Mwalenga Uwazwilizyo Kuli ya Eluda

1. Uzye Yeova walanga uli ukuti imfwele zyacindama kuli aliwe?

YEOVA watemwa yayo yonsi aakamuombela nupya akayasakamala wakwe vino kacema akasakamala imfwele zyakwe. Wayakazile nu wazi wakwe Yesu nu kupeela ya eluda amu vilongano ukuti yasakamala imfwele zyakwe. (Mili. 20:28) Leza wasoolola Yesu ukuya umutwe wa cilongano. Akalonda ya eluda ukuya ni cikuuku uku yaomvi yakwe. Ya eluda yakalondela utunguluzi alino nu kwazwa kwakwe Yesu pakuti yaazwa imfwele ukukomya ucuza wao na Yeova.—Eza. 32:​1, 2.

2. Aaweni yano Yeova akaikako sana mano? (Ezek. 34:​15, 16)

² Yeova wika mano uku yaomvi yakwe yonsi, lelo wika sana mano kuli yayo akucula. Yamwi yangacula pa mulandu na vino yaluvyanyizye, lelo Yeova akaomvya ya eluda pa kuyazwa. (Belengini Ezekelo 34:​15, 16.) Lelo akalonda twalenga uwazwilizyo ndi cakuti calondekwa. Asilonda ukuti twapepa sile kuli aliwe lelo akalonda nu kuti twalenga uwazwilizyo na kuli ya “kacema na ya kasambilizya” amu vilongano.—Efes. 4:​11, 12.

3. Uzye ukusambilila pa mulimo uno ya eluda yakaomba kungatwazwa uli?

³ Umu cipande cii, tumasambilila pali vino Yeova akaomvya ukwazwa yayo yano ucuza wao na Yeova watonta. Tumaasuka mauzyo yaa: A lilaci lino tulinzile ukulenga uwazwilizyo kuli ya eluda? U mulandu ci uno tulinzile ukulengela uwazwilizyo kuli ya eluda? Uzye ya eluda yangatwazwa uli? Limwi ndakai ucuza witu na Yeova ukome nupya tusikulondekwa ukwazwiwa na ya eluda. Lelo icipande cii, cimatwazwa ukulataizya pali vino Yeova akaomvya ya eluda pa kutwazwa nupya cimatwazwa ukumanya vino tungacita ndi cakuti tukulondekwa uwazwilizyo.

A LILACI LINO TULINZILE UKULENGA UWAZWILIZYO KULI YA ELUDA?

4. U mulandu ci uno tungalandila ukuti amazwi aaya pali Yakobo 5:​14-16, 19, 20 yakalanda pa kuzifya ucuza witu na Yeova? (Loliniko ni cikope.)

⁴ Umusambi Yakobo walondolwile vino ya eluda yakacita pa kutwazwa, walemvile ati: “Uzye pali mwemwe pali uwatalwala? Lekini aame ya eluda ya mu cilongano.” (Belengini Yakobo 5:​14-16, 19, 20.) Yakobo walandanga pa muntu aakulondekwa ukuzifya ucuza wakwe na Yeova. Yakobo walandanga ukuti umuntu umulwale alinzile ukwama ya eluda amu cilongano pakuti yamwazwe, asi kwama dokota. Nupya walanzile ukuti umuntu umulwale angapola ndi cakuti imembu zyakwe zyelelwa. Vino umuntu angacita pakuti azifye ucuza wakwe na Yeova vyakolana na vino umuntu umulwale angacita pakuti apole. Ndi cakuti itulwala, tukaya kuli ya dokota, tukayalondolwela vino tukuvwa, nupya tukalondela vino yatunena. Umu nzila iili imwi kwene, ndi cakuti tukulonda ukuzifya ucuza witu na Yeova tulinzile ukuya kuli ya eluda, kuyanena intazi ino tukweti alino nu kucita vino yatunena ukufuma muli Baibo.

