Uzye Baibo Ikalandapo Uli pa Kupeela?
Vino Baibo yalandapo
Baibo ikatunena ukuti tulinzile ukuiteyanya ukulapeelako anji vino tukweti nu kuti tulinzile ukucita vivyo ala tukwelenganya pa visuma. Ikalanda nu kuti yonsi yoili, aakupeela kumwi na aakupokelela yakaya ni nsansa. (Mapinda 11:25; Luka 6:38) Yesu walanzile ati: “Mukupeela mwaya upolelelo ukulu cuze kuluta mukupokelela!”—Milimo 20:35.
A lilaci lino ukupeela kukalenga Leza ukusekelela?
Ukupeela kukalenga Leza ukusekelela ndi cakuti aakupeela akupeela umu kuitemelwa. Baibo ikalanda ukuti: “Cila muntu alinzile kupeela kulingana na vino wataipingula umwisikulu kwaula kusiima nanti kupatikiziwa. Pano Leza watemwa muntu wino akapela ni nsansa.”—2 Kolinto 9:7.
Ukupeela ukufuma pansi ya mwenzo kwaya pa “upefi uno Leza Tata akalola ukuti uwa mpomvu.” (Yakobo 1:27) Umuntu aakaitemelwa ukwazwa yayo akulondekwa uwazwilizyo, akaombela pamwi na Leza, wiyo aakalola ya kapekape ukuti yakumukongwesya. (Mapinda 19:17) Baibo ikatusambilizya ukuti Leza umwineco alawezezya yao akapeela yauze.—Luka 14:12-14.
A lilaci lino ukupeela kusilenga Leza ukusekelela?
Ndi cakuti aakupeela akupeela na ukaitemwe. Mu kupeela na ukaitemwe mwaya na vii:
Ukupeela kuti azanzye antu.—Mateo 6:2.
Ukupeela pakuti nawe yace yamupeele.—Luka 14:12-14.
Ukupeela pakuti ace apusuke.—Masamu 49:6, 7.
Ndi cakuti uwila uwo ukuomviwa ku vintu vino Leza wapata. Citanga cizipe ukupeela umuntu impiya izya kuomvya umu vyangalo vya kusitika nanti ku milembo ikavulunganya uwongo nanti ukuziomvya kuli ucakolwa. (1 Kolinto 6:9, 10; 2 Kolinto 7:1) Nupya citanga cizipe ukupeela umuntu akweti amaka yakuisakamala mu mikalile nomba akukana sile ukuomba uku mufulo.—2 Tesalonika 3:10.
Ndi cakuti tukupeela ukucila mu cipimo icakuti itufilwa nu kusakamala ya lupwa itu. Baibo ikasambilizya ukuti imitwe ya ndupwa yalinzile ukusakamala amu ng’anda muli vino yakulondekwa. (1 Timoti 5:8) Citanga cizipe umutwe wa lupwa ndi wika amano ku kupeela antu yauze nu kulekelezya ulupwa lwakwe. Vikwene avino Yesu walanzile na pali yayo akakana ukusakamala avyazi yao akote ku mufulo sile nu kulanda ukuti ivyuma vyao ‘yapeela kuli Leza.’—Mako 7:9-13.