I Vyani Vino Mulinzile Ukucita Ndi Cakuti Mukutwisika Vimwi?

1-2. (a) I vyani vikasakamika sana aomvi yakwe Yeova? (b) I vyani vino tumasambililapo umu cipande cii?

SWENSI kwene nampo nga sweswe yance nanti aikolo insita zimwi tukatwisika.a Wakwe, uwacance angatandika ukusakamala ndi cakuti Yeova wamwikako amano. Angatandika nu kutwisika ndi cakuti alinzile ukubatiziwa. Nupya tale elenganyni pa monsi uwasoolwilepo ukuombela Yeova ukucila ukwika mano ku kulondesya ukukwata impiya. Ndi cakuti cikumutalila ukuzana impiya izya kusakamalilamo ulupwa lwakwe, angatandika ukutwisika ndi cakuti vino wapingwilepo ukucita lino wali umwance vyali sile ningo. Elenganyiniko na pali nkazi umukoloci wino amaka yakuya yakucepa. Angatandika ukuvwa uyi pa mulandu wa kuti asikuomba wakwe vino waombanga lino wakweti amaka. Uzye mwatala mwayuzyapo mauzyo wakwe yaa: ‘Uzye Yeova wanjikako amano? Uzye vino napingwilepo ukuombela Yeova vyali sile ningo? Uzye ncili nacindama kuli Yeova?’

² Ndi cakuti tutazanyile amasuko ku mauzyo yaa cingalenga tute ukuya nu utailo muli Yeova nu kuta ukupepa kuli aliwe. Mu cipande cii, tumasambilila pali vino ukwika amano ku visinte vya muli Baibo kungatwazwa nga twatandika ukutwisika (1) ndi cakuti Yeova watwikako amano, (2) ndi cakuti vino twapingwilepo ukucita vyali sile ningo, na (3) ndi cakuti tucili twacindama kuli Yeova.

IVINGAMWAZWA UKUTA UKUTWISIKA

3. I cani cingatwazwa ukuta ukutwisika?

³ Conga icingatwazwa ukuta ukutwisika u kulondelezya masuko muli Baibo. Ukucita vivyo kulatwazwa ukutwalilila ukulunduluka muli vyakwe Leza, nupya cilalenga tuye “akome umu utailo.”—1 Kol. 16:13.

4. Uzye ‘tungasinkizya uli ivintu vyonsi’? (1 Tesalonika 5:21)

⁴ Belengini 1 Tesalonika 5:21. Baibo ikatunena ukuti “Mwasininkizya ivintu vyonsi.” Tungacita uli vivyo? Ndi cakuti tutasininkizye vimwi, tulinzile ukulola vino Baibo yalandapo pa vintu kwene vivyo. Tale elenganyini pa wacance aakutwisika ndi cakuti Yeova wamwikako amano. Uzye alinzile sile ukupelela pa kwelenganya ukuti Yeova atamwikako amano? Awe foo, alinzile “ukusininkizya ivintu vyonsi” ukupitila mu kusambilila Baibo nu kusambilila pali vino Yeova akaelenganya pali aliwe.

5. Tungazana uli amasuko ku mauzyo yano twakwata?

⁵ Lino tukubelenga Izwi lyakwe Leza, “tukauvwa” kuno Yeova akulanda naswe. Lelo tulinzile ukucita na vyuze kwene pakuti tuzane amasuko uku mauzyo itu. Lino tukubelenga Baibo, tulinzile ukulonda malembo aangatwazwa ukwasuka mauzyo yano twakwata. Tungalondelezya ivyeo api uzyo lino tukweti ukuomvya iviombelo vino iuvi lyakwe Yeova lyatupekanyizizya. (Mapi. 2:​3-6) Tulinzile ukupepa kuli Yeova ukuti atwazwe ukuzana icasuko ukwi uzyo lino tukweti. Lyene tulinzile ukulonda ivisinte vya muli Baibo nu kulola vino ivyeo vivyo vingatwazwa. Nupya tungasambililako na pa yantu alembwa muli Baibo akwetipo intazi wakwe ino tukweti.

6. Uzye ukulongana kukatwazwa uli ukuzana amasuko uku mauzyo yano twakwata?

⁶ Tukauvwa kuno Yeova akulanda naswe lino tuli pa kulongana. Ndi cakuti tukuzanwa lyonsi uku kulongana, limwi tunguvwa amalyasi aakutukomelezya nanti umwi angalanda ivyeo ivingatwazwa ukwasuka amazuyo yano tukweti. (Mapi. 27:17) Lekini tulande pali vino vingatwazwa ukuzana amasuko ku mauzyo yano twakwata.

NGA MUKUTWISIKA NDI CAKUTI YEOVA WAMWIKAKO AMANO

7. Iuzyo ci lino yamwi yakauzya?

⁷ Uzye mwatala mwayuzyapo ukuti, ‘Uzye Yeova wanjikako amano?’ Ndi cakuti mwatandika ukuyuvwa ukuti mutacindama, limwi mungatandika ukutwisika ukuti mutanga muye cuza wakwe Kaumba wi yulu ni insi. Vikwene i vyacitikiile nu Mwene Devedi. Wazungwike ukuzana ukuti Yeova wika sana amano ku yantu, nupya uzizye ati: “We Yawe, ngu muntu fwandi uwacani wakuti uwamwiusya? Umwana wa muntu, icani fwandi cino ungamusakamalila?” (Masa. 144:3) Aekwi kuno mungazana icasuko ukwi iuzyo lii?

