Aakazanwa Ukwi Sukulu Lya Gilyadi Yakafuma Umu Ncende Zipusanepusane mu Nsi Yonsi

Cila mwaka, aomvi yamwi aaya mu mulimo uwa nsita yonsi uiyeele ukufuma umu nsi yonsi, yakayaama ukwi Sukulu Lya Baibo Ilya Gilyadi ilikaela uku Maofesi Yakalamba Ukukayela Masukulu ya Mwi Uvi, ku Patterson, mu New York.a Aakaya ukwi sukulu lii, yakasambiliziwa vino yangaomba ningo imilimo ino yapeelwa umwi uvi lyakwe Yeova. Vino yakasambilila vikayazwa ukulakomelezya aa mu vilongano na aomvi ya pa misambo mu nsi yonsi.

Umu cumi Gilyadi i sukulu lya mu nsi yonsi. Wakwe, isukulu lyalenga 147 ilyaliko umu 2019, mwali asambi 56, aafumile umu mpanga 29. Aakazanwa ukwi sukulu lya Gilyadi aayayo aya umu mulimo wa nsita yonsi uiyele, wakwe, aya pa Betele, angalizi ya viputulwa, ya misyonali, na ya painiya aiyele.

Yakatandika ukupekanya vino isukulu lilaya ala kucili insita ukuti sukulu litandike. Wakwe, Dipatimenti Iikaombela ku Vya Mipitile iyaela uku maofesi yakalamba mu nsi yonsi ikakala matiketi yakwe yonsi yano iyaamwa kuti yakazanwe ukwi sukulu. Wakwe, aina na ya nkazi aa ku mpanga zyuze yano yaamile ukwi sukulu lya Gilyadi lyalenga 147 yayalipilile impiya madola 1,075 kuya uku Patterson nu kuswilila ukumwao. Asambi aafumile uku Solomon Islands yakwezile indeke pali 4 pakuti yakafike uku Patterson, na pa kuswilila ukumwao napo yakwezile indeke patatu kuli kuti yapisile makilomita kucila pali 35,400 yonsi pamwi. Cila musambi yamulipililanga impiya madola 2,300. Pakuti yaomvye impiya izilinge, Dipatimenti Iikaombela ku Vya Mipitile iyaela uku maofesi yakalamba ikaomvya puloglamu iya pa compyuta pakuti yazane mitengo ya matiketi ilinge. Pa cisila ica kuzana matiketi alinge umutengo, puloglamu iyo ikatwalilila ukulondelezya pa milungu nanti imyezi pakuti yamanye ndi cakuti mitengo itiwelako. Aa muli Dipatimenti Iikaombela ku Vya Mipitile iyaela uku maofesi yakalamba yakaomvya nsonsela wino yamwi yakasangwilako, pakuti yakale matiketi.

Asambi aingi yakalondekwa ivitupa pakuti yaye uku United States. Fwandi Dipatimenti Iikalolekesya pa Milandu iyayela uku maofesi yakalamba ikaazwilizya asambi ukukwata ivitupa. Pakuti cila musambi akwate icitupa alino nu kulembesya ilingi yakaomvya impiya kufika uku madola 510.

Uzye masambililo yano aakaya ukwi Sukulu Lya Gilyadi yakasambilila yakatwazwa uli swensi? Umwina Hendra Gunawan eluda aakaikala uku Asia, waya umu cilongano umwaya atwalane aile ukwi Sukulu Lya Gilyadi. Walanzile ukuti: “Mpiti mu cilongano citu mutali ya painiya ya nsita yonsi. Nomba lino atwalane yaa izile, ukuombesya kwao alino na vino yaipeelesyanga vyalenzile ukuti yamwi umu cilongano citu yatandike upaniya. Lyene pa cisila, nkazi umwi uwa mu cilongano citu waile azanwa ukwi Sukulu Lyakwe ya Kakosoola ya Wene!”

Ya Sergio Panjaitan aakaombela pamwi na aaile uku Gilyadi pa musambo wa ku Asia. Yatiile: “Ivyeo vino yasambilile visiazwa sile aliyo, lelo vikatwazwa naswe kwene. Yasambilile ivingi sana! Lelo ukucila ukulailola ukuti yacindama sana ukucila yauze pa mulandu na vino yasambilila, yakanenako yauze vino yasambilila. Cico cikatukomelezya sana nupya naswe tukakomelezyako yauze.”

Uzye impiya izikalondekwa lino kwaya isukulu lii zikafuma kwi? Zikafuma pa misangulo iya mu nsi yonsi, ino aingi yakasangula ukuomvya inzila zimwi izya pa donate.jw.org. Tukumutaizya pali ukapekape winu uukatungilila isukulu lii ukukaya antu aakafuma umu ncende izipusanepusane pano nsi.