Mwaya Aiteyanye Ukucimvya Matunko

1-2. (a) I vyani vino Yesu wacelwile asambi yakwe? (b) U mulandu ci uno asambi yakwe Yesu yuutukile Yesu? (Loliniko ni cikope.)

“UMWENZO wene ukulonda nomba umwili iutonta.”a (Mate. 26:41b) Mazwi yaa yakalangilila ukuti, Yesu wamanya ukuti tutamalilika nu kuti tukaluvyanya. Lelo watucelwile nu kuti: Tutalinzile ukuitaila. Usiku pa wanda kwene uno Yesu walanzile mazwi yaa, asambi yakwe yalanzile ukuti yataali nu kumusya. (Mate. 26:35) Yalondanga ukucita icilungame. Lelo yatamanyile ukuti ivintu nga vyatala, cali nu kuyangukila sana ukufilwa ukucita icilungame. Acino Yesu wayacelwile ukuti: “Twalililini ukulola nu kupepa, pakuti mutingila umu wezyo.”—Mate. 26:41a.

² Ica ulanda, asambi yafizilwe ukucita vino Yesu wayanenyile. Uzye lino yalemile Yesu, asambi yakwe yatwalilile ukuya nawe nanti yapuusile pa mulandu ni ntete? Pa mulandu wakuti yatatwalilile ukuya alole, yacisile viivi kwene vino yalanzile ukuti yatanga yacite, yutwike Yesu nu kumusya.—Mate. 26:56.

3. (a) U mulandu ci uno tutalinzile ukuitaila ndi cakuti tukulonda ukutwalilila ukuya acisinka kuli Yeova? (b) I vyani vino tumasambilila umu cipande cii?

³ Tutalinzile ukulaelenganya ukuti lyonsi tungaya akome ukucita ivilungame. Ica cumi ukuti tusilonda ukucita icili consi icingasosya Yeova. Lelo tutamalilika nupya tungeziwa ukucita iciipe. (Loma 5:12; 7:​21-23) Ukwaula ukwenekela tungatunkwa ukucita iviipe. Pakuti tutwalilile ukuya acisinka kuli Yeova nu Mwana wakwe, tulinzile ukulondela vino Yesu watusambilizye ukuti tulinzile ukutaluka uku matunko angalenga tucite uluyembu. Icipande cii cingatwazwa ukucita vivyo. Ica nkoleelo, tumasambilila pa vintu vino tungatunkwa ukucita. Lyene tumalanda na pali vino tungacita pakuti tutaluke uku vintu kwene vii. Nu mu kusyalikizya, tumalanda na pali vino tungacita pakuti tutwalilile ukuya alole.

MWAILUKA IVINTU IVIKALENGA MUTUNKWE

4-5. U mulandu ci uno cacindamila ukukanacita imembu nanti sile izinono?

⁴ Ni membu izikaloleka izinono zingalenga ucuza witu na Yeova ukononeka. Nupya zingalenga tucite imembu izipisye.

⁵ Swensi kwene tungeziwa ukucita uluyembu. Lelo swensi twakwata muno twatonta, fwandi ivintu vimwi vingalenga tweziwe ukucita uluyembu ulwipisye. Wakwe, limwi umwi angalwisyanya nu wezyo wa kucita uzelele. Limwi umwi nawe angalwisyanya nu wezyo wa kucita ivicitwa iviipe, wakwe ukucinya ivya nzwalo nu kutamba ivya uzelele. Yamwi nayo yangalwisyanya ni miyele yakukanasoka zuwa, ukukanaya ni cilumba nanti ukukanatiina antu. Vikwene ali vino Yakobo walanzile ukuti, “umuntu wensi akaeziwa nga watunkwa nu kulemwa nu lunkumbwa lwakwe.”—Yako. 1:14.

6. A muli vyani muno tulinzile ukuya acisinka?

⁶ Uzye mwamanyako vimwi vino mukatunkwa ukucita zuwa? Citanga cizipe ukulaibepa ukuti swemo tutakwata utonte uli onsi nu kuti twakoma tutanga tuluvyanye. (1 Yoa. 1:8) Iusyini ukuti Paulo walanzile ukuti na yayo ‘aakatungululwa nu mupasi’ nayo kwene yangatunkwa ukucita iviipe ndi cakuti yatacenjile. (Gala. 6:1) Tulinzile ukuya acisinka kuli sweineco nu kumanya muno twatonta.—2 Kol. 13:5.