8. Ukulingana na 1 Samueli 16:​6, 7, 10-12, i vyani vino Yeova akaikako sana amano umu yantu?

⁸ Muli Baibo, tukasambilila ukuti Yeova wikako amano na kuli yayo aakaloleka ukuti yatacindama kuli yauze. Wakwe, Yeova watumile kasesema Samueli ku ng’anda yakwe Yese pakuti akapake umwana umonsi pa yana yakwe Yese uwali nu kuya umwene mu Izlaeli. Yese wamile ana yakwe aonsi 7, lelo Devedi uwalipo umwance wene atamwamileko.b Lelo Devedi kwene ali wino Yeova wasoolwile. (Belengini 1 Samueli 16:​6, 7, 10-12.) Yeova wisile sana amano ku miyele ino Devedi wakweti. Wamulolanga ukuti wali u mulumendo uwisile amano kuli vyakwe Leza.

9. U mulandu ci uno mungasininkizizya ukuti Yeova wamwikako amano? (Loliniko ni cikope.)

⁹ Elenganyini pa vintu ivikalangilila ukuti Yeova wamwikako mano. Akamupanda amano ukulingana ni ntazi zino mukweti. (Masa. 32:8) Uzye angamucitila vii ukwaula ukumumanya ningo? (Masa. 139:1) Ndi cakuti mukulondela ukupanda amano kwakwe Yeova nu kulola vino kukumwazwa, mulasininkizya ukuti Yeova wamwikako amano. (1 Mila. 28:9; Mili. 17:​26, 27) Yeova akalola vino mukaombesya na vino mwaya ni cuvwila kuli aliwe. Akalola imiyele isuma ino mwakwata nupya akalonda ukuya cuza winu. (Yele. 17:10) Nupya akauvwa ningo sana ndi cakuti mwaya ya cuza yakwe.—1 Yoa. 4:19.

NGA MUKUTWISIKA NDI CAKUTI VINO MWAPINGWILEPO UKUCITA VYALI SILE NINGO

10. Ndi cakuti twelenganya pali vino twapingwilepo ukucita uku cisila, a mauzyo ci yano tungatandika ukuyuzya sweineco?

¹⁰ Pa cisila ca myaka imwi, yamwi yangatandika ukulanguluka ndi cakuti vino yapingwilepo ukucita uku cisila vyali sile ningo. Limwi yapingwilepo ukuta ukuomba incito isuma nanti uculuzi uno yacitanga pakuti yaombela sana Yeova. Nomba vino ipapita insita ikulu nanti imyaka iingi, yangatandika ukwelenganya pa yantu yamwi yano yamanya aapingwilepo ukucita ivipusane na vino yene yacisile, nupya antu yayo yangaloleka ukuti iyakwata sana impiya nupya yakwikala ningo sana. Na cii cingalenga yatandike ukwelenganya ukuti: “Uzye vino naipeelisye ukulaombela Yeova vyali sile ningo? Nanti nga naomvizye insita yane uku kupanga impiya izingi?

11. I vyani ivyacuzyanga uwalemvile Masamu 73?

¹¹ Ndi cakuti namwe mwakwata mauzyo aakamucuzya, elenganyini pali vino uwalemvile Masamu 73 wayuvwile. Walolanga kuno antu ataombelanga Yeova yakweti ivyuma nupya calolekanga kwati yatakwatanga intazi zili zyonsi. (Masa. 73:​3-5, 12) Lino walolanga ukuti ivintu vikuyazipila, watandike ukwelenganya ukuti waicuzyanga sile ukuombela Yeova. ‘Waculanga umusanya onsi’ nga welenganya pali vii. (Masa. 73:​13, 14) Uzye wacimvizye uli amelenganyo yaa aipe?

12. Ukulingana na Masamu 73:​16-18, uzye kalemba wa Masamu wacisile uli pakuti ate ukutwisika?

¹² Belengini Masamu 73:​16-18. Kalemba wa Masamu waile aingila umu Ng’anda ikulu yakwe Yeova. Lino wali pamwi na antu yakwe Yeova, watandike ukwelenganya ningo. Wilwike ukuti nanti cakuti antu yamwi ikalanga ningo, yatakweti upaalilo uwa ku nkoleelo. Ukumanya vii, kwalenzile ukuti aye nu mutende wa mumelenganyo nupya wamanyile ukuti ukupingulapo ukulaombela Yeova ali cintu campomvu ukucita. Ni vyacitike ivyakuti, watwalilile ukulalondesya ukuombela Yeova. —Masa. 73:​23-28.