5. Uzye tungamanya uli ndi cakuti ucuza witu na Yeova iutandika ukutonta?

⁵ Muli Yakobo icipande 5, Yakobo watukomelezya ukulanda na ya eluda ndi cakuti twalondekwa uwazwilizyo pakuti tungakomya utailo witu. Cacindama sana ukulenga uwazwilizyo lino tutatala tonona ucuza witu na Leza. Tulinzile ukuya acisinka kuli sweineco. Baibo ikatucelula ukuti ndi cakuti tutacenjile tungaibepa ukuti tukweti ucuza ukome na Yeova, fwandi foo. (Yako. 1:22) Vikwene i vyacitikile na Ina Klistu yamwi amu Sadisi. Lelo Yesu wayanenyile ukuti vino yacitanga vitazanzyanga Yeova. (Kuso. 3:​1, 2) Inzila yonga ino tungamanyilamo vino ucuza witu na Yeova uli, u kukolanya vino twayuvwanga lino twatandike ukuombela Yeova na vino tukuyuvwa ndakai. (Kuso. 2:​4, 5) Tungayuzya sweineco ukuti: ‘Uzye nkaipakizya ukubelenga nu kwelenganya pali vino nkubelenga muli Baibo? Uzye nkapekanyizizya limwi nu kuzanwa lyonsi umu kulongana? Uzye nata ukuombesha umu mulimo wa kusimikila? Uzye ndakai nkaelenganya sana pa mpiya ukucila vino cali mpiti?’ Ndi cakuti mwasuka ukuti ee uku mauzyo yaa, ala ucuza winu na Yeova iutonta nupya ndi cakuti mutaombiilepo zuwa, ungononeka. Ndi cakuti cikututalila ukukomya ucuza witu na Yeova sweineco, tulinzile ukulenga uwazwilizyo kuli ya eluda.

6. I vyani vino atiyacita uluyembu ulwipishe yalinzile ukucita?

⁶ Ukuya kwene yayo atiyacita uluyembu ulwipishe ulungalenga yafumiziwe nu mu cilongano, yalinzile ukunena ya eluda. (1 Kol. 5:​11-13) Umuntu uwatacita uluyembu ulwipishe atanga azifye ucuza wakwe na Yeova pa lwakwe. Yeova angelela sile imembu zitu ndi cakuti twalanga ukuti umu cumi itulapila. (Mili. 26:20) Pali vino tungacita paya nu kunenako ya eluda ndi cakuti itucita uluyembu ulwipishe.

7. Aaweni na yauze aalinzile ukulenga uwazwilizyo kuli ya eluda?

⁷ Ya eluda yasiazwa sile atiyacita imembu izipishe, lelo yakaazwa na yayo atiyatonta muli vyakwe Leza. (Mili. 20:35) Wakwe, yakaazwa yayo yano cikatalila ukuta ukuya na melenganyo aipe. Limwi cingamutalila ukuta ukwelenganya pa viipe vino mwacitanga lino mutatala mwasambilila icumi, wakwe ukuomvya imilembo uyi uyi, kutamba ivya uzelele nanti kucita uzelele. Mutalinzile ukuvwa intete ukulenga uwazwilizyo kuli ya eluda. Mungasoololapo ukulanda na eluda wino mukulola ukuti angakutika kuli mwemwe, angamilondolwela vino mulinzile ukucita pakuti mucimvye amelenganyo aipe, nu kumwiushako ukuti mungazanzya Yeova ndi cakuti mwacimvya amelenganyo aipe. (Kasa. 4:12) Limwi mungatoovoka. Ya eluda yangamiushako ukuti Yeova akauvwa ningo ndi cakuti mukulenga uwazwilizyo. Nupya ala mukulangilila ukuti mwaicefya nupya mukulonda ukulazanzya Yeova.—1 Kol. 10:12.

