Mwaleka Kutemwa Kwamulenga Ukutwalilila Ukusimikila.

1. I vyani vino twasambilile pa kukomaana kwa pa mwaka kwa mu 2023?

PA KUKOMAANA kwa pa mwaka ukwaliko umu 2023,a twapokelile ulondozi upya pa cumi icaya umu malembo, kwali ni cakumanyisya icisuma icalandanga pa mulimo wa kusimikila. Wakwe, twasambilile ukuti antu yamwi limwi yalakwata isyuko ilyakuya pamwi na antu yakwe Yeova pacisila cakuti Babiloni Mukalamba ononwa. Nupya twasambilile ukuti ukutandika umu Novemba 2023 yakasimikila yatalondekwanga ukulemba vimwi vino yalembanga pa cisila ca kuomba umulimo wa kusimikila. Uzye ukusenuka kuu kukalangilila ukuti umulimo uu utapamvizye wakwe vino wali pa kutandika? Awe.

2. Umulandu ci uno umulimo witu ukapamvizyako cila wanda? (Mako 13:10)

² Cila wanda umulimo wa kusimikila ukapamvizyako. U mulandu cii? Apa mulandu wakuti insita iyatisyalako yaticepa. Elenganyini pali vino Yesu walanzile pali vino umulimo wa kusimikila wali nu kuya umu manda akusyalikizya. (Belengini Mako 13:10.) Ukulingana na ni buku lyakwe Mateo, Yesu walanzile ukuti ilyasi lisuma lyali nu kusimikilwa umu nsi yonsi lino “impela” itatala iza. (Mate. 24:14) Kuli kuti impela ya nsi yii ipe ikatungululwa na Satana. Yeova watantika u “wanda . . . ni nsita” lino ivintu vii vilacitika nupya vyasya vicitike likwene. (Mate. 24:36; 25:13; Mili. 1:7) Cila wanda tukapalamila ukumpela ya nsi yii. (Loma 13:11) Fwandi tulinzile ukutwalilila ukusimikila suka impela ice iize.

3. Umulandu ci uno tukasimikilila ilyasi lisuma?

³ Swensi kwene tulinzile ukuyuzya iuzyo lii ilicindame ilyakuti: Umulandu ci uno tukasimikilila ilyasi lisuma? Apa mulandu nu kutemwa. Nga tukuomba umulimo wakusimikila tukalangilila ukuti twatemwa ilyasi lisuma na antu, alino ni cicindamisye icakuti tukalanga ukuti twatemwa Yeova ni zina lyakwe. Lekini tusambilile pa vintu vii conga na conga.

TUKASIMIKILA PA MULANDU WAKUTI TWATEMWA ILYASI LISUMA

4. Uzye muvwile uli lino muvwile ilyasi lisuma pa muku wakutandikilapo?

⁴ Elenganyini pali vino mwayuvwile lino vimwi visuma vyacitike umu umi winu. Limwi yamwi umu lupwa yakweti umwana nanti limwi yamwi yamupezile incito ino mwalondesyanga. Mufwile mwalondesyanga ukunenako ya lupwa na ya cuza inu pi lyasi lilyo ilisuma. Ukwaula nu kutwisika vikwene avino cali lino muvwile ilyasi lisuma ilyacila malyasi yonsi, kuli kuti ilyasi lisuma likalanda pa wene wakwe Leza?

5. Uzye muvwile uli lino mwasambilile icumi icaya muli Baibo pa muku wakutandikilapo? (Loliniko ni vikope.)

⁵ Elenganyini pali vino muvwile lino mwasambilile icumi icaya muli Baibo pa muku wakutandikilapo. Mwizile imumanya ukuti tata winu uwa kwiyulu wamutemwa, akalonda ukuti muye pa antu yakwe akamupepa, yano walaya ukuti alasisyapo ukucula nu kuwaika, Nupya wamupela nu upalilo uwakuti mulalola atemwikwa inu afwa umu nsi ipya, alino ni vintu na vyuze vino wamulaya. (Mako 10:​29, 30; Yoa. 5:​28, 29; Loma 8:​38, 39; Kuso. 21:​3, 4) Ukumanya icumi cii kwalenzile muye sana ni nsansa. (Luka 24:32) Mwatemilwe vino mwasambililanga nupya mwanenangako na yauze pa cumi cino mwasambililanga!—Loliniko na Yelemiya 20:9.

