Ivingamwazwa Ndi Cakuti Mwakukila Uku Cilongano Cuze

Ya Nicolas na ya Celine yakweti intazi ipusaneko. Aa ku musambo wa ku France yayapeezile umulimo wa kuya umu kuombela uku cilongano cuze. Yalanzile ukuti: “Pa kutandika twatemilwe sana, lelo twizile itutandika ukuluuka ya cuza itu. Tutamanyine sana na aina na ya nkazi aali umu cilongano icipya muno twali.”a Pa mulandu wakuti citanguka, mungacita uli pakuti mutwalilile ukuya ni nsansa pa nsita ili imwi nu kutwalilila ukulaombesya ndi cakuti mwakukila uku cilongano cuze? I vyani vino yauze yangacita pakuti yamwazwe? Umu nzila ci muno mungakomelezyanya na yauze umu cilongano icipya?

IVISINTE 4 IVINGAMWAZWA UKUCIMVYA INTAZI

1. Mwataila Yeova. (Masa. 37:5) Ya Kazumi aku Japan, yasile icilongano cino yalimo pa myaka 20 pa mulandu wakuti ya iya yayatumile ukuya umu kuombela uku ncende yuze. Uzye yalesile uli ukuti Yeova ayatungulule? Yatiile: “Nanenyile Yeova vyonsi ivyansakamikanga. Vino nayuvwanga kuzukilwa na vino nuvwanga intete. Lyonsi lino napepa kuli aliwe, wampeelanga amaka yano nalondekwanga.”

Mungacita uli pakuti mutaile sana Yeova? Wakwe vino ivimelwa vikalondekwa amanzi alino nu muvundo ukufuma umwi ivu pakuti vimele ali vino nu utailo witu ukalondekwa amanzi nu muvundo ivya unkolanya pakuti ukome. Ya Nicolas yano itulandapo, yazanyile ukuti ukwelenganya pali vino Abulahamu, Yesu, na Paulo yaipeeliisye pakuti yacite ukulonda kwakwe Leza, kwalenzile yakomeleziwe nu kutaila ukuti nayo kwene Yeova wali nu kuyazwa. Ndi cakuti mukuisambilizya Baibo lyonsi, kwalamwazwa ukucimvya intazi zino mungakwata umi, nupya mulasambilila ivintu vino mungaomvya pa kukomelezyako yauze umu cilongano icipya.

2. Mutalinganya icilongano cino mwafumileko uku cilongano icipya. (Kasa. 7:10) Ya Jules yalondekwanga ukusenuka pakuti yalondela intambi izipya lino yafumile uku Benin nu kukukila uku United States. Yalanzile ukuti: “Nayuvwile ukuti nalondekwanga ukuilondolola uku muntu ali wensi wino nakomenkana nawe.” Pa mulandu wakuti intambi izyali umu mpanga ino yakuukileko zyapusine na kuno yafumile, calenzile yatandike ukuitalusya uku ina na ya nkazi. Lelo, pa cisila ca kumanya ningo aina na ya nkazi, yasenwike muli vino yayuvwanga. Yatiile: “Nizile niluka ukuti antu yonsi pano nsi yaya sile icili cimwi, asi mulandu na kuno yakaikala. Lelo ivyapusanako sile ivintu vino yakalanda nu kucita. Fwandi caya sile ningo ukuleka antu yacita vino yatemwa.” Fwandi mutalinganya icilongano cino mwafumileko uku cilongano icipya. Wakwe vino nkazi Anne-Lise, akaomba upainiya walanzile, ukuti: “Ntakuukile uku ncende yuze pakuti nkazane vino nasile, lelo nalondesyanga ukuzana ivintu ivipya.”

Na ya eluda yano kwene yatalinzile ukulalinganya icilongano cino mwafumileko uku cilongano icipya. Ndi cakuti mwazana aina yakacita ivintu inzila ipusaneko, ala cisikupiliula ukuti yakaluvyanya. Cingazipa ndi cakuti mwasambilila pal vino ivintu vyaya uku ncende iyo lino mutatala mwalandapo vino aina yakacita. (Kasa. 7:10) Mungasambilizya aina ukupitila muli vino mukucita ukucila ukuyapatikizya ukucita vino mukwelenganya.—2 Kol. 1:24.

3. Mwaya apamviwe umu cilongano icipya. (Filipi 1:27) Kukuka kukalondekwa insita na maka, lelo cacindama ukuzanwa umu kulongana lilyo kwene sile lino mwafika ndi cakuti mungakwanisya ukucita vivyo. Nupya ala lmwi amu cilongano icipya yatatala yamulolapo, uzye yangamwazwa uli? Ya Lucinda, akukile umu musumba ukalamba uku South Africa na ana yao yaili akazyana, yatiile: “Anji yankomelizye ukuti naombela pamwi ni cilongano, umu mulimo wa kusimikila alino nu kulaasukapo pa kulongana. Nupya twanenyile aina ukuti yangaomvya ing’anda itu ukukomanilapo ukuya umu mulimo.”

Ndi cakuti muli na “melenganyo ali yamwi nu mwenzo onga” lino mukuombela pamwi na ina na ya nkazi, kulamwazwa ukuya alemane. Ya Anne-Lise yayakomelizye kuli ya eluda ukutandika ukusimikila pamwi na yonsi mu cilongano. I vyani vyafumilemo? Yalanzile ukuti: “Nizile niluka ukuti ali nzila ingangazwa ukulayuvwa ukuti nani kwene nene uwa mu cilongano.” Ukwazwilizyako umu milimo wakwe, ukuzifya Ing’anda ya Wene nu kuisunga iya usaka, kungalangilila ukuti imutemwa icilongano icipya. Ndi cakuti mukuombela pamwi na amu cilongano, cilenga mulalazyanya ningo na ina na ya nkazi nupya mulayuvwa ukuti a lupwa lwinu.

