Mauzyo Yano Aakabelenga Yakauzya
Uzye asambi 70 yano Yesu watumile mu mulimo wa kusimikila, yali kwi lino Yesu watandike Icakulya ca Manguzi Ica Mwene? Uzye yamupusiile?
Pa mulandu wakuti asambi yaa 70 yatalipo lino Yesu watandike Icakulya ca Manguzi Ica Mwene, tutalinzile ukwelenganya ukuti yamupusiile nanti yatalinzile ukuya asambi yakwe. Pa wanda uwa, Yesu walondanga ukuya sile na atumwa.
Yonsi kwene asambi 12 na 70 yali asambi yakwe. Pa kutandika, Yesu wasoolwile aonsi 12, yano watandike ukwama ati atumwa. (Luka 6:12-16) Wali umu Galili lino “wamile atumwa yakwe 12” nu kuyatuma “umu kusimikila pa Wene wakwe Leza nu kupozya alwale.” (Luka 9:1-6) Lino papisile insita, “wasoolwile na yauze 70 nu kuyatuma yaili yaili.” (Luka 9:51; 10:1) Fwandi, Yesu wakweti asambi aingi aasimikilanga ilyasi lisuma umu ncende izipusanepusane.
Ayuda aizile iyaya asambi yakwe Yesu yatwalilile ukuzevya Ucilo cila mwaka pamwi ni ndupwa zyao. (Kufu. 12:17-20) Lino kwasiile sile panono ukuti Yesu afwe, waile uku Yelusalemu pamwi na atumwa yakwe. Lelo atanenyile asambi yakwe yonsi ali ku Yudeya, ku Galili nu ku Peleya ukuti yakaye uku Yelusalemu pakuti yakazevezye capamwi Ucilo. Ukwaula nu kutwisika, Yesu walondanga ukuya pamwi na atumwa apa nsita yii. Wayanenyile ati: “Nalondesyanga ukuliila pamwi namwe Ucilo lino ntatala nacula.”—Luka 22:15.
Kwali icalenzile acite vivyo. Pataali nu kulengela, Yesu wali nu kufwa wa ‘Mwana wa Mfwele wakwe Leza wino wali nu kufumyapo imembu izya yantu aaya pano nsi.’ (Yoa. 1:29) Vii vyonsi vyali nu kucitikila mu Yelusalemu, muno antu yapeelelanga malambo kuli Leza ukufuma na mpiti. Imfwele ino yakomanga pa wanda wa ucilo iusyangako Aina Izlaeli vino Yeova wayakulwile kufuma mu Ijipti. Lelo ilambo lyakwe Yesu lyali nu kucita ivicizilepo. Yesu wali nu kukulula antu yonsi ku luyembu ni mfwa. (1 Kol. 5:7, 8) Ilambo lino Yesu wapeezile lyali nu kulenga atumwa 12 ukuya umufula wa cilongano ca Ina Klistu. (Efes. 2:20-22) Ica kuzungusya i cakuti umusumba wa muzilo wakwata “mifula ya mawe 12” apalembwa “mazina 12 ayatumwa 12 a Mwana wa Mfwele.” (Kuso. 21:10-14) Fwandi atumwa aatwalilile ukuya na ucisinka yakwata umulimo ucindame sana umu kufikilizya kulonda kwakwe Leza. Ali mulandu kwene uno Yesu walondesyanga ukuya pamwi nayo pa wanda wa Ucilo wa kusyalikizya na pa Cakulya ca Manguzi Ica Mwene icali nu kulondelelapo.
Asambi 70 alino na yauze yatazanyilwe pa Cakulya ca Manguzi Ica Mwene pamwi na Yesu. Nomba asi mulandu na vivyo, asambi yonsi aali na ucisinka yali nu kuipakizya uku Cakulya ca Manguzi Ica Mwene cino Yesu watandike. Asambi yonsi aizile yaya Aina Klistu pa nsita iya, izile iyaya umu upangano wa wene uno Yesu wanenyile atumwa pa wanda kwene uwa usiku.—Luka 22:29, 30