Uzye Ya Nte Yakwe Yeova Yakalola Uli Ukutaana?
Tukauvwila vino Baibo ikaalanda pa cupo na pa kutaana. Leza wisileko icupo kuti umonsi nu mwanaci yatwalilile ukuya pamwi. Uzelele ali cintu cino Baibo yalanda ukuti icingalenga sile aatwalane ukutaana.—Mateo 19:5, 6, 9.
Uzye kwaya ivikaazwa ya Nte aatwalane aakweti intazi umu cupo cao?
Ee, kwaya ivingi vikayazwa:
Mpapulo. Impapulo zii izikafuma cila nsita zikaazwa aatwalane, kumwi sile na yayo aakweti intazi izikuloleka ukuti zitanga zisile. Wakwe, lolini cipande cakuti: “Kuipeelesya,” ni cakuti “Kweleela,” muli Zyukini! Na. 2 2018.
Kulongana. Tukasambilila ivyeo vya muli Baibo ivingaazwa aatwalane lino tuli pa kulongana kwa pa cilongano, ku ukongano wa ciputulwa nanti wa citungu.
Ya eluda. Ya eluda yakaomvya malembo pa kwazwa aatwalane, wakwe lembo lyakwe Efeso 5:22-25.
Uzye ya eluda yalinzile ukuzumilizya ukuti ya Nte yataane?
Awe. Nanti cakuti yakaazwa aatwalane aakweti intazi mu cupo cao, yatakwata insambu yakunena aatwalane ivyakucita. (Galatiya 6:5) Lelo ndi cakuti yamwi yasoololapo ukutaana ukwaula umulandu wa mu malembo, yasikwata untungwa uwa kutwala nanti ukutwalwa nupya.—1 Timoti 3:1, 5, 12.
Uzye ya Nte yakalola uli ukupaalukana?
Baibo ikakomelezya aatwalane ukutwalilila ukuya pamwi usi mulandu ni intazi zino yakweti. (1 Kolinto 7:10-16) Intazi zingi zingasila ndi cakuti tukupepa sana, kuomvya ivisinte vya muli Baibo, alino nu kulanga ukutemwa.—1 Kolinto 13:4-8; Galatiya 5:22.
Nomba, Aina Klistu yamwi yasoololapo ukupaalukana na ya wao pa mulandu ni milandu ikalamba wakwe yii:
Kukanasakamala ulupwa uku mufulo sile.—1 Timoti 5:8.
Kuuma sana wino umwi watwalana nawe.—Masamu 11:5.
Kulenga ukapepa wakwe umwi ukuya sana umu uzanzo. Wakwe, iya nanti umuci angaapatikizya wino watwalana nawe ukukanauvwila isunde umu nzila imwi nupya wino iyapatikizya ukucita vimwi, limwi angapingulapo ukuti ukupaalukana ali nzila sile ino angaomvya pa “ukuvwila Leza ukucila ukuvwila antu.”—Milimo 5:29.