Mwakolanya Vino Yeova na Yesu Yakaelenganya

1-2. Uzye cikapiliula cani ukutemwa Yeova, nupya Yesu walangilile uli ukuti watemilwe Yeova?

“UWATEMWA Yeova Leza wako nu mwenzo wako onsi, nu umi wako onsi na maka yako yonsi na mano yako yonsi.” (Luka 10:27) Yesu walenzile cimanyikwe ukuti isunde lii ali lino lyali ilicindame umu Masunde Yakwe Mose. Ukutemwa Yeova kukapiliula ukuti tulinzile ukumutemwa nu mwenzo witu onsi, nupya vino tukalondesya na vino tukayuvwa vilinzile ukulangilila ukuti twamutemwa. Nupya kukapiliula ukuti tulinzile ukulamupepa wenga sile umi witu onsi, alino na maka itu yonsi. Mukutemwa Yeova mwaya na vino tukaelenganya pa vintu. Ukuya kwene, tutanga tuvwikisye vyonsi vino Yeova akaelenganya. Lelo tungamanya vino Leza akaelenganya ukupitila umu kusambilila pa “melenganyo yakwe Klistu” pano Yesu akakolanya vino Isi akaelenganya.—1 Kol. 2:16.

² Yesu watemilwe Yeova na muli vino welenganyanga. Wamanyile vino Leza walondanga ukuti acite nupya walondelanga vino wamunenyile nanti cakuti ukucita vivyo kwali nu kulenga ukuti acule pa mulandu wa kucita ivilungame. Yesu wisile sana mano ukucita ukulonda kwakwe Isi, nupya atalesile icili consi ukuti cimulesye ukucita vivyo.

3. I vyani vino Petulo wasambilile kuli Yesu, nupya i vyani vino Petulo wakomelizye Aina Klistu yauze? (1 Petulo 4:1)

³ Petulo na atumwa yauze yakweti isyuko ilya kuya pamwi na Yesu nupya yasambilile vino Yesu welenganyanga. Lino Petulo walemvile kalata iya kutandikilapo, wakomelizye Aina Klistu ukuipekanya kuya ni myelenganyizizye ino Klistu wakweti. (Belengini 1 Pet. 4:1.) Lino Petulo walemvile ati: “muipekanye,” waomvizye amazwi uku kulondolola asilika atiyaipekanya ukuya umu kulwa ni vyanzo. Fwandi ndi cakuti tukwelenganya wakwe vino Yesu welenganyanga, tulaya aipekanye ukulwisya imiyele iya kulondesya ukucita iviipe alino ni nsi yii ikatungululwa na Satana.—2 Kol. 10:​3-5; Efes. 6:12.

4. Uzye icipande cii cimatwazwa uli ukulondela ukusunda kwakwe Petulo?

⁴ Tumasambilila pali vino Yesu welenganyanga nupya tumalola na vino tungamukolanya. Tumalola vino (1) tungaelenganya wakwe vino Yeova akaelenganya, ivikatwazwa ukulazumilizyanya na yauze, (2) tungaya aicefye, na (3) vino tungaya na mano ukupitila umu kupepa kuli Yeova.

MWAELENGANYA WAKWE VINO YEOVA AKAELENGANYA

5. Uzye pa nsita imwi Petulo wafizilwe uli ukwelenganya wakwe vino Yeova akaelenganya?

⁵ Elenganyini ivyacitike pa nsita imwi lino Petulo atelenginye pa vintu wakwe vino Yeova akaelenganya. Yesu wanenyile atumwa yakwe ukuti wali nu kuya uku Yelusalemu, kuno intunguluzi zya mipepele zyali nu kumulema, kumuma alino nu kumukoma. (Mate. 16:21) Cifwile catalile Petulo ukuzumila ukuti Yeova wali nu kuzumilizya Yesu uwali Mesiya uwalavilwe, ukukomwa. (Mate. 16:16) Fwandi Petulo wasenzile Yesu pa mbali nu kumunena ukuti: “Uyuvwile uluse Mwene; vintu vivyo vitalakucitikila.” (Mate. 16:22) Pa mulandu wakuti Petulo atelenginye wakwe vino Yeova akaelenganya, yatazumilizyanyizye na Yesu.