7. I vyani vino tulinzile ukumanya? Langililini.

⁷ Ndi cakuti twamanya ivintu ivikalenga twacita iviipe, i vyani vino tulinzile ukucita? Tulinzile ukuombesya ukucimvya matunko yayo. Katulangilile, pa nsita ino ivyalumbulwa muli Baibo vyacitikanga pa mpongolo ya musumba ali pano ilingi alwani ingililanga. Fwandi, ali mulandu uno alinzi yalindanga impongolo pakuti yacingilile umusumba. Vikwene ali vino naswe tulinzile ukucita, tulinzile ukumanya muno twatonta pakuti twacimvya amezyo akucita uluyembu.—1 Kol. 9:27.

VINO TUNGACITA PAKUTI TUTALUKE UKU KUCITA VIIPE

8-9. I vyani vino umulumendo uwalumbulwa muli Mapinda icipande 7 walinzile ukucita pakuti atacita uluyembu ulwipisye? (Mapinda 7:​8, 9, 13, 14, 21)

⁸ Uzye tungaicingilila uli uku kucita iviipe? Elenganyini pali vino tungasambililako uku mulumendo uwaula amano uwalumbulwa umu Mapinda icipande 7. Wacisile uzelele nu mwanaci cizelele. Icikomo 22 cikalanda ukuti umulumendo ‘walondelile’ mwanaci cizelele papo kwene. Lelo ivikomo ivyakutandikilapo vikalangilila ukuti kwali na vyuze vino wacisile lino atatala wacita uluyembu.

⁹ I vyani vino umulumendo wacisile lino atatala wacita uluyembu? Ica nkoleelo, ‘wapisile pa museo, nu kupalama uku masansa yakwe cizelele’ usiku. Lyene, watoozile ni nzila iyalungama uku ng’anda yakwe. (Belengini Mapinda 7:​8, 9.) Nupya, lino waweni umwanaci, atapisile inzila yuze. Lelo, wazumilizye umwanaci ukumutonsola nupya uvwilile vino wamunenyile pa mawila yautandano yano watuuzile, limwi apa mulandu wakuti umwanaci walondanga umulumendo elenganye ukuti aatali umuntu umwipe. (Belengini Mapinda 7:​13, 14, 21.) Ndi cakuti umulumendo akana ukucita ivintu vii vyonsi, nga wacimvizye uwezyo uwa kucita iviipe nupya nga tacisile uluyembu.

10. I vyani limwi vino umuntu ngacita ndakai ivingalenga aluvyanye wakwe vino cali ku mulumendo?

¹⁰ Ilyasi lii likalangilila ivingacitika na kuli kapepa wakwe Yeova ali wensi. Angacita uluyembu ulwipisye nupya pa cisila angelenganya ukuti ataamanyile ukuti angayembuka. Nanti limwi angalanda ukuti, “Ntamanyile ukuti vingacitika.” Nomba ndi cakuti welenganya pa vyacitike, angiluka ukuti wacisilepo vimwi ivitali ningo ivyalenzile ukuti ayembuke. Limwi ivyalenzile acite vii, apa mulandu ni vyuza iviipe, ukukanasoolola ningo ivyakuizanzya, kukanaomvya ningo intaneti nanti ukuzanwa uku ncende zino zitalinga ku Ina Klistu. Nanti limwi watiile ukupepa, kuisambilizya Baibo, kuta ukuzanwa umu kulongana, nanti kuta ukusimikila. Wakwe vino cali ku mulumendo uwalumbulwa umwi buku lya Mapinda, limwi icalenzile ukuti ayembuke a pa mulandu ni vintu vino wapingwilepo ukucita ivitali ningo.

11. I vyani vino tulinzile ukutalukako pakuti tutacita uluyembu?

¹¹ I vyani vino tukusambililako? Tutalinzile sile ukutaluka uku luyembu lelo tulinzile nu kutaluka uku vintu ivingalenga tucite uluyembu. Vikwene ali vino Solomoni walanzile pa cisila ca kulanda pa vyacitikile umulumendo alino nu mwanaci cizelele. Watucelwile pa mwanaci lino watiile: “Mutalulumba umu kulondela umwanaci wiyo.” (Mapi. 7:25) Nupya walanzile nu kuti: “Uwafuntuka ku mwanaci wa misango iyo, utaezya ukupalama ku mulyango wa ng’anda yakwe.” (Mapi. 5:​3, 8) Pakuti tuicingilile uku kucita uluyembu, tulinzile ukutaluka ku vintu ivingalenga tucite iviipe.b Nanti cakuti ukucita ivintu vimwi kutaipa uku Ina Klistu, tutalinzile ukuvicita ndi cakuti vingalenga tutunkwe ukucita iviipe.—Mate. 5:​29, 30.