13. I vyani vino mungacita nga mwatandika ukulanguluka pali vino mwapingwilepo ukucita?

¹³ Namwe kwene, Izwi lyakwe Leza lingamwazwa ukuya nu mutende wa mu melenganyo. Lingamwazwa uli? Mwaelenganya pa visuma vino mukaipakizya ndakai alino na vino Yeova alamupeela uku nkolelo, alino mukolanye ni vilacitikila antu aalapelela sile pa kuipakizya ivintu ivyaya umu nsi yii. Yayo asiombela Yeova yakalola ukuti ukwikala ningo umu nsi yii ali cintu cicindamisye pa mulandu wa kuti yatakwata upaalilo wa ku nkoleelo. Lelo mwemo Yeova wamupeela ivintu ivingi ndakai nupya wamulaya ukumupeela na vyuze ivisuma uku nkoleelo. (Masa. 145:16) Nupya tale elenganyini pali cii. Imukana ukupingulapo ukuombela Yeova, nga mutamanya vino umi winu wali nu kuya. Cino twamanya i cakuti yayo aakapingulapo ukuombela Yeova pa mulandu wakuti yamutemwa nupya yatemwa antu yauze yasiulizya icili consi cisuma.

NGA MUKUTWISIKA NDI CAKUTI MUCILI MWACINDAMA KULI YEOVA

14. Iintazi ci zimwi zino yamwi yakakwata, nupya iuzyo ci lino yangayuzya?

¹⁴ Aomvi yakwe Yeova yamwi yakakwata intazi izikaiza pa mulandu nu ukote, kulwalilila nanti ukulemala. Intazi zii zingalenga yayuvwa ukuti yatacindama kuli Yeova. Limwi yangayuzya ukuti, ‘Uzye ncili nacindama kuli Yeova?’

15. I vyani vino uwalemvile Masamu 71 wasininkizye?

¹⁵ Uwalemvile Masamu 71 nawe kwene wasakamiile pa mulandu wakuti ataakweti amaka. Wapefile ati: “Utansumba pa musango wakuti lyene natinsila. (Masa. 71:​9, 18) Lelo kalemba wa Masamu wasininkizye ukuti ndi cakuti watwalilila ukuombela Yeova na ucisinka, wali nu kumutungulula alino nu kumwazwa. Kalemba wa Masamu wasambilile ukuti Yeova akazangila muli yayo aakaezya na maka ukumuombela asi mulandu ni ntazi zino yakakwata.—Masa. 37:​23-25.

16. U mu nzila ci muno akoloci yacindamila kuli Yeova? (Masamu 92:​12-15.)

¹⁶ Ndi cakuti mwemwe yakote, mwailola wakwe vino Yeova akamulola. Angamwazwa ukutwalilila ukumuombela na ucisinka asi mulandu musikuomba wakwe vino mwaombanga mpiti. (Belengini Masamu 92:​12-15.) Ukucila sile ukwika sana amano kuli vino musikukwanisya kuomba, mwaika mano kuli vino mungakwanisya. Wakwe, mungakomelezya yauze muli vino mukacita nu kulanga ukuti mwaikako mano. Munganenako yauze pali vino Yeova wamwazwa pa myaka ingi na pa mapalo yano mukalondesya ukwizaipakizya uku nkoleelo. Nupya, mutalinzile ukwilila ukuti mapepo yano mukapepelako yauze yakwata sana amaka. (1 Pet. 3:12) Asi mulandu na vino ivintu vili, swensi kwene tungaombela Yeova na antu yauze.

17. U mulandu ci uno tutalinzile ukulailinganyizizya kuli yauze?

¹⁷ Ndi cakuti mukuyuvwa ukuti musikuomba kulingana na vino mulinzile ukuomba, mwaiusya ukuti Yeova akataizya sana vino mukaomba papezile amaka inu. Limwi mungatandika kuilinganya kuli yauze. Lelo mutalinzile ukucita vivyo. U mulandu ci? A pa mulandu wa kuti Yeova asitulinganya kuli yauze. (Gala. 6:4) Wakwe, Maliya wakazile mafuta anunkile amutengo sana. (Yoa. 12:​3-5) Lelo mukamfwilwa mupiina wapeezile tupiya twili utunono sana. (Luka 21:​1-4) Nomba Yesu waweni ukuti anaci yaa yoili yali nu utailo. Yesu wakolanyanga Isi. Fwandi mungasininkizya ukuti Yeova akalola vyonsi vino mukaomba pa mulandu wakuti mwakwata utailo muli aliwe, nupya mwamutemwa nanti cakuti mungalola kwati musikuombesya.

18. I cani cingatwazwa ukuta ukutwisika? (Loliniko na kambokosi kakuti “Izwi Lyakwe Yeova Lingamwazwa Ukuta Ukutwisika.”)

¹⁸ Swensi kwene insita zimwi tukatwisika. Lelo wakwe vino itusambilila, Baibo ingatwazwa ukuta ukutwisika. Fwandi mwaombesya pakuti mwazana amasuko ku mauzyo yano mwakwata, na cico cilalenga mutatoovoka. Yeova wamumanya ningo. Akataizya sana pali vino mwaipeelesya nupya alamulambula. Lyonsi mwaiusya ukuti Yeova watemwa aomvi yakwe yonsi aaya na ucisinka nupya akayasakamala.