6. U mu nzial ci muno Yesu walangilile uli ukuti welenganyanga wakwe vino Yeova akaelenganya?

⁶ Yesu welenganyanga wakwe vino Isi wa kwi yulu welenganyanga. Wanenyile Petulo ati: “Fuma pano Satana! Kuli nene, wewe ca kupumikako. Pano usielenganya melenganyo yakwe Leza suka aayantu.” (Mate. 16:23) Petulo afwile atelenganyanga iviipe, lelo Yesu wakanyile vino wamunenyile. Tungasambililako vimwi kuli vii ivyacitike. Yeova atalondanga Yesu ukwikala umi uwaula ukucuulapo lino wizile pano nsi. Apa nsita iya, Petulo wasambilileko ukuti walinzile ukulaelenganya wakwe vino Leza akaelenganya.

7. Uzye lino papisile insita Petulo walangilile uli ukuti walondanga ukusenuka nu kulaelenganya wakwe vino Yeova akaelenganya? (Lolini icili pa nkupo.)

⁷ Lino papisile insita, Petulo walangilile ukuti walondesyanga ukulaelenganya wakwe vino Yeova akaelenganya. Insita yafisile iyakuti na antu ataali azembululwe yaye antu yakwe Leza. Petulo wapeezilwe umulimo wa kusimikila kuli Koneli uwali nu kuya uwa kutandikilapo uwaula ukuzembululwa ukulapepa Yeova. Ayuda yatuvwananga sana na antu ataali Ayuda, fwandi Petulo walondekwanga ukusenuka pakuti aombe umulimo uu. Fwandi lino Petulo wilwike vino Leza walondanga, wasenwike. Lino Koneli wanenyile Petulo ukuti amutandalile, ‘ataakanyile.’ (Mili. 10:​28, 29) Wasimikiile Koneli na amu ng’anda yakwe nupya yabatiziwe.—Mili. 10:​21-23, 34, 35, 44-48.

8. Tungalanga uli ukuti tukaelenganya wakwe vino Yeova akaelenganya? (1 Petulo 3:8)

⁸ Pa cisila ca myaka imwi, Petulo wakomelizye Aina Klistu yauze ‘kuya na melenganyo ali yamwi.’ (Belengini 1 Petulo 3:8.) Swe yantu yakwe Yeova tungaya na melenganyo ali yamwi ndi cakuti tukukolanya vino Yeova akaelenganya wakwe vino tukasambilila muli Baibo. Wakwe, Yesu wakomelizye alondezi yakwe ukulakolezya Uwene. (Mate. 6:33) Limwi umwi mu cilongano cino mwayamo angapingulapo ukutandika umulimo wa nsita yonsi. Ukucila ukumunena ukucita vyuze ivingalenga umi wakwe ukuzipa, tulinzile ukulalanda pa visuma ivyaya mu mulimo uno watasoolola alino nu kuitemelwa ukumwazwa.

MWAYA AICEFYE

9-10. Uzye Yesu walangilile uli ukuti wali umuicefye?

⁹ Apa wanda wa kusyalikizyako usiku lino Yesu atatala wafwa, wasambilizye Petulo na atumwa yauze umulandu uno cacindamila ukuya aicefye. Yesu watumile Petulo na Yoani ukuyapekanya ivintu ivyalondekwanga pa cakulya ca kusyalikizya lino atatala wafwa. Nupya pa vintu vino yali nu kupekanya pali nu kuya beseni ni taulo pakuti aenyi yangafulala uku ngazo lino yatatala yatandika ukulya. Nomba aweni uwali nu kufula yauze ingazo?