6. I vyani vino mwasambilila kuli vino vyacitikile ya Ernest na ya Rose?

⁶ Elenganyini pali vino vyacitikile umwina Ernestb. Lino wali mupipi ni myaka 10 ya isi yafwile. Watiile: “Nuzyanga ukuti: ‘Uzye iyaya ukwi iyulu? Nanti uzye iyafwa icisila?’ Nakumbwanga nga nalola anji yakweti ya isi.” Insita izingi ya Ernest yayanga uku malindi, ngayafika yafukamanga api lindi lyakwe ya isi, iyapepa iyati: “Leza napapata nkulonda ukumanya kuno yatata yaya.” Lino papisile imyaka 17 ukufuma pano ya isi yafwilile, ya Ernest yatandike ukusambilila Baibo. Lino yasambilile ukuti afwe yasimanya nanti acimwi, yakaya sile kwati yakasula, nu kuti Leza walaya ukuti kulaya ukutuutuluka, yuvwile ningo sana. (Kasa. 9:​5, 10; Mili. 24:15) Izile yamanya ivyasuko uku mauzyo yano yalondanga ukumanya pa nsita itali. Lino ya Ernest yatandike ukusambilila Baibo yali sana ni nsansa. Aci ya Rose, nayo kwene yatandike ukusambilila Baibo nupya yatemilwe vino yasambililanga. Mu 1978 yabatiziwe. Yalondesyanga ukunenako ya lupwa, ivyuza alino na yonsi angatemwa ukuvwa pali vino yasambililanga. Cii calenga ya Ernest na ya Rose yazwe antu ukucila pali 70 ukubatiziwa.

7. I cani icilacitika ndi cakuti twatemwa sana icumi? (Luka 6:45)

⁷ Ndi cakuti twatemwa icumi ca muli Baibo tulalondesya ukunenako na yauze. (Belengini Luka 6:45.) Tukayuvwa wakwe vino atumwa yakwe Yesu yayuvwanga, yatiile: “tutanga tute ukulanda pa vintu vino twalola nu kuvwa.” (Mili. 4:20) Twatemwa sana icumi nupya cii calenga twaombesya umu mulimo wa kusimikila.

TUKASIMIKILA PA MULANDU WAKUTI TWATEMWA ANTU

8. I cani icikatwazwa ukusimikila ilyasi ilisuma kuli yauze? (Lolini kambokosi kakuti ““Mwatemwa Antu—Mwapanga Asambi.”) (Loliniko ni cikope.)

⁸ Twatemwa antu wakwe vivi kwene vino Yeova na Yesu yayatemwa. (Mapi. 8:31; Yoa. 3:16) Tukauvwila uluse antu atamanya Leza nupya atakwata “Upaalilo.” (Efes. 2:12) Intazi zino yakwata zyalenga yauvwa kwati yali umu ciwina, swemo twakwata intambo iya kuyazwa ukufuma umu ciwina, kuli kuti ilyasi lisuma ilikalanda pa Wene Wakwe Leza. Ndi cakuti tuli nu kutemwa nu luse uku antu yaa tulaombesya ukuyazwa ukuvwikisya icumi. Ilyasi lisuma lino tukayasimikila likalenga yaye ni nsansa, umi usuma ndakai alino ukunkoleelo yalakwata “umi wa cumi cumi” amanda pe umu insi ipya.—1 Tim. 6:19.

