CIPANDE CA KUSAMBILILAMO 7
LWIMBO NA. 15 Tulumbanye Yesu, Iyeli Lyakwe Yeova!
Uzye Yeova Nga Watwelela, Cikapiliula Cani?
“Wemo ukaelela amaifyo.”—MASA. 130:4.
VINO TUMASAMBILILAPO
Tumasambilila pa vilangililo ivya muli Baibo ivikalangilila inzila iiyele ino Yeova akatwelelamo. Icipande cii cimatwazwa ukulataizya sana pali vino Yeova akatwelela.
1. U mulandu ci uno cingatutalila ukumanya ndi cakuti umuntu watatwelela?
“NAKWELELA.” Mufwile mukauvwa ningo ndi cakuti muvwa umuntu umwi wino mwasosizye walanda amazwi yaa. Nomba uzye amazwi akuti “nakwelela” yakapiliula cani? Limwi amazwi yaa yangapiliula ukuti mumatwalilila ukuya ivyuza nu muntu wiyo. Nanti limwi umuntu wiyo asikulonda ukuti mutwalilile ukulanda pali vino vyacitike, lelo ucuza utamatwalilila ukuya icili cimwi. Vino antu yakapiliula ndi cakuti yalanda ukuti yelela umuntu vikapusanapusana.
2. Uzye Malembo yalondolola uli vino Yeova akaelela? (Loliniko na futunoti.)
2 Vino Yeova akatwelela vyapusana sana na vino swe yantu aatamalilika tukaelela yauze. Kusi angatwelela wakwe vino Yeova akatwelela. Kalemba wa Masamu walanzile pali Yeova ukuti: “Wemo ukaelela amaifyo, caleka swemo tukakoopa nu kukupeela umucinzi.”a (Masa. 130:4) Mu cumi Yeova akatwelela. Aliwe akatulanga vino cikapiliula ukwelela. Umu malembo yamwi Aciebele, ya kalemba yamwi yakwe Baibo yaomvizye izwi lino antu yatatala yaomvyapo lino yakwelela antu yauze pa kulangilila vino Yeova akatwelela.
3. Uzye vino Yeova akaelela vyapusana uli na vino swe antu tukaelela?
3 Ndi cakuti Yeova welela umuntu, ala imembu zya muntu wiyo zyafutika. Nupya tungatwalilila ukuya na ucuza ukome na Yeova. Tukataizya sana pano Yeova akatwalilila ukutwelela.—Belengini Ezaya 55:6, 7.
4. Uzye Yeova akatwazwa uli ukumanya vino ukwelela kwa cumi kukapiliula?
4 Ndi cakuti vino Yeova akaelela vyapusana na vino tukaelela, tungamanya uli vino cikapiliula ukwelela? Yeova akaomvya ivilangililo ivisuma pa kutulangilila vino akaelela. Umu cipande cii, tumasambilila pa vilangililo vimwi. Ivilangililo vii vimatulangilila vino Yeova akafuuta imembu zitu, na vino tungatwalilila ukuya ya cuza yakwe ndi cakuti twalapila. Lino tukusambilila pa vilangililo vii, cimalenga tutemelweko sana Yeova nu kulamutaizya pali vino waya ni cikuuku nu luse.
YEOVA AKAFUUTA IMEMBU
5. I vyani vikacitika ndi cakuti Yeova watwelela imembu?
5 Muli Baibo, imembu yazikolanya uku cisendo icifine. Umwene Devedi walondolwile imembu zyakwe ukuti: “Uyi wane wati unduta, wati untuwizya mwi ziya lya maifyo yane. Vyati vintotomezya pansi pamulandu wakunyoma kwaviko.” (Masa. 38:4) Lelo Yeova akaelela imembu zya yantu akacita iviipe aakalapila. (Masa. 25:18; 32:5) Izwi lya Ciebele ilyasenulwa ukuti “kwelela” likapiliula “ukusisyapo” nanti “ukusenda.” Fwandi ndi cakuti Yeova watwelela, cikaya kwati watufumizyapo icisendo icifine.