¹⁰ Yesu atasitosile ukuomba umulimo uu. Atumwa yafwile yazungwike sana lino yaweni Yesu akuomba umulimo uu uno aomvi yaombanga. Yesu wazuzile icakuzwala cakwe ica kunzi, anyepa itaulo umu musana, lyene watozile manzi muli beseni nu kutandika ukufula ingazo zya yasambi yakwe. (Yoa. 13:​4, 5) Cifwile casendiile Yesu insita pakuti amale ukufula ingazo zya yatumwa yakwe 12, kumwi sile ni ngazo zyakwe Yuda wino wizile amufutuka. Lelo Yesu waicevizye nu kuomba umulimo uu. Lyene Yesu wayanenyile ati: “Uzye lyene mwiluka vino nacita kuli mwemwe? Mukangama mukuti ‘Kasambilizya’ nu kuti ‘Umwene,’ nupya mukalungika pano avino naya. Fwandi ndi cakuti nene, ne Mwene nupya Kasambilizya iimfula ingazo zinu, namwe kwene mulinzile mwafulana ingazo.”—Yoa. 13:​12-14.

11. Uzye Petulo walangilile uli ukuti wasambilile ukuya umuicefye? (1 Petulo 5:5) (Loliniko ni cikope.)

¹¹ Petulo wasambilile kuli vino Yesu wali umuicefye. Lino Yesu waswilile ukwi yulu, Petulo wacisile icizungusyo lino wapozizye umonsi uwavilwe umulemale. (Mili. 1:​8, 9; 3:​2, 6-8) Antu aingi yaweni icizungusyo cii, nupya yaile kuli Petulo. (Mili. 3:11) Nomba Petulo atalondanga ukuti antu yamulumbanya pali vii vino wacisile, nanti cakuti kuno wakuliile antu wapeelanga umucinzi uku antu amanyikwe sana. Lelo Petulo waicefizye nu kuleka ukuti ululumbi lwaya kuli Yeova na Yesu, lino watiile: “Pa mulandu ni zina lyakwe [Yesu], alino nu utailo uno twakwata umwi zina lyakwe i caticilenga ukuti umuntu wii wino mukulola nupya wino mwamanya apole.” (Mili. 3:​12-16) Amazwi yano Petulo waomvizye lino walembiile Aina Klistu kalata pali vino tulinzile ukuya aicefye, yakatwiusyako vino Yesu wanyefile itaulo umu musana nu kufula ingazo zya yatumwa yakwe.—Belengini 1 Petulo 5:5.

12. Uzye tungakolanya uli Petulo alino nu kutwalilila ukuya aicefye?

¹² Tungakolanya vino Petulo wacisile alino nu kutwalilila ukusambilila ivya kuya aicefye. Umuntu umuicefye asipeelela sile pa kulanda mazwi asuma. Lelo amazwi yano Petulo waomvizye pa kulondolola ukuicefya yakalozya na kuli vino tukaelenganya pali sweineco alino na pali yauze. Tukacitila yauze ivisuma pa mulandu wakuti twatemwa Yeova na antu, asi kuti tukalonda ukuti yauze yatutaizya. Tukalanga ukuti twaicefya ndi cakuti tuli ni nsansa lino tukuombela Yeova alino na ina na ya nkazi, nanti cakuti yauze yasikulola vino tukaombesya.—Mate. 6:​1-4.

MUYE NA “MANO”

13. Londololini vino cikapiliula “ukuya na mano”?

¹³ Uzye cikapiliula cani “ukuya na mano”? (1 Pet. 4:7) Umwina Klistu uwaya na mano akaezya na maka ukupingula ningo pa vintu ukulingana na vino Yeova akaelenganya. Umwina Klistu wiyo akamanya ukuti kusi icintu icicindame ukucila ukukwata ucuza usuma na Yeova. Asiilola ukuti wacila yauze, nupya asiilola ukuti wamanya vyonsi. Nupya akalanga ukuti wataila Yeova ukupitila umu kupepa kuli aliwe lyonsi.

