Vino Amu Cilongano Yakakolanya Vino Yeova Akalola Aakacita Imembu Izipisye

1. I vyani vino Yeova akalonda antu yonsi ukucita?

YEOVA waumvile antu nu untungwa uwa kuisoolwela ivyakucita. Mukaomvya untungwa uu lino mukupingula pa vintu. Lelo icintu icicindame sana cino mungapingulapo ukucita, u kuipeela kuli Yeova alino nu kulamupepa pamwi na ina na ya nkazi. Vikwene ali vino Yeova akalonda ukuti yonsi yacita. U mulandu ci? A pa mulandu wakuti watemwa antu nupya akalonda ukuti ivintu vyayazipila. Akalonda ukuti yaipakizya ucuza na aliwe alino nu kwikala amanda pe.—Malan. 30:​19, 20; Gala. 6:​7, 8.

2. Uzye Yeova akayuvwa uli pa yantu asilonda ukulapila? (1 Yoani 2:1)

² Nanti ciye vivyo, Yeova asipatikizya umuntu aliwensi ukuti amuombela. Lelo cila muntu alinzile ukuisoolwela vino alinzile ukucita. Nga ndi cakuti Umwina Klistu umubatiziwe watama isunde lyakwe Leza, nu kucita uluyembu ulwipisye? Ndi cakuti atalapiile, alinzile ukufumiziwa umu cilongano. (1 Kol. 5:13) Nanti ciye vivyo, Yeova akalonda sana ukuti umuntu wiyo alapile nu kuya cuza wakwe nupya. Nupya u kwene ali mulandu uno Yeova wapeezile ilambo pakuti aelela imembu zya yantu aakalapila. (Belengini 1 Yoani 2:1.) Yeova a Leza uwaya nu kutemwa nupya akakomelezya yayo aakacita imembu zipisye ukuti yalapile.—Zaka. 1:3; Loma 2:4; Yako. 4:8.

3. I vyani vino tumasambilila umu cipande cii?

³ Yeova watunena vino akayuvwa pa luyembu na pali yayo aakacita imembu izipisye, nupya akalonda ukuti naswe kwene twamukolanya. Umu cipande cii tumasambilila vino tungacita vivyo. Lino mukubelenga icipande cii, mulole (1) vino amu cilongano ca mu Kolinto yacisile lino umwi wacisile uluyembu ulwipisye, (2) vino umutumwa Paulo wanenyile amu cilongano ukucita lino uwacisile uluyembu ulwipisye walapiile, na (3) vino ilyasi lii ilya muli Baibo likalanga vino Yeova akayuvwa pa Mwina Klistu uwatacita uluyembu ulwipisye.

VINO AMU CILONGANO YACISILE LINO UMWI WACISILE ULUYEMBU ULWIPISYE

4. I vyani ivyacitike umu cilongano ca mu Kolinto? (1 Kolinto 5:​1, 2)

⁴ Belengini 1 Kolinto 5:​1, 2. Lino umutumwa Paulo wali pa lwendo lwakwe citatu ulwa umisyonali, uvwile pa viipe ivyacitike umu cilongano icipya icapanzilwe umu Kolinto. Umwina umu cilongano wacitanga uzelele nu muci wakwe isi. Imiyele iya musango uu ‘itazanikwanga nu ku antu ya mu nko’! Amu cilongano yalolanga sile ukuti cali sile ningo uku mwina uwacitanga vii ukutwalilila ukuya umu cilongano. Yamwi yafwile yelenganyanga ukuti ukucita vii kwalangililanga vino Leza waya nu uluse na vino akauvwikisya antunze aatamalilika. Lelo Yeova asilonda antu yakwe yacita iviipe. Ukuya ni miyele yii kwali nu kulenga antu yalanda iviipe pa cilongano cakwe Yeova. Nupya umonsi wiya nga walenzile ukuti na ina Klistu yauze yacita ivili vimwi. Fwandi i vyani vino Paulo wanenyile amu cilongano ukucita?

5. I vyani vino Paulo wanenyile amu cilongano ukulacita, nupya walozizye mwi? (1 Kolinto 5:13) (Loliniko ni cikope.)

⁵ Belengini 1 Kolinto 5:13. Yeova walenzile umutumwa Paulo ukulemba kalata uku amu cilongano ukuti umuntu asilonda ukulapila alinzile ukufumiziwa umu cilongano. Uzye amu cilongano yali nu kulalola uli umuntu wiyo? Paulo wayanenyile ukuti “mute ukuvwana” nu muntu wiyo. Uzye walozizye mwi? Paulo walondolwile ukuti “mutalya pamwi nu muntu wa musango uwo.” (1 Kol. 5:11) Ukuliila pamwi na umwi kungalenga ukuti mutandike ukulanzyanya na aliwe. Fwandi Paulo walozizye mukuti, amu cilongano yatalinzile ukulaizizya pamwi nu muntu wiyo. Vii vyali nu kulenga amu cilongano ukucingililwa nu kukanalola ukuti vino wacitanga vyali sile ningo. (1 Kol. 5:​5-7) Nupya, ukukanaizizya pamwi nu muntu wiyo limwi kwali nu kulenga ukuti ailuke ukuti wasosizye Yeova, ukuvwa uyi pali vino wacisile alino nu kulapila.