‘Kuyela uluse’ (Masa. 32:5)
6. Uzye Yeova akatalusya uli imembu zitu kuli sweswe?
6 Baibo ikaomvya icilangililo na cuze pa kulangilila vino Yeova akafumyapo imembu zitu. Masamu 103:12 ikati: “Ndi vino ufumondaka watalukana nu uwondaka, avino nawe akafuntusya uyi kunotuli.” Umu mazwi yauze tungati Yeova akatalusya sana imembu zitu kuli sweswe ukucila na pali vino tungelenganya. Cii cikulangilila sile vino Yeova akatwelela ukufuma pansi ya mwenzo.
“Ndi vino ufumondaka watalukana nu uwondaka” (Masa. 103:12)
7. Uzye Baibo yalondolola uli vino Yeova akacita uku membu zitu? (Mika 7:18, 19)
7 Ndi cakuti Yeova watalusya imembu zitu kuli sweswe umu unkolanya, uzye akatwalilila ukuziusya? Awe foo. Umwene Hezekiya walemvile pali Yeova ati: “Awewe ukamfumizya uyi wane onsi.” (Eza. 38:9, 17) Mazwi yaa yakalangilila ukuti Yeova akaelela yayo aakalapila nupya asiiusya imembu zyao. Mazwi yaa yangapiliula nu kuti: “Watulenga [imembu zyane] ukufutika kwati zitatazile izicitika napo.” Nupya Baibo yaomvya icilangililo na cuze pali Mika 7:18, 19. (Belengini.) Api lembo lii, Yeova walanda pa kusumbila imembu zitu muli yemba umukalamba sana.
“Awewe ukamfumizya uyi wane onsi” (Eza. 38:17)
“Ulalyatola amaifyo itu, nu kuvwintila ukakasi witu mu maziya pali yemba” (Mika 7:19)
8. I vyani vino twasambilila ukufika paa?
8 Itusambilila ukuti Baibo ikalangilila ukuti Yeova nga watwelela akafumyapo imembu zitu pakuti tutatwalilila ukuyuvwa amulandu. Umu cumi wakwe vino Devedi walanzile, “Ansansa a yayo yano ivicitwa vyao iviipe vyelelwa na yano imembu zyao zyelelwa; uwa nsansa u muntu wino Yeova ataliusya imembu zyakwe.” (Loma 4:7, 8) Kuu ali kwelela ukwa cumi cumi.
YEOVA AKAFUMYAPO IMEMBU ZITU
9. Uzye Baibo ikatwazwa uli ukumanya vino Yeova akaelela?
9 Ukupitila umwi lambo, Yeova akafumyapo imembu zya antu aakalapila. Muli Baibo tukabelenga ukuti Yeova akatufula nu kutusangulula uku membu zitu. Na cii cikalenga uwatayembuka ukuya umusanguluke. (Masa. 51:7; Eza. 4:4; Yele. 33:8) Yeova umwineco walanda ukuti: “Amaifyo inu nanti yangayenzya cee, nemo namayafula nga nayo yamaswepa mpe, wakwe pamba.” (Eza. 1:18) Citangupala ukuwasya icakuzwala icikweti ivikwi iviyenzu. Lelo vii vino Yeova walanda vikalenga tusininkizye ukuti imembu zitu zingaswefiwa icakuti izita nu kuloleka.
“Nanti yangayenzya cee, nemo namayafula nga nayo yamaswepa mpe, wakwe pamba” (Eza. 1:18)
10. I cilangililo ci cino Yeova waomvya pa kulangilila vino akatwelela?
10 Wakwe vino twasambilile umu cipande icafumako, imembu zitu yazikolanya uku nkongole. (Mate. 6:12; Luka 11:4) Fwandi lyonsi lino twayembukila Yeova, cikaya kwati tukukwatilako sile inkongole. Twamukwatila inkongole izingi sana. Lelo ndi cakuti Yeova watwelela, cikaya kwati wafuuta inkongole zino twamukwatila. Fwandi nga watwelela tusilondekwa ukumuwezezya inkongole zizyo. Wakwe vino umuntu akauvwa ningo ndi cakuti inkongole zyakwe zyafutwa, ali vino naswe tukauvwa ningo ndi cakuti Yeova watwelela.