8. Uzye tulinzile ukunena ya eluda pali vyonsi vino twaluvyanya? Londololini.

⁸ Asi intazi zyonsi zino tunganenako ya eluda. Wakwe, limwi mungasokela umwina nanti nkazi nanti kumunena mazwi aipe. Ndi cakuti ivya musango uu vyacitika, mutalinzile ukuya kuli ya eluda lelo mulinzile ukulondela ukusunda kwakwe Yesu ukwa kuya uku mwina nanti nkazi nu kupanga umutende na aliwe. (Mate. 5:​23, 24) Mungalondelezya pa miyele wakwe, ukufuuka, kuya ateekele, alino nu kuikaanya na pali vino mungaya ni miyele kwene yii. Lelo nga mucili mukulondekwa uwazwilizyo, mungasoololapo ukulenga uwazwilizyo kuli ya eluda. Lino Paulo walembiile Aina Filipi kalata, wanenyile eluda umwi ukwazwa Yuodia na Sintike pakuti yatandike ukuvwana, vikwene ali vino na eluda umu cilongano cinu angamwazwa.—Filipi 4:​2, 3.

U MULANDU CI UNO TULINZILE UKULENGELA UWAZWILIZYO KULI YA ELUDA?

9. U mulandu ci uno tutalinzile ukuleka insonyi zilenge tufilwe ukulenga uwazwilizyo kuli ya eluda? (Mapinda 28:13)

⁹ Tukalondekwa ukusipa nu kuya nu utailo pakuti tulenge uwazwilizyo kuli ya eluda ndi cakuti itucita uluyembu ulwipishe nanti lino tukuyuvwa ukuti tutanga tukwanishe ukucimvya amelenganyo aipe. Tutalinzile ukuleka insonyi zilenge tufilwe ukulenga uwazwilizyo kuli ya eluda. U mulandu ci? Pano ndi cakuti tukulondela vino Yeova watantika ala tukulanga ukuti twamutaila nupya twaya ni cuvwila kuli aliwe. Twamanya ukuti tukalondekwa uwazwilizyo ukufuma kuli aliwe pakuti tutwalilile ukucita ivilungame. (Masa. 94:18) Nupya ndi cakuti twacita uluyembu, tungataila ukuti Yeova alatwelela ndi cakuti twanenako ya eluda nu kuta ukucita iviipe vino twacisile.—Belengini Mapinda 28:13.

10. I vyani ivingacitika ndi cakuti twafisa imembu zitu?

¹⁰ Ndi cakuti twanena ya eluda pa luyembu luno itucita, Yeova angatwelela nupya tungakwata ucuza usuma na aliwe nupya. Lelo ndi cakuti tutanenyile ya eluda, tungakwata intazi. Lino Devedi wafisile imembu zino wacisile, calenzile ukuti aye sana nu ulanda nu kuvwa uyi pa mulandu wakuti ucuza wakwe na Yeova wononike. (Masa. 32:​3-5) Wakwe vino cikaya ndi cakuti umuntu watalwala nanti ukucisika lyene wafilwa ukuombelapo zuwa, ali vino cikaya nu ku muntu uwatatonta muli vyakwe Leza, ndi cakuti ataombiilepo zuwa, ucuza wakwe na Yeova ungononeka. Yeova wamanya icisinka cii, nupya akatwama ukuti “tulanzyanye” nawe ukupitila umu kunenako ya eluda pakuti yatwazwe ukuzifya ucuza witu na aliwe.—Eza. 1:​5, 6, 18.

11. Uzye yauze yangaculilamo uli ndi cakuti twafisa uluyembu?

¹¹ Ndi cakuti tutanenyile ya eluda pa luyembu ulwipishe luno itucita, yauze yangaculilamo. Cingalenga umupasi wakwe Leza utaomba ningo umu cilongano nupya umu cilongano mutanga muye umutende. (Efes. 4:30) Nupya ndi cakuti twamanya ukuti umwi umu cilongano watacita uluyembu ulwipishe, tulinzile ukumunena ukuti akaneneko ya eluda.a Ukufisa uluyembu luno umuntu muze atacita kungalenga ukuti naswe kwene tuye nu mulandu. (Levi 5:1) Ukutemwa kuno twatemwa Yeova kulalenga tunene ya eluda icisinka. Ukucita vii, kulalenga icilongano ukuya icisanguluke nupya kulaazwa na atiyacita uluyembu ulwipishe ukuzifya ucuza wao na Yeova.