9. I vyani vino tukalanda ukuti ivilacitika ukunkoleelo nupya umulandu cii? (Ezekelo 33:​7, 8)

⁹ Ukutemwa ukukalenga twanena antu ukuti impeela ya insi yatipalama. (Belengini Ezekelo 33:​7, 8.) Tukauvwila uluse aina mupalamano itu na ya lupwa asiombela Yeova. Aingi yatamanya ivili nu kucitika ukunkoleelo kuli kuti “ucuzi ukalamba utatala wayako ukufuma pa kutandika kwa nsi ukufika na ndakai nupya utalatala uyeko.” (Mate. 24:21) Tukalonda ukumanya ivilacitika lino kulaya upinguzi kuli kuti lino imipepele yaufi ilafumiziwapo alino nu kononwa kwa nsi ii iipe, apa nkondo ya Amagedoni. (Kuso. 16:​14, 16; 17:​16, 17; 19:​11, 19, 20) Tukapepa kuli Yeova ukuti ayaazwe ukuvwa ukucelula kuu alino nu kutandika ukumuombela. Nomba ivyani ivilacitika kuli yano yasiuvwa ukwi lyasi ilisuma ukwikako sile na ya lupwa itu?

10. Umulandu cii uno icicindamila ukulaombesya umulimo wa kusimikila?

¹⁰ Wakwe vino tulasambilila umu cipande icati cilondelilepo limwi Yeova alapususya antu ala lapila apa cisila cakuti Babiloni mukalamba ononwa. Fwandi tulinzile ukulaombesya umu mulimo wa kusimikila. Vino tukayasambilizya ndakai limwi vingaca viyazwe apa nsita iya. (Loliniko na Ezekelo 33:33.) Pa nsita iya limwi yaliusya vino tukayanena nupya yalalondesya ukwiza umukupepa kwa cumi lino insita itatala yasila. Wakwe vino cali uku mulinzi wa afungwa uwasenwike lino “kwacitiike icilundumusi cikalamba,” limwi yamwi asilonda ukuvwa icumi ndakai yalasenuka pa cisila ca kononwa kwakwe Babiloni mukalamba.— Milimo 16:​25-34.

TUKASIMIKILA PANO TWATEMWA YEOVA

11. Tungacita uli pakuti tupeele Yeova ululumbi, umucinzi na maka? (Kusokolola 4:11) (Loliniko ni vikope.)

¹¹ Tukasimikila ilyasi lisuma pano twatemwa Yeova alino ni zina lyakwe ilya muzilo. Twamanya ukuti nga tukuomba umulimo wa kusimikila tukalanga ukuti twatemwa Yeova nupya tukamuzanzya. (Belengini Kusokolola 4:11.) Twasininkizya ukuti Yeova walinga ukupokelela ululumbi, umucinzi na maka ukufuma uku yaomvi yakwe. Tukamupeela ululumbi nu mucinzi nga tukwazwa antu ukusininkizya ukuti aliwe “waumvile ivintu vyonsi” nu kuti aliwe akatwazwa ukutwalilila ukuya nu umi. Tukamupeela amaka ndi cakuti tukuomvya insita, amaka alino ni vintu vino twakwata uku kutungilila umulimo wa kusimikila ukulingana na pano tungapezya. (Mate. 6:33; Luka 13:24; Kolo. 3:23) Tukalanda pali Leza pano twamutemwa. Nupya tukalondesya ukunena antu api zina lyakwe na vino likapiliula.