“Utwelele imembu zitu” (Mate. 6:12)
11. Uzye cikapiliula cani ndi cakuti Baibo yalanda ukuti imembu zitu zyafuutwa? (Mili. 3:19)
11 Yeova nga welela imembu zitu, akazifuuta. (Belengini Milimo 3:19.) Pa kuti tulangilile, elenganyini ukuti umuntu walemba icilembo cakwe X apa cipendo ca mpiya zino mwakongola. Lelo, icipendo pano atalemba icilembo cakwe X cicili cikuloleka. Nomba ukufuuta vimwi kwene kwapusanako. Pakuti tuvwikisye cilangililo cii, tulinzile ukwiusya ukuti inki ino antu aliko mpiti yaomvyanga yangupile ukufuuta. Antu yaomvyanga kasalu pa kufuuta vino iyalemba. Fwandi inkongole nga ‘zyafuutwa,’ zyatanga ukuloleka. Acino antu yataali nu kulola ivyali vilemvilwepo. Cayanga kwati umuntu atakwetipo ni nkongole. Tukataizya sana ukumanya ukuti Yeova nga watwelela, cikaya kwati tutacisilepo imembu.—Masa. 51:9.
“Pakuti imembu zinu zifuutwe” (Mili. 3:19)
12. I vyani vino tukusambilila uku cilangililo ci kumbi?
12 Yeova waomvya cilangililo na cuze pa kulangilila vino akafuuta imembu zitu. Walanda ukuti: “Nemo namuyela uluse apa maifyo inu. Nayo yapasika ndi vino ikumbi likapasika.” (Eza. 44:22) Ndi cakuti Yeova watwelela, cikaya kwati wafisa imembu zitu pakuti tutaazilola.
“Nemo namuyela uluse apa maifyo inu” (Eza. 44:22)
13. Uzye tukauvwa uli ndi cakuti Yeova watwelela?
13 Uzye ivilangililo vii vikutusambilizya vyani? Ndi cakuti Yeova watwelela, tutalinzile ukutwalilila ukuyuvwa amulandu pali vino twacisile. Ilambo lyakwe Yesu lyalenga ukuti imembu zitu zifuutwe. Yeova nga watwelela, cikaya kwati tutaacisile nu luyembu. Vikwene ali vino Yeova akatwelela ndi cakuti twalapila pa membu zino twacisile.
TUKAYA YA CUZA YAKWE YEOVA NUPYA
Ukwelela kuno Yeova akatwelela kukalenga tukwate ucuza usuma na aliwe. (Lolini palaglafu 14)
14. U mulandu ci uno tungatailila ukuti Yeova alatwelela? (Loliniko ni vikope.)
14 Ndi cakuti Yeova watwelela, cikalenga ukuti tukwate ucuza usuma na aliwe nupya. Pa mulandu wakuti Yeova nga watwelela asiiusya imembu zitu, tutalinzile ukulayuvwa amulandu. Tutalinzile kulasakamala ukuti limwi Yeova watusokela nupya akulonda inzila iyakutufulwilamo. Cico citanga cicitike. U mulandu ci uno tungatailila Yeova ndi cakuti watunena ukuti watatwelela? Yeova wanenyile kasesema Yelemiya ukuti: “Ndayayela uluse ku maifyo yao. Ntalatala nupya niusye amaifyo yao.” (Yele. 31:34) Umutumwa Paulo walanzile amazwi akoline na yaa lino watiile: “Ntalatala niusye imembu zyao.” (Aeb. 8:12) Uzye cii cikapiliula cani?
“Ntalatala nupya niusye amaifyo yao” (Yele. 31:34)
15. Uzye cikapiliula cani ndi cakuti Yeova wati ntalatala niusye imembu zinu?
15 Muli Baibo izwi lyakuti ‘ukwiusya’ lisipiliula sile ukwiusya vimwi nanti ukwelenganya pali vimwi. Lelo likalozya nu ku kucitapo vimwi. Cipondo cino yapopiile pamwi na Yesu, camunenyile ati: “Yesu, ukanjiusye lino ulaateeka umu Wene wako.” (Luka 23:42, 43) Cipondo cii canenyile Yesu ukuti akaciusye. Yesu wanenyile umonsi wiya ukuti wali nu kumutuutulula. Acino fwandi Yeova nga walanda ukuti atalatala aiusye imembu zitu, ala cikupiliula ukuti atalatufulula pa membu zino twacisile. Atalatufulula uku nkoleelo pa membu zino watwelela.
