Yailoliile Vino Amu Cilongano Yayatemilwe

YA YOMARA na atowao yaili alumendo, ya Marcelo na ya Hiver yakaikala umu ka muzi kanono umu Guatemala. Ya Yomara yatandike ukusambilila na ya Nte Yakwe Yeova nupya lino papisile insita atowao nayo yatandike ukusambilila. Nomba kwaliko intazi imwi. Yonsi yotatu i mpafu nupya yataminyile ukubelenga ivilembo vya mpafu. Fwandi uwayasambilizyanga Baibo wayabelengelanga mapalaglafu na malembo lino yakusambilila.

Nupya cayatalinga ukuzanwa umu kulongana. Yataali nu kulakwanisya ukupita pa mamineti 40 ukuya uku Ng’anda ya Wene iyayelile umupipi. Nomba aina umu cilongano yapekanyizye ukuti yayasenda nu kuyatwala umu kulongana lyonsi. Nupya lino yonsi yotatu yatandike ukulanda malyasi ya mwi sukulu pa kulongana kwa mukasi ka mulungu aina yayazwangako ukusungila malyasi yano yakwatanga.

Umu Mei 2019, yatandike ukulonganila umu muzi umumwao. Pa nsita iya ala umu muzi umumwao mwaya ya painiya ya nsita yonsi atwalane. Yatamanyile ukulemba nu kubelenga ivilembo vya mpafu, nomba yalondesyanga ukusambilizya asambi yao impafu ivya kubelenga nu kulemba. Fwandi yaile muno yakasungila mabuku nupya yaile iyatola mabuku aakasambilizya ivya kusambilizya yauze ukubelenga ivilembo vya mpafu.

Lino papisile imyezi inono yonsi yotatu yamanyile ningo ivya kubelenga ivilembo vya mpafu na cico calenzile yalunduluke muli ukapepa. Ndakai ya Yomara, ya Marcelo, na ya Hiver aapainiya ya nsita yonsi. Ya Marcelo aaomvi aakatumikila. Yaya aapamviwe ukuombela Yeova cila mulungu. Vino yacincila ukuombela Yeova yakakomelezya na yauze ukuya acincile.

Yonsi yotatu yakataizya sana pali vino icilongano cikayazwa. Ya Yomara yatiile: “Ukufuma sile lino twaloliine na ya Nte Yakwe Yeova, yakatulanga ukutemwa kwa Ina Klistu ya cumi.” Ya Marcelo nayo yatiile: “Twakwata ya cuza asuma sana umu cilongano nupya twaya umu lupwa lwa ina na ya nkazi umu nsi yonsi aatemwana.” Ya Yomara na atowao yakaloleela insita ino yalalola vino Yeova alasenula insi ukuya Paladaise.—Masa. 37:10, 11; Eza. 35:5.