UZYE YA ELUDA YANGATWAZWA ULI?

12. Uzye ya eluda yangazwa uli yayo atonta muli ukapepa?

¹² Baibo ikanena ya eluda ukwazwa yayo aakulondekwa ukuzifya ucuza wao na Yeova. (1 Tesa. 5:14) Ndi cakuti imuyembuka, ya eluda yangamuzya mauzyo aangayazwa ukumanya vino mukuyuvwa na vino mukwelenganya. (Mapi. 20:5) Mungazwa ya eluda ndi cakuti mwayanena intazi ino mukweti ukwaula ukupita umu mbali nanti cakuti ukucita vivyo kungamutalila pa mulandu ni ntambi nanti mukuvwa insonyi pali vino vyacitike. Nupya mutalinzile ukusakamala ukuti mungatandika ukulanda “ivya cilandelande.” (Yobo 6:3) Ya eluda yatalamipingula zuwa lino yatatala yuvwa vino umulandu uli, lelo yalaitemelwa ukukutika kuli mwemwe pakuti yamanye ivisinka vyonsi lino yatatala yamupandako mano. (Mapi. 18:13) Ya eluda yamanya ukuti pakapita insita pakuti yamwazwe ukulingana nu wazwilizyo uno mukulondekwa, fwandi yamanya ukuti insita zimwi mungalanzyanya nayo pa miku iingi pakuti yamwazwe.

13. Uzye ya eluda yangatwazwa uli ukupitila umu mapepo yao alino nu kupanda mano ukwa muli Baibo? (Loliniko ni vikope.)

¹³ Ndi cakuti mwakomaana na ya eluda, ya eluda yatalalenga mwauvwa sana uyi pali vino mwacisile. Lelo yalamupepelako. Yeova alakutika uku mapepo yao ‘akwata sana amaka.’ Lino yakumwazwa yalamupaka “na mafuta umwi zina lyakwe Yeova.” (Yako. 5:​14-16) “Mafuta” yakalozya uku cumi icaya umwi Izwi Lyakwe Leza. Ukupitila muli vino yamanyikisha ningo Malembo, yalamwazwa nu kumiteekezya pakuti mungakwata ucuza usuma na Yeova nupya. (Eza. 57:18) Vino yalamupandako mano ukufuma muli Baibo vilamwazwa ukutwalilila ukucita ivilungame. Fwandi ukupitila muli ya eluda, muluvwa izwi lyakwe Yeova likumunena ukuti: “Yii ali nzila. Amuno mwapita.”—Eza. 30:21.

14. Ukulingana na Galatiya 6:​1, uzye ya eluda yakaazwa uli umuntu watatandika “ukucita iviipe”? (Loliniko ni vikope.)

¹⁴ Belengini Galatiya 6:1. Ndi cakuti Umwina Klistu watandika “ukucita iviipe,” ala asikucita ivintu ukulingana na vino Yeova akalonda. Ukucita iviipe kukalozya uku kukanapingula ningo pa vintu nanti ukucita uluyembu ulwipishe. Ya eluda Aina Klistu aaya nu kutemwa, ‘yakaezya ukulungika umuntu umu ufuuke.’ Izwi lya Cigiliki kuno yasenula izwi lyakuti “kulungika” yaliomvyanga uku kulondolola vino dokota wanyepelelanga ifupa ilyati likontoka pakuti lipole. Wakwe vino Dokota akaezya na amaka ukolola ifupa ilyati likontoka ukwaula ukuti umuntu auvwe sana ukuwaya, ali vino na ya eluda yakaika mano ukukwazwa umuntu ukuzifya ucuza wakwe na Yeova ukwaula ukulenga ukuti auvwe uyi. Baibo ikanena ya eluda ukuti yalinzile “ukucenjela.” Lino ya eluda yakwazwa umwi, nayo kwene yakaiusha ukuti yakaluvyanya. Fwandi yasielenganya ukuti alungami ukucila wino yakwazwa, lelo yakaicefya alino nu kuya ni cikuuku.—1 Pet. 3:8.

