Uzye caya sile ningo ukupingula pa vintu ukulingana na vino tukuyuvwa?
Vino Antu Aingi Yakalola Ukuti: Ivingayazwa Ukupingula pa Vintu
Antu aingi yazumila ukuti kwaya ivicitwa visuma ni iviipe. Wakwe aingi yapata, kukoma, kulala nu muntu pa maka, alino nu kulala na ana anono, nupya aingi yatemwa umulinganya, cikuuku, nupya yakalonda ukuyuvwikisya. Nomba nga pa vintu vyuze wakwe wino yalinzile ukulala nawe, ukulanda cisinka, nanti vino yalinzile ukukuzya ana? Antu aingi yakaelenganya ukuti vyonsi vino umuntu angasoololapo ukucita ale vili sile ningo. Insita izingi antu yakapingula pa vintu ukulingana na vino yakuyuvwa alino na vino antu yauze yakuyuvwa. Nomba uzye ukucita vii kwaya sile ningo?
UZYE TULINZILE UKUPINGULA PA VINTU UKULINGANA NA VINO TUKAYUVWA?
Insita izingi tukapingula pa vintu ukulingana na vino tukayuvwa, nanti vino kampingu witu akutunena. (Loma 2:14, 15) Nanti sile ana anono yakamanya ndi cakuti vimwi visi ningo nanti ndi cakuti iyaluvyanya. Lino tukuya tukukula kampingu witu akaya ukulingana na vino tukasambilila kuli ya lupwa, uku anji, ya mwalimu, umu muzi, uku vilongano vya mapepo, alino na vino ivintu vyaya kuno tukaikala. Ndi cakuti twapingula pa vintu kampingu akatunena ndi cakuti vino itucita vikuvwana na vino twasambilila ukuti ali visuma nanti iviipe.
Vino twasambilizya kampingu witu vingalenga twauvwikisya antu yauze, twataizya, twaya nu mulinganya, alino nu kuya nu luse. Nupya vingalenga twataluka uku kucita ivintu ivingalenga tusosye antu yano twikako mano nanti ivingalenga tuzewane, nanti ukutandika ukuyuvwa amulandu.
Uzye caya sile ningo lyonsi ukupingula pa vintu ukulingana na vino tukuyuvwa? Umulumendo uwa cance Garrick, walondolwile vino vyamucitikile. watiile, “nacitanga ivintu ukulingana avino nkulonda.” Nomba, wizile alola ukuti ivyafumilemo vitazifile. Vino walanzile vyalangilile ukuti watiile ukuya ni nsansa, walanzile ati: “Nacitanga ivintu iviipe sana, ukuomvya imilembo ikavulunganya uwongo, ucakolwa, alino nu unkalwe.”
UZYE TULINZILE UKUPINGULA PA VINTU UKULINGANA NA VINO ANTU YAUZE YAKAYUVWA
Ukulunda pali vino tukayuvwa, tukapingula pa vintu ukulingana na vino antu yauze yamalola vino tumapingulapo. Nupya ukumanya ivyayacitikila alino na vino yamanya kungatwazwa. Ya lupwa, ivyuza, alino na antu yano tukaikala nayo yangatucindika ndi cakuti tukupingula pa vintu ukulingana na vino yakalola ukuti ali visuma.
Uzye caya sile ningo lyonsi ukupingula pa vintu ukulingana na vino antu yakuyuvwa? Umukazyana uwacance Priscila, wacitanga vino auze yacitanga nupya watandike ukucita uzelele. Nomba wizile alola ukuti ukucita vino yauze yalolanga ukuti ali visuma kutalenzile aye ni nsansa. Watiile: “ukucita vino anji yacitanga kutalenzile vintu ukuya ningo. Lelo kwalenzile nacita ivintu viipe nupya ivyali nu kundetelela.”
UZYE KWAYA CUZE ICINGATWAZWA UKUPINGULA NINGO PA VINTU?
Lino tukulonda ukupingula pa vintu, ukwelenganya pali vino tukuyuvwa na vino antu yauze yangayuvwa kwacindama. Nomba ukucita sile vikwene kutanga kulenge ivintu vituzipile. Insita zimwi vino twapingulapo vingalenga ivintu vitwipile alino nu kwipila yauze. (Mapinda 14:12) Nupya vino tukalola ukuti vili sile ningo vingasenuka nupya vingalenga ivintu ukutwipila. Pano ndakai ivintu vino antu yalolanga ukuti vitaya ningo yatandika ukuvilola ukuti vili sile ningo, lyene vino yalolanga ukuti vyaya sile ningo yatandika ukuvilola ukuti vitaya ningo.
Uzye caya sile ningo ukupingula pa vintu ukulingana na vino antu yauze yakalola ivintu?
Uzye kwaya icingatwazwa ukumanya ningo icisuma ni ciipe? Uzye kwaya ivyakulondela vino tungataila ukuti vitalalenga ivintu ukutwipila uku nkoleelo?
Kwaya ivyeo ivisisenuka nupya vino tungataila ivingazwa umuntu aliwensi asi mulandu na kuno akaikala. Icipande icalondelelapo cikulanda pali kuno tungazana ivingatwazwa ukupingulapo ningo pa vintu.