6. I vyani vino amu cilongano yacisile lino yapokelile kalata yakwe Paulo, nupya i vyani vino umonsi uwacisile uluyembu ulwipisye wacisile?

⁶ Pa cisila ca kulembela Aina Klistu amu Kolinto kalata, Paulo watandike ukwelenganya pali vino amu cilongano yali nu kuyuvwa pali vino wayalembiile. Lino papisile insita, Tito wanenyile Paulo vimwi ivyalenzile ukuti Paulo aye ni nsansa. Amu cilongano yuvwile ningo pali kalata yakwe Paulo. (2 Kol. 7:​6, 7) Yalondiile vino wayanenyile. Nupya papisile sile imyezi inono ukufuma pano Paulo wayatumile kalata, umonsi uwacisile uluyembu ulwipisye walapiile. Wasenwike muli vino wacitanga nupya watandike ukulondela masunde yakwe Yeova alungame. (2 Kol. 7:​8-11) I vyani lyene vino Paulo wanenyile amu cilongano ukucita?

VINO AMU CILONGANO YALI NU KULALOLA UWACISILE ULUYEMBU ULWIPISYE NDI CAKUTI WALAPILA

7. I vyani vino umonsi wacisile pa cisila ca kumufumya umu cilongano? (2 Kolinto 2:​5-8)

⁷ Belengini 2 Kolinto 2:​5-8. Paulo walanzile ukuti “ukukalipila kuno antu aingi yaakalipile umuntu wiyo [kwalinzile].” Umu mazwi yauze tungati, vino yamusunzile vyamwazwile. U mu nzila ci? Vyalenzile ukuti alapile.—Aeb. 12:11.

8. I vyani vyuze vino Paulo wanenyile amu cilongano ukucita?

⁸ Pa mulandu wakuti umonsi walapiile, Paulo wanenyile ya eluda ukuti yamuwezye umu cilongano nupya wayanenyile ukuti: Yalinzile ‘ukwelela nu kuteekezya’ umwina uwayembwike alino nu ‘kumulanga ukutemwa.’ Paulo walondanga amu cilongano ukulanga ukuti yamwelezile nu kuti yamutemilwe ukupitila muli vino yalandanga nu kucita. Ukucita vii, kwali nu kulenga umonsi wiya ukuyuvwa ukuti yamupokelile nu kuti yatemilwe ukuti wawezile umu cilongano.

9. U mulandu ci uno yamwi cayatalile ukwelela umwina uwalapiile?

⁹ Amu cilongano yamwi cifwile cayatalile ukulanga icikuuku uku muntu uwalapiile. U mulandu ci uno twalandila vivyo? Pano vino wacisile vifwile vyaletiile amu cilongano yamwi intazi nupya yamwi yafwile yasosile sana pali vino wacisile. Amu cilongano yaombisye sana pakuti yalondela masunde yakwe Yeova. Fwandi yamwi yalolanga ukuti citali ningo ukuwezya umonsi wiya uwacisile imembu izipisye umu cilongano. (Loliniko na Luka 15:​28-30.) Nomba u mulandu ci uno cacindamile ukulanga ukutemwa uku monsi wiya uwalapiile?

10-11. I vyani ivyali nu kucitika ndi cakuti ya eluda iyakana ukwelela umwina uwalapiile?

¹⁰ Elenganyini ivyali nu kucitika ndi cakuti ya eluda yakanyile ukuwezya umonsi wiya umu cilongano nanti awela alino amu cilongano iyafilwa ukumwelela nu kumulanga ukutemwa. Nga wali sana nu ulanda nupya nga watoovwike. Nga wayuvwile ukuti atalatala aombelepo Yeova nupya. Nupya nga watiile nu kwezya ukuzifya ucuza wakwe na Leza.

¹¹ I vyani na vyuze ivyali nu kucitika ndi cakuti aina na ya nkazi iyakana ukwelela umwina uwalapiile? Ucuza wao na Yeova wali nu kuya umu uzanzo. U mulandu ci? Pano yataali nu kukolanya Yeova aakaelela, lelo yali nu kulakolanya Satana asilonda ukwelela. Ukucita vivyo kwali nu kulenga Satana ayaomvye ukutoovola umonsi wiya icakuti afilwe nu kutwalilila ukuombela Yeova.—2 Kol. 2:​10, 11; Efes. 4:27.