12. I vyani vino Yobo wapingwilepo ukucita, nupya vino wapingwilepo vyamwazwile uli ukukanacita uluyembu? (Yobo 31:1)

¹² Pakuti tutaluke uku vintu vingalenga tuyembuke, tulinzile ukuya asipe lino tukupingulapo ivyakucita. Vikwene avino Yobo wacisile. Walanzile ukuti ‘wapangine mpiti na manso yakwe’ nu kukanakumbwa anaci yauze. (Belengini Yobo 31:1.) Vino wapingwilepo ukucita vyamwazwile ukukanacita ucende. Naswe kwene tungapingulapo ivingatwazwa ukukanacita uluyembu.

13. U mulandu ci uno tulinzile ukucingilila amelenganyo itu? (Loliniko ni vikope.)

¹³ Tulinzile nu kucingilila amelenganyo itu. (Kufu. 20:17) Yamwi yakaelenganya ukuti ukwelenganya pa viipe kwaya sile ningo, suka sile ndi cakuti ukucita ivintu vivyo. Lelo ciipa ukwelenganya vivyo. Ndi cakuti umuntu watwalilila ukwelenganya iviipe, cingalenga alondesya ukucita vivyo kwene vino akwelenganya. Ndi cakuti wacita vii, cingamutalila ukukanacita iviipe. Nanti ciye vivyo insita zimwi tungakwata amelenganyo aipe. Ndi cakuti caya vivyo lilyo kwene sile tulinzile ukuta ukwelenganya pa viipe nu kutandika ukwelenganya pa visuma. Ndi cakuti twacita vivyo, cilalenga tuicingilile uku melenganyo akulondesya ukucita uluyembu ulwipisye.—Filipi 4:8; Kolo. 3:2; Yako. 1:​13-15.

14. I vyani vyuze ivingatwazwa ukukanacita uluyembu?

¹⁴ I vyani na vyuze vino tulinzile ukutalukako pakuti tutacita uluyembu? Tulinzile ukusininkizya ukuti ndi cakuti tukuvwila masunde yakwe Yeova tulaipakizya ivisuma. Insita zimwi cingatutalila ukuya na melenganyo yano Yeova akalonda, lelo ndi cakuti twatwalilila ukulondesya ukucita vivyo tulaya ni nsansa.

15. Uzye ukwelenganya lyonsi pa kucita ivisuma kungatwazwa uli ukucimvya uwezyo uwa kucita iviipe?

¹⁵ Tulinzile ukulalondesya ukucita ivisuma. Ndi cakuti twasambilila ‘ukupata iviipe, nu kutemwa ivisuma,’ cilalenga twalondesya ukucita ivisuma nu kutaluka uku kucita ivingalenga tuyembuke. (Amo. 5:15) Nga tukwelenganya apa kucita ivisuma, cilatwazwa ukuya akome ndi cakuti twakomenkanya uwezyo uwakucita iviipe ungiza lino tusikwenekela.

16. Uzye ukuomba imilimo yakwe Leza kungatwazwa uli ukuicingilila uku kucita iviipe?

¹⁶ Tungacita uli pakuti twalondesya ukulacita ivisuma? Tulinzile ukulacita ivintu ivingalenga tukomye ucuza witu na Yeova. Nga tuli mu kulongana nanti umu mulimo wa kusimikila, ilingi tusitunkwa kucita iviipe lelo tukakomya ucuza witu na Yeova nupya tusielenganya pa kucita iviipe. (Mate. 28:​19, 20; Aeb. 10:​24, 25) Ndi cakuti tukubelenga nu kuisambilizya Izwi lyakwe Leza nu kwelenganya pali vino tukubelenga cilalenga tutwalilile ukutemwa ukucita ivisuma nu kupata iviipe. (Yoswa 1:8; Masa. 1:​2, 3; 119:​97, 101) Iusyini ukuti Yesu wanenyile asambi yakwe ukuti: “Twalililini . . . kupepa, pakuti mutingila umu wezyo.” (Mate. 26:41) Nga tukupepa kuli Yeova tukaleka atwazwa pakuti twacita ivintu ivikamuzanzya.—Yako. 4:8.

