impela ya nsi?

¹² Asambi yakwe Yesu yataali nu kwikala sile lino yakuloleela impela ya nsi. Yesu wayapeezile umulimo wa kuomba. Wayanenyile ukulasimikila ilyasi lisuma “umu Yelusalemu, mu Yudeya monsi nu mu Samaliya alino nu kufika kuno insi yapela.” (Mili. 1:6-8) Umulimo uu wali uukulu sana. Yali nu kulaomvya ningo insita yao ndi cakuti yakwezya sana na maka ukusimikila yauze.

13. U mulandu ci uno tulinzile ukulaomvezya ningo insita? (Kolose 4:5)

¹³ Belengini Kolose 4:5. Pakuti tuye acenjele tulinzile ukwelenganya sana pali vino tukaomvya insita itu. Ivintu ivyaula ukwenekela vingatucitikila swensi. (Kasa. 9:11) Tungafwa ukwaula ukwenekela.

14-15. Tungacita uli pakuti twaomvya ningo insita? (Aebele 6:11, 12) (Loliniko ni cikope.)

¹⁴ Tungaomvya ningo insita nga tukucita ukulonda kwakwe Yeova nu kukomya ucuza witu na aliwe. (Yoa. 14:21) Tulinzile ukuya “akome, aasitenta, aakaombesya lyonsi umu mulimo wa Mwene.” (1 Kol. 15:58) Lyene lino tulaya umupiipi nu kufwa nanti lino impela iliza tutalalanguluka ukuti fwandi nga twaombiile sana Yeova.—Mate. 24:13; Loma 14:8.

¹⁵ Ndakai, Yesu watwalilila ukutungulula asambi yakwe lino yakuomba umulimo wa kusimikila pa Wene Wakwe Leza umu nsi yonsi. Wafikilizya ulayo wakwe. Yesu akaomvya iuvi lyakwe Yeova uku kutusambilizya ivya kusimikila nu kutupeela vyonsi vino tukalondekwa pa kuomba ningo umulimo uu. (Mate. 28:18-20) Tukacita vino Yesu akalonda nga tukuombesya umu mulimo wa kusimikila nu kusambilizya antu nu kuya apempule lino tukuloleela ukuti Yeova akalete impela. Nga tukulondela ukusunda ukwaya pa Aebele 6:11, 12, tulatwalilila ukuya nu upaalilo “ukufika nu ku mpela.”—Belengini.

16. I vyani vino tukulondesya ukucita?

¹⁶ Yeova watantika uwanda ni nsita lino alonona insi ii yakwe Satana. Lino uwanda uwo ulafika, Yeova alafikilizya mausesemo yonsi aaya umwi Izwi lyakwe. Nomba insita zimwi tungaelenganya ukuti impela yatilengela ukwiza. Lelo uwanda wakwe Yeova “ulafikiliziwa ukwaula kucelwa.” (Haba. 2:3) Fwandi lekini twalondesya ukutwalilila ukuya apempule kuli Yeova nu kulanga ukuti tukaloleela Leza katuula witu.—Mika 7:7.