14. Uzye pa nsita imwi Petulo wafizilwe uli ukutaila Yeova?

¹⁴ Pa wanda wa kusyalikizyako usiku lino Yesu atatala wafwa, wacelwile asambi yakwe ati: “Mwensi mumansya muno usiku.” Petulo welenganya ukuti wali umusipe, nupya watiile: “Nanti cakuti yonsi yakusya, nemo ntakukusya!” Uwanda kwene uwa usika Yesu wanenyile asambi yakwe ukuti: “Twalililini ukulola nu kupepa.” (Mate. 26:​31, 33, 41) Petulo atuvwilile vino Yesu walanzile. Auvwila nga wasifile nu kulanda ukuti wali u musambi wakwe Yesu. Lelo Petulo wakanyile ukuti atamanyile Yesu, nupya pa cisila uvwile uyi sana.—Mate. 26:​69-75.

15. Uzye Yesu watwalilile ukuya uli mano pa manda uwa usiku?

¹⁵ Yesu wataile sana Yeova. Nanti cakuti Yesu wali umumalilike wapepanga imiku iingi. Ukucita vii kwamwazwile ukuya umusipe nu kucita ivintu ukulingana nu kulonda kwakwe Yeova. (Mate. 26:​39, 42, 44; Yoa. 18:​4, 5) Ukwaula nu kutwisika, Petulo atilile vino Yesu wapefile imiku iingi apa wanda uwa usiku.

16. Uzye Petulo walangizye uli ukuti wali na mano? (1 Petulo 4:7)

¹⁶ Lino papisile insita Petulo wizile ataila sana Yeova ukupitila umu kupepa kuli aliwe. Pa cisila cakututululwa, Yesu wanenyile Petulo na atumwa yauze ukuti wali nu kuyapeela umupasi uwa muzilo pakuti yangasimikila ilyasi lisuma. Lelo Yesu wayanenyile ukuti yakalolele umu Yelusalemu ukufikila lino vii vilacitika. (Luka 24:49; Mili. 1:​4, 5) I vyani vino Petulo wacitanga lino walolelanga? Petulo na ya kapepa yauze “yali nu mwenzo onga uwa kupepa lyonsi.” (Mili. 1:​13, 14) Nupya lino papisile insita, Petulo walemvile kalata uku Ina Klistu yauze muno wayakomelizye ukuya na mano nu kutaila Yeova ukupitila umu kupepa. (Belengini 1 Petulo 4:7.) Petulo wasambilile ivya kutaila Yeova nupya wakomelezyanga aina na ya nkazi amu cilongano.—Gala. 2:9.

17. Nanti cakuti twamanya ukuomba imilimo imwi, i vyani vino tulinzile ukutwalilila ukulacita? (Loliniko ni cikope.)

¹⁷ Pakuti tuye na mano tulinzile ukulapepa kuli Yeova insita izingi. Tulinzile ukulapepa kuli Yeova pakuti atwazwa, asi mulandu ni milimo ino twamanya. Fwandi ndi cakuti tukulonda ukupingula pa vintu ivindame sana, tulinzile ukupepa kuli Yeova pakuti atutungulule alino nu kutaila ukuti aliwe wamanya ivingatuzipila.

18. Uzye tungacita uli pakuti twaelenganya wakwe vino Yeova akaelenganya?

¹⁸ Tukataizya pali vino Yeova watuumba umu nzila iyakuti twakolanya imiyele ino wakwata. (Utan. 1:26) Ukuya kwene, tutanga tukwanisye ukukolanya Yeova muli vyonsi. (Eza. 55:9) Nomba, wakwe Petulo naswe kwene tungatandika ukwelenganya wakwe vino Yeova akaelenganya. Fwandi lekini tutwalilile ukulakolanya vino Yeova akaelenganya, ukuya aicefye, alino nu kuya na mano.