4. Mwapanga ivyuza. (2 Kol. 6:​11-13) Ndi cakuti antu yamanya ukuti mwayasakamala, cikaanguka ukuya ivyuza na aliyo. Fwandi mwafika zuwa pa Ng’anda ya Wene lino ukulongana kutatala kwatandika nupya mutapita zuwa pakuti mwakwatako insita iya kulanzyanya. Mwaezya na maka ukumanya mazina yao. Ndi cakuti mukwiusya mazina ya antu nu kulanga ucuza lino mukulanda nayo, yalalondesya ukumumanya ningo nupya cilalenga mukwate ucuza usuma nayo.

Ukucila ukuya vino tutaya pakuti na aina na ya nkazi yatutemwe, tulinzile ukuleka aineco yatumanye ningo. Mungasambililako kuli vino ya Lucinda yacisile, yatiile, “Ndakai twakwata ya cuza aingi pa mulandu wakuti twaitandikileko ukulalanda nayo nupya twayamangako nu kku ng’anda itu.”

MWAPOKELELANA

Yamwi yakauvwa intete ukwingila umu Ng’anda ya Wene umuli antu yano yatamanya. Fwandi mungacita uli pakuti akwiza pa muku wa kutandikilapo yayuvwa ukuti imuyapokelela? Umutumwa Paulo watukomelizye ukuti “mwapokelelana, wakwe vino na Klistu wamupokelile.” (Loma 15:7) Ndi cakuti ya eluda yakukolanya Yesu, yangazwa antu ukuyuvwa ukuti iyayapokelela. (Lolini na kambokosi akakuti “Ivingamwa Nga Mwakukila Uku Ncende Yuze.”) Nomba, yonsi amu cilongano kumwi sile na acance, yangazwa aapya umu cilongano ukupanga ivyuza.

Umu kupokelela antu mwaya nu kuya na ukapekape alino nu kuyamako uku ng’anda. Wakwe nkazi umwi, wasenzile nkazi muze uwakukile uku ncende iya pakuti akamulange umu tauni nu kumulondelwela vino alinzile ukucita pa kukwela imyotoka alino na tuleni. Vii vino nkazi wacisile vyalenzile ukuti nkazi umupya aelezye pa ng’anda pano watandike ukwikala.

IVISUMA IVIKAFUMAMO

Lino makanta akukula, ikaifopola inkanda pa miku iingi ukufikila lino watandika ukupapuka. Wakwe makanta namwe kwene mulinzile ukuzuula amasakamika nanti ivintu vyuze ivingalenga mufilwe ukupapuka kwa unkolanya umulimo wakwe Yeova. Ya Nicolas na ya Céline, yatiile: “Ukukuka kukatusambilizya ivingi. Ukumanyana na antu yauze nu kuyelezya incende ipya kwatwazwile ukuya ni miyele na yuze.” Ya Jean-Charles yano itulandapo pa kutandika, yalanzile pali vino ukusenuka kwazwile ulupwa lwao ukuti: “Ukuya umu cilongano icipya kwazwile ana itu ukulunduluka nu kukomya ucuza wao na Yeova. Lino papisile sile imyezi inono, umwana witu umukazyana watandike ukulanda malyasi mu kulongana kwa mukasi ka mulungu nupya umwana witu umonsi wizile aya kasimikila aatatala wabatiziwa.”

Mungacita uli ndi cakuti kuli vimwi ivisikumizumilizya ukukuka, wakwe ukukukila uku ncende ukukalondekwa ya kasimikila? Ivyeo ivili umu cipande cii vingamwazwa ukumanya vino mungacita pakuti mulunduluke umu cilongano cinu kwene. Lino mukutwalilila ukutaila Yeova, mwaya apamviwe umu cilongano ukupitila umu kuombela pamwi na yauze umulimo wa kusimikila alino nu kupanga ivyuza nanti ukuya ucuza na ina na ya nkazi yano mwamanyana nayo mpiti. Uzye mungazwako apya umu cilongano, nanti ukwazwilizyako akulondekwa uwazwilizyo? Pa mulandu wakuti ukutemwa ali kuno kukamanyisya Aina Klistu ya cumi, ndi cakuti mukwazwa yauze mulapalama sana kuli Yeova. (Yoa. 13:35) Mungasininkizya ukuti “Leza watemwa malambo ya musango uuwo.”—Aeb. 13:16.

Asi mulandu ni ntazi, Aina Klistu yatwalilila ukuya ni nsansa ndi cakuti yakukila uku cilongano cuze, fwandi namwe kwene mungaya ni nsansa! Ya Anne-Lise yalanzile ukuti: “Ukucinja ivilongano kwangazwile ukuya sana na ukapekape.” Ndakai, ya Kazumi yazumila ukuti “ukucinja icilongano kungalenga uipakizye ivintu vino utelenginyenapo.” Ya Jules nayo yalanzile ukuti: “Ivyuza vino nakwata vikangazwa ukuyuvwa ukuti naya umu lupwa. Ndakai natemwa icilongano icipya cino nayamo nupya cingantalila sana ukufumamo.”