12. Uzye tukalenga uli izina lyakwe Yeova ukucindikwa lino tukuomba umulimo wa kusimikila?

¹² Ukutemwa Yeova kukalenga twacindika izina lyakwe. (Mate. 6:9) Tukalenga izina lyakwe Leza ukuya ilya muzilo lino tukunena antu ukuti vino Satana akalanda pali Leza ivya ufi. (Utan. 3:​1-5; Yobo 2:4; Yoa. 8:44) Lino tukuomba umulimo wa kusimikila tukaombesya ukunena antu akalonda ukuvwa icumi icikalanda pali Yeova. Tukalonda antu yonsi ukumanya ukuti Yeova waya sana nu kutemwa nupya akateeka umulungami nupya uwaya nu mulinganya, nupya uwene wakwe wasya usisyepo ukucula nu kulenga kuye umutende nu luzango. (Masa. 37:​10, 11, 29; 1 Yoa. 4:8) Ndi cakuti tukunena antu ivintu vii tukacindika izina lyakwe Leza. Twaya nu luzango pa mulandu wakuti vino tukacita vyalingana ni zina lyakuti ya Nte Yakwe Yeova. Umulandu cii uno twalandila vii?

13. Umulandu cii uno tukauvwila ningo ukwamwa api zina lino twapeelwa ilyakuti ya Nte Yakwe Yeova? (Ezaya 43:​10-12)

¹³ Yeova watusoolola ukuti tuye “yakambone.” yakwe (Belengini Ezaya 43:​10-12.) Imyaka imwi uku cisila kalata uwafumile ukwi Iumba Ilikatungulula watile: “Umucinzi sana ukwamwa ya Nte Yakwe Yeova.” Umulandu cii? Elenganyini ukuti yamupeela umulandu uno mutacisile lyene mukulonda uwa kumuvwangilako, umuntu wa musango cii uno mungasoolola? Ukwaula nu kutwisika mungasooolola umuntu umutailwe nupya uno yamanya ukuti uwa cisinka umu wikazi. Vikwene avino caya na kuli Yeova, watusoolola ukuya ya Nte wakwe pa mulandu wakuti watumanya ningo nupya wataila ukuti tungalenga izina lyakwe ukucindikwa. Tukauvwa ningo sana ukuya Inte zyakwe nupya cii cikalenga twanena antu api zina lyakwe nu kulenga yasininkizye ukuti vino satana akalanda pi zina lyakwe Leza ivya ufi. Nga tukucita vii ala tukucita ivintu ukulingana ni zina lino twapelwa kuli kuti ya Nte Yakwe Yeova.—Masa. 83:18; Loma 10:​13-15.

TULATWALILILA UKUSIMIKILA MPAKA NI MPELELEKEZYO YA NSI

14. I vyani i vyasya vicitike ivilalenga tuvwe ningo?

¹⁴ Tukauvwa ningo sana ukumanya ivyasya vicitike likwene sile. Ndi Yeova watwazwa tukwenekela ukuti antu aingi yamasambilila icumi lino ucuzi ukalamba utatala watandika. Tukauvwa ningo ukumanya ukuti na lino kulaya ucuzi ukalamba utatala wayako nupya utalatala uyeko antu limwi yaliza umu lupwa lwakwe Yeova nu kutandika ukumuombela.—Mili. 13:48.

15-16. I vyani vino tulatwalilila ukucita nupya ukufika lilaci?

¹⁵ Kuli vimwi vino tulinzile ukucita. Twakwata umulimo wa kusimikila ilyasi ilisuma umu nsi yonsi uno tutalatala tuombe nupya. Nupya tulinzile ukutwalilila ukunena antu pali vino vyasya vicitike likwene. Antu yalinzile ukumanya ukuti impelelekezyo ya nsi ii ikuya ikupalama. Lino uwanda wa upinguzi ulafika antu yalamanya ukuti ilyasi lya lisuma lino twasimikilanga lyafumile kuli Yeova.—Ezek. 38:23.

¹⁶ Fwandi i vyani vino tulinzile ukucita? Lekini ukutemwa kuno twatemwa ilyasi lisuma na antu, alino na vino twatemwa Yeova ni zina lyakwe vya tulenga twaombesya, twaya ni nsansa nupya apamviwe mpaka Yeova akati, “casila!”