Impiya Izingi Sana Iziomviwa Uku Nkondo—Uzye Iimpiya Zitupu Izikoononwa?

Impiya izyaomviwa uku nkondo izingi sana.

• “Mauteeko amu nsi yonsi iyaomvya impiya izingi sana uku nkondo ($2.2 trillion). Impiya zii izivula ukucila izikaomviwa uku nkondo cila mwaka.”—The Washington Post, Febuluwale 13, 2024.

Kuli na vyuze ivyacitika ukucila pa kuomvya impiya zii. Lolini vimwi ivyacitika uku nkondo yaku Ukraine.

• Asilika. Catunganyiziwa ukuti, asilika umupipi na 500,000 yayakoma nanti ukuyacisa, apa myaka ili iyatipita lino kwali inkondo.

• Asi asilika. Ukulingana na vino akaungwe ka United Nations kalanzile asi asilika ukucila pali 28,000 yayakoma nanti ukuyacisa. Nomba umukalamba uwa mu kaungwe ka UN walanzile ukuti: “Kuli intazi na zyuze izingi sana iziiza pa mulandu ni nkondo zino tutanga tukwanisye ukulanda.”a

Intazi izyacitika pa mulandu ni nkondo alino ni vimvulunganya izingi sana.

• 114 milyoni. Aali mpendwa ya antu autuka kuno yakaikala pa mulandu ni nkondo nanti ivimvulunganya ukufika umu Sepetemba 2023.

• 783 milyoni. Aali yantu aakucula pa mulandu ni cipowe. Kaungwe kamwi (World Food Programme) kalanzile ukuti “ivimvulunganya ali vino vikulenga sana ukuti kwaya inzala, pa antu aakucula ni inzala, antu ukufika kuli 70 pesenti inkondo alino ni vimvulunganya ivyalenga ukuti yacula ni inzala.”

Uzya inkondo ilatala isile? Uzye kwaya upaalilo wakuti kulaya umutende? Uzye ivintu ivyaya umu nsi ii vilatala viomviwe pa kumala Inzala? Uzye Baibo yalandapo uli?

Insita ya nkondo

Baibo yasoowile pa kuvula kwa nkondo, yaomvizye uwakwela pa mfwalasi pa kulanda pa nkondo.

• “Nupya naweni imfwalasi iyenzu ikwiza, nu wakwezilepo wapeezilwe maka ya kufumya umutende pano nsi pakuti antu yakomana, nupya wapeezilwe nu lupanga ulukalamba.”—Kusokolola 6:4.

Uwakwela pa mfwalasi ii wakonkana na yauze yaili aakaimililako inzala alino ni imfwa pa mulandu ni cikuko nanti vintu vyuze. (Kusokolola 6:5-8) Pakuti mumanyilepo na vyuze pa usesemo uu alino ni vingalenga tusininkizye ukuti ukufikiliziwa ndakai belengini icipande icakuti “Aonsi Yani Akwela pa Mfwalasi—Aaweni?”

Insita ya ku nkoleelo iya mutende

Likwene sile ivintu vya mu nsi vitalaaomviwa uku nkondo. Nomba asi antu aalalenga ukuti vii vicitike. Baibo ikati:

• Leza alalesya “inkondo pano nsi yonsi.”—Masamu 46:9.

• Leza alasisyapo intazi zyonsi zino antu yakapitamo pa mulandu ni nkondo. “alayakumbula aminsozi yonsi, kutalaya imfwa, kutalaya ukuloosya nanti ukulila nanti ukuvwa ukuwaika. Ivintu vya mpiti vyativipita.”—Kusokolola 21:4.

• Leza alalenga ukuti antu yonsi yaye nu mutende. “Umu mpanga ya antu yakwe Leza mulaya umutende nu kucingililwa, na antu yakwe nayo kwene yatalalola nanti cimwi ica kuyasakamika.”—Ezaya 32:18.

Ukulingana na vino Baibo ikalanda inkondo alino ni vintu vyuze vino tukalola ndakai vikalangilila ukuti likwene sile kwasya kuye umutende.

Uzye Leza alacita uli pa kuleta umutende? Alaomvya Uwene wakwe uwa kwi iyulu. (Mateo 6:10) Pakuti mumanye uwene kwene uu alino na vino wamukuma, tambini ka vidyo akipi akakuti uzye uwene wakwe Leza icani?