TWALILILINI UKUICINGILILA

17. Utonte ci uno Petulo walwisyanyanga nawe?

¹⁷ Tungakwanisya ukucimvya utonte wa kulondesya ukucita iviipe. Lelo tungatwalilila ukulwisyanya nu utonte umwi pa nsita itali. Elenganyini pa vyacitikile umutumwa Petulo. Pa mulandu wakuti watinyile antu, calenzile ukuti akane Yesu pa miku itatu. (Mate. 26:​69-75) Petulo wizile acimvya utonte uwa kutiina antu lino wasimikile pali Yesu umu cilye ca Sanihedilini. (Mili. 5:​27-29) Lino papisile imyaka imwi, wizile ata ukulila pamwi na Aina Klistu aatali Ayuda pa mulandu wakuti watiinanga pali vino Aina Klistu Ayuda yali nu kulanda pali aliwe. (Gala. 2:​11, 12) Utonte wa kutiina antu wawezile muli Petulo. Fwandi tungati utonte uno wakweti utasililikiile muli aliwe.

18. I vyani ivingacitika ku miyele imwi ino tukalola ukuti twacimvya?

¹⁸ Ivya musango naswe kwene vingatucitikila. Mu nzila ci? Imiyele ino twamanya ukuti twacimvya limwi ingawela nupya muli sweswe. Wakwe, umwina umwi walanzile ati: “Natiile ukutamba ivya uzelele pa myaka 10 nupya namanyile ukuti nacimvizye utonte uu. Fwandi icielezyo cii cafisime muli nene wa nyama iyatiifisama ikutundelela ukunzanza.” Lelo umwina wii atatoovwike. Wilwike ukuti walinzile ukulaombesya cila wanda pakuti acimvye utonte uu, nu kuti alatwalilila ukulwisyanya nu utonte uu umi wakwe onsi umu nsi yii iipe. Pa mulandu wakuti umuci na ya eluda amu cilongano yamwazwile, calenzile ukuti aombesya ukulacimvya uwezyo wa kutamba ivya uzelele.

19. Tungacimvya uli utonte uno twakwata?

¹⁹ Uzye tungacita uli pakuti utonte witu utaleka tucite iviipe? Tungacita vivyo ndi cakuti tukulondela vino Yesu wacelwile ukuti: “Twalililini ukuya aiteyanye.” Nanti sile lino mukulola ukuti mwemo yakome, mwatwalilila ukukanacita ivingalenga mucite iviipe. (1 Kol. 10:12) Mwatwalilila ukucita ivintu ivyalenzile mucimvye utonte. Pa Mapinda 28:14 pakati: “Wiyo akaopa Yawe insita zyonsi uwa longo.”—Mapi. 28:14; 2 Pet. 3:14.

IVISUMA IVIKACITIKA NDI CAKUTI TWATWALILILA UKUICINGILILA

20-21. (a) I visuma ci vino tulaipakizya ndi cakuti twatwalilila ukuicingilila uku vintu ivingalenga tuyembuke? (b) Ndi cakuti twaombesya ukuicingilila uku viipe, i vyani vino Yeova alatucitila? (2 Kolinto 4:7)

²⁰ Tungasininkizya ukuti pakuti tuicingilile uku vintu ivingalenga tucite uluyembu tulinzile ukuombesya. Nga twayembuka kukaya “ukuipakizya luyembu lwa pa nsita inono,” lelo ndi cakuti tukwikala ukulingana na vino Yeova akalonda tulaya sana ni nsansa. (Aeb. 11:25; Masa. 19:8) Pano ali vino Yeova watuumba ukuti twaikala ukulingana na vino akalonda. (Utan. 1:27) Nupya tulaipakizya ukuya na kampingu umusanguluke alino nu kuipakizya umi uwa manda pe uku nkoleelo.—1 Tim. 6:12; 2 Tim. 1:3; Yuda 20, 21.

²¹ Ica cumi ukuti “umwili iutonta.” Lelo cii cisipiliula ukuti pasi vino tungacita pa utonte witu. Yeova waiteyanya ukutupeela amaka yano tukalondekwa pakuti tucimvye. (Belengini 2 Kolinto 4:7.) Lelo, mulinzile ukumanya ukuti amaka acila maka ya yantu yakafuma kuli Leza. Lelo inkoleelo tulinzile ukwezya na maka ukukanacita ivingalenga tucite iviipe na maka itu. Lyene tungasininkizya ukuti Yeova alasuka mapepo itu nu kutupeela amaka ndi cakuti twamulenga. (1 Kol. 10:13) Ica cumi ukuti, Yeova nga akutwazwa tulatwalilila ukucimvya ivintu ivingalenga tuyembuke.