Kupanga Mavidyo ya pa Ukongano wa Citungu Uwa mu 2020 Uwakuti “Mwaya nu Luzango Lyonsi”!

Mavidyo aa pa Ukongano wa Citungu yakatufika pa myenzo nupya yakatwavwa ukuvwikisya vino Baibo ikasambilizya. Apa Ukongano wa Citungu uwakuti “Mwaya nu Luzango Lyonsi”! paali mavidyo 114, ukwikako sile na malyasi 43 aalanzilwe na aa mwi Iumba Ilikatungulula na ya kazwa yao. Uzye mwatala mwelengaya vino aina yaombisye alino ni impiya izyaomviwe pa kupanga mavidyo yaa?

Aina na ya nkazi umupiipi na 900 yaipeelisye ukuomvya insita yao ni milimo ino yamanya ukwazwilizya ukuti tupange puloglamu yonsi. Pa kumalilila umulimo uwayasendile imyaka ukucila pali iili yamazile amaawazi mupiipi na 100,000. Mu nsita kwene ii u mwali na maawazi 70,000 yano yaomvizye pa kuombela pa cangalo ca mu Baibo ca mamineti 76 icakweti umutwe wakuti Neemiya: “Luzango Luno Yeova Akatupeela Lukatukomelezya.”

Kuya kwene kwalondekwanga impiya izingi izya kuomvya pa kusakamala aomvi akuitemelwa aomvile umulimo uu, kuyatungilila, kuyapeela iviombelo alino ni ncende ukwali nu kuombelwa umulimo uu.

“Aa muli Komiti ya Mulimo wa Kusambilizya ii Iiumba Ilikatungulula yakalondesya ukuomvya antu apusanepusane ni ncende zipusanepusane lino yakukopa mavidyo. Ya Jared Gossman akaombela uku Kukopa Mazwi na Mavidyo yalanzile iyati: “Tukacita vii pa mulandu wakuti twaya ulupwa longa umu nsi yonsi nupya tukalonda ukulanga vivyo nu mu mavidyo kwene.” “Pa kuti tukwanisye ukuomba umulimo uu, twapanzile maumba 24 umu mpanga 11 aombiile pamwi umulimo uu. Kwalondekwanga impiya izingi, ukupekanga ningo, nu utunguluzi usuma pakuti antu umu mpanga izipusanepusane yaombele pamwi.”

Pakuti tupange amavidyo aingi, tukalondekwa iviombelo ivyakuomvya uku mavidyo kwene yayo alino ni ncende. Wakwe, pa kupanga vidyo iyakuti Neemiya: “Luzango Luno Yeova Akatupeela Lukatukomelezya,” twaomvizye incende ya mu cikuulwa ca kukopelamo ica ku Mt. Ebo icayela mupiipi nu ku Patterson, mu New York, ku U.S.A. Pakuti yaomvye ningo impiya izikasangulwa, lelo pa nsita ili imwi kwene yalenge ivyali muli vidyo viloleke wakwe vivi kwene ivyaliko mpiti, aina yapanzile vimwi ivyalolekanga wa viumba vya musumba uwa Yelusalemu uwaliko mpiti. Pa kupanga ivintu vii yaomvizye imbao izyatalimfile mamita 6 alino ikako vimwi ivyakozile makusyoni nu kuvipenta pakuti vyaloleka kwati iwe. Viumba vivyo yavipanzile umu musango wakuti yangavisezya nu kuvitwala kuze kuno yakukopela, pakuti impendwa ya vintu ivyalondekwanga itavula sana. Lelo nanti ciye vivyo, impiya izyaomviwe pakuti yapange ivyalondekwanga pa kupanga icangalo citupu, zyali umupiipi na madola 100,000 (U.S.).a

Kumanyako vimwi ivyacitike pa kupekanya ukongano, kwalenga twataizya na sana pa ukongano wa mwaka uu. Itutaila ukuti vino aina na ya nkazi yaombisye pa kupekanya ukongano uu vimalenga ukuti antu mu nsi yonsi yalumbanya Yeova. Tukumutaizya sana pa misangulo inu iya kuitemelwa ino mukasangula uku mulimo wa mu nsi yonsi ukuomvya donate.jw.org. nanti inzila zyuze.