16. Uzye Baibo yalondolola uli untungwa uno tukakwata ndi cakuti Yeova watwelela?
16 Baibo yaomvya icilangililo na cuze pa kutwazwa ukumanya untungwa uno tukakwata ndi cakuti Yeova watwelela. Pa mulandu wakuti tutamalilika, twaya kwati ‘azya ya luyembu.’ Lelo Yeova nga watwelela tukaya kwati azya ‘atiyakululwa uku luyembu.’ (Loma 6:17, 18; Kuso. 1:5) Ndi cakuti twamanya ukuti Yeova watwelela tukaya ni nsansa wakwe vino umuzya wino yakulula akaya ni nsansa.
“Mwakulwilwe uku luyembu” (Loma 6:18)
17. Uzye ukwelelwa kukalenga uli ukuti tupole? (Eza. 53:5)
17 Belengini Ezaya 53:5. Baibo ikalanda ukuti pa mulandu wakuti sweswe yayembu, twaya kwati antu alwala ulwale ukakoma. Lelo pa mulandu ni lambo lino umwanakwe wapeezile, Yeova watupozya. (1 Pet. 2:24) Ndi cakuti twayembuka, ucuza witu na Yeova ukaononeka. Lelo pa mulandu ni lambo, Yeova akatwelela nupya tukakwata ucuza usuma na aliwe nupya. Wakwe vino umuntu akauvwa ningo ndi cakuti wapola uku ulwale uwipisye, ali vino naswe tukaya ni nsansa ndi cakuti twaya ya cuza yakwe Yeova nupya.
“Ivyumo vyakwe ivyalenga ukuti tupole” (Eza. 53:5)
VISUMA IVIKATUCITIKILA NDI CAKUTI YEOVA WATWELELA
18. I vyani vino itusambilila uku vilangililo ivya muli Baibo ivikalanda pali vino Yeova akaelela? (Loliniko na kambokosi akakuti “Vino Yeova Akatwelela.”)
18 I vyani vino itusambilila uku vilangililo ivya muli Baibo ivikalanda pali vino Yeova akaelela? Ndi cakuti Yeova watwelela pa membu zitu, cikaya kwati tutacisilepo imembu zizyo nupya atalatala akatufulule uku nkoleelo pa membu zino twacisile. Cii cikalenga tukwate ucuza usuma na Tata witu uwaya kwi yulu. Lelo tukaiusya ukuti ukwelelwa uupe. Antu yatanga yapatikizye Leza ukuti ayelele. Lelo Yeova akapeela upe uu pa mulandu nu kutemwa ni cikuuku vino akalanga uku antu ayembu.—Loma 3:24.
19. (a) I vyani vino tulinzile ukulataizya? (Loma 4:8) (b) I vyani vino tulasambilila umu cipande icilondelilepo?
19 Belengini Loma 4:8. Swensi kwene tulinzile ukulataizya pali vino Yeova ‘akatwelela.’ (Masa. 130:4) Lelo pakuti Yeova atwelele tulinzile ukucita icintu icicindame. Yesu walanzile ati: “Nga mukwelela auzo lino yamuluvyanya, Tata winu uwa kwi yulu nawe alamwelela.” (Mate. 6:14, 15) Fwandi icicindama ukuti twakolanya vino Yeova akaelela. Uzye tungacita uli vivyo? Icipande icilondelilepo cilatwazwa ukumanya vino tungacita vivyo.
LWIMBO NA. 46 Yeova Tukakutaizya
a Izwi lya Ciebele kuno yasenula izwi lyakuti “ukwelela,” likalangilila ukuti ali kwelela sile ukwa cumi, nanti cakuti kwaya inzila zyuze izya kwelela. Mabaibo aingi yatalondolola upusano uwayapo, lelo Baibo wa Malembo Ya Nsi Ipya wene walondolola, na cii calenga ukuti ulondolozi uwaya pa Masamu 130:4 upusaneko na Mabaibo yauze.