12. Uzye amu cilongano yali nu kukolanya uli Yeova?

¹² Uzye lyene amu cilongano ca mu Kolinto yali nu kukolanya uli Yeova ukucila ukukolanya Satana? Yali nu kucita vivyo ndi cakuti yatandika ukulola umuntu uwalapila wakwe vino Yeova wamulolanga. Uvwini vino yamwi alemvile Baibo yalanzile pali Yeova. Devedi walanzile ati, ‘We Yawe, wemo wewe musuma, nupya ukaeleela uluse.’ (Masa. 86:5) Mika walemvile ati: “Uzye a Leza cii akoline nawe, wino angelela amaifyo, nu kwelela amaifyo ya antu yakwe asyala?” (Mika 7:18) Ezaya nawe walanzile ati: “Lekini kacita wa viipe asenuke nu muntu umwipe ate ukwelenganya viipe; lekini aswilile kuli Yeova aalamuvwila uluse, kuli kuti kuli Leza witu, pano alaitemelwa ukumwelela.”—Eza. 55:7

13. U mulandu ci uno umonsi uwalapiile yamuzumilizye ukuwela umu cilongano? (Lolini kambokosi akakuti “A Lilaci Lino Umonsi Uwa mu Kolinto Waweziwe Umu Cilongano?”)

¹³ Pakuti yalange ukuti yakolanyanga Yeova, amu cilongano ca mu Kolinto yalinzile ukupokelela umonsi wiya uwalapiile nu kumulanga ukuti yamutemilwe. Vino amu cilongano yalondiile utunguluzi wakwe Paulo uwa kuwezya umuntu uwalapiile, calangilile ukuti yali “ni cuvwila muli vyonsi.” (2 Kol. 2:9) Nanti cakuti papisile sile imyezi inono kufuma pano umonsi wiya yamufumizye umu cilongano, vino yamusunzile vyalenzile ukuti alapile. Fwandi citalondekwanga ukuti papite sana insita pakuti aweziwe umu cilongano.

VINO TUNGAKOLANYA VINO YEOVA WAYA NU MULINGANYA ALINO NU LUSE

14-15. I vyani vino tukusambililako kuli vino vyacitike umu Kolinto? (2 Petulo 3:9) (Loliniko ni cikope.)

¹⁴ Ilyasi ilikalanda pali vino vyacitike umu cilongano ca mu Kolinto lyalemvilwe muli Baibo pakuti naswe ‘tusambilileko.’ (Loma 15:4) Ukwi lyasi lii tukasambililako ukuti Yeova asizumilizya antu aakacita imembu izipisye nupya aasilapila ukutwalilila ukuya umu cilongano. Yamwi yangelenganya ukuti pa mulandu wakuti Yeova wakwata uluse, angazumilizya umuntu asilapila ukutwalilila ukuya umu cilongano, lelo vii asi vino Yeova akaelela. Nanti cakuti Yeova waya nu luse, asizumilizya imiyele iipe nupya masunde yakwe aakalanda pa visuma ni viipe yasisenuka. (Yuda 4) Ndi cakuti Yeova wazumilizyanga antu aasilapila ukutwalilila ukuya umu cilongano, tutanga tuti waya nu luse pano ukucita vii kungaletelela amu cilongano.—Mapi. 13:20; 1 Kol. 15:33.

¹⁵ Nanti ciye vivyo, tukasambilila ukuti Yeova asilonda ali wensi akononwe. Akalonda ukupususya antu. Nupya akalanga uluse uku yantu aakalonda ukusenuka nu kuzifya ucuza wao na aliwe. (Ezek. 33:11; belengini 2 Petulo 3:9.) Fwandi, lino umonsi uwa mu Kolinto walapiile nu kusenula imiyele yakwe, Yeova waomvizye Paulo ukulondolwela amu cilongano ukuti yalinzile ukwelela umonsi wiya alino nu kumuwezya umu cilongano.

16. Uzye ivyacitikile umonsi uwali umu cilongano ca mu Kolinto vikumusambilizya vyani pali Yeova?

¹⁶ Ivyacitike umu cilongano ca mu Kolinto vikatwazwa ukulola ukuti Yeova waya nu kutemwa, akacita ivilungame nupya waya nu mulinganya. (Masa. 33:5) Ukumanya vii kukalenga twalondesya ukulataizya Leza pa miyele isuma ino wakwata. Nupya swensi kwene sweswe ayembu, alino tukalondekwa ukwelelwa. Tukataizya sana Yeova pa kutupeela ilambo ilikalenga ukuti aelela imembu zitu. Cikatuteekezya ukumanya ukuti Yeova watemwa sana antu yakwe nupya akalonda ukuti ivintu vyayazipila.

17. I vyani vino tulasambilila umu vipande ivilondelilepo?

¹⁷ Nga ndakai, uzye amu cilongano yakalola uli umuntu uwatacita uluyembu ulwipisye? Uzye ya eluda yakakolanya uli vino Yeova akalondesya ukuwezya umuntu uwatalapila? Uzye amu cilongano yalinzile ukucita uli ndi cakuti ya eluda yapingulapo ukufumya nanti ukuwezya umwi umu cilongano? Mauzyo yaa yalasukwa umu vipande ivilondelilepo.