15. I vyani vino tungacita ndi cakuti itukwata intazi?

¹⁵ Tungataila ya eluda aaya umu cilongano. Yasambiliziwa ukusunga inkama kuli vyonsi vino tungayanena, ukutupandako mano ukulingana na vino Baibo ikalanda asi ukulingana na vino yakwelenganya, nu kutwalilila ukutwazwa ukumala intazi ino tukweti. (Mapi. 11:13; Gala. 6:2) Ya eluda yakwata imiyele ipusanepusane nupya yamwi iyalengela, yamwi nayo yatatala yalengela. Lelo mungalanda na eluda ali wensi apa ntazi ino mukweti. Ukuya kwene, tutanga tulenge uwazwilizyo kuli eluda wenga nupya ituya umu kulenga kuli eluda muze pakuti sile tuzane aamatunena vino tukulonda ukuvwa. Ndi cakuti tukucita vivyo ala tuli wa yantu aakalonda sile ukuvwa kuli vino “yakulonda ukuvwa” ukucila ukusambiliziwa “ivisambilizyo ivya mpomvu” ivyaya umwi Izwi lyakwe Leza. (2 Tim. 4:3) Ndi cakuti twanena eluda apa ntazi imwi, limwi angamuzya ndi cakuti mwanenako eluda muze na pali vino eluda wiyo wamwazwile. Nupya pa mulandu wakuti waicefya, limwi anguzyako eluda muze pakuti amupandeko mano.—Mapi. 13:10.

VINO SWEINECO TULINZILE UKUCITA

16. A maka ci yano swensi twakwata?

¹⁶ Nanti cakuti ya eluda yakasakamala imfwele zyakwe Leza, yasitunena vino tulinzile ukucita. Swensi kwene twakwata amaka akulanga ukuti twaipeela kuli Yeova ukupitila muli vino tukacita. Vino tukacita nu kulanda vilinzile ukulanga ukuti twatemwa Yeova. Nupya Yeova alatwazwa ukupingula ningo pa vintu alino nu kutwazwa ukutwalilila ukuya acisinka kuli aliwe. (Loma 14:12) Ali mulandu uno ya eluda yasitunenela ivya kucita, lelo yakaomvya Baibo ukutwazwa ukuvwikisha vino Yeova akaelenganya pa mulandu uwo pakuti tuisoolwele ivya kucita. Ndi cakuti tukulondela ukusunda ukwa muli Baibo kuno yakatupeela, tulamanya ivya “ukupusanya icisuma ni ciipe” lino tukupingula pa vintu.—Aeb. 5:14.

17. I vyani vino Yeova akalonda twacita?

¹⁷ Tukataizya sana pali vino Yeova akatusakamala wakwe vino kacema akasakamala imfwele zyakwe. Yeova watupeela “kacema musuma” kuli kuti Yesu, wino wizile atufwila pakuti tukwate ishuko ilya kwikala amanda pe. (Yoa. 10:11) Nupya ukupitila muli ya eluda amu cilongano ca Ina Klistu, Yeova wafikilizya ulayo wakwe uwakuti: “Ndamupeela ya kacema aalacita ukulonda kwane, nupya yalaamusambilizya ukuya na mano nu kwiluka.” (Yele. 3:15) Ndi cakuti itutonta muli ukapepa, tutalinzile ukusitooka ukulenga uwazwilizyo kuli ya eluda. Ndi cakuti twacita vivyo, lyene tulalola vino Yeova akuomvya ya eluda uku kutwazwa.