Ukwazwilizya Aina Umu Nsi Yonsi Lino Kuli Ulwale Uwipisye

Mu Maaci 2020, lino Akaungwe Akakalolekesya pa Umi wa Yantu mu Nsi Yonsi kamanyisizye ukuti kuli ulwale wakwe COVID-19 umu nsi yonsi, aingi yatelenginyepo ukuti kazizi kakwe kolona kangasalangana nu kutwalilila ukuyako kucila pa mwaka onga. Pa mulandu nu ulwale uu, antu aingi ukwikako na ya Nte Yakwe Yeova kwene yakukwata intazi lwa kumwili, mu melenganyo alino nu kuulizya impiya. Uzye ya Nte Yakwe Yeova yakacita uli pa kwazwilizya antu?

Ukwazwilizizya Aakulondekwa Uwazwilizyo

Pa mulandu nu ulwale wakwe COVID-19, Komiti Iikalolekesya Pali Vino Vikumile ya Nte Yakwe Yeova Iiumba Likatungulula yazumilizye ukuti kupangwe Makomiti Aakwazwilizya Atiyaponelwa na Mazanzo ali 950. Umu ncende zimwi, aa mu makomiti yaa yapekinye ukuti aina aa ku ncende kwene ukukulondekwa uwazwilizyo yazwilizye aina, lelo umu ncende zimwi zyene ya Nte yapokelile uwazwilizyo kufuma uku uteeko. Nupya aa mu Makomiti Aakwazwilizya Atiyaponelwa na Mazanzo yaombisye ukwazwilizya antu aingi.

Wakwe, lolini ivyacitike uku Paraguay. Nyuzipepa imwi yalondolwile ukuti ukuulizya impiya pa mulandu nu ulwale uwipisye kwalenga “antu aingi mu Paraguay ukukanakwata ivyakulya pa mang’anda yao.” Lelo aa mu Makomiti Aakwazwilizya Atiyaponelwa na Mazanzo yatandike ukupeela aina vino yangaomvya pa milungu iili kuli kuti ivyakulya ivilinge, ivyakuzifizyako, alino ni vyakuomvya pakuti yaye nu umi usuma ivingaomviwa na aa mu lupwa aya 4. Vintu vii vino yakapeela cila lupwa vikakalwa pa mpiya umupiipi na madola 30.

Uzye aakaazwilizya atiyaponelwa na mazanzo yakaicingilila uli pakuti yatalwala ulwale wakwe COVID-19? Yakazwala utusalu twa kucinga pa mpuno na pa kanwa nupya yasipalamana sana na antu. Nupya yakasininkizya ukuti makampani yano yakukalako ivyakulya yakuvipekanyizizya umu ncende iya usaka nupya yakulondela masunde aakalanda pa kuicingilila. Pa vintu vivyo paya nu kusininkizya ukuti antu yano yakulonga ivintu vino iyakala iyazwala ivyakuzwala ivyakuicingilila, kuzifya imyotoka zyao, alino nu kwika ivintu vivyo pa ncende zino iyazifya. Nu mukusyalikizya, yano yakutwala ivintu vivyo yasipalamana na ina aakuvipokelela.

Ukuomvya Ningo Sana Imisangulo

Lino cafikanga umu Januwale 2021, aa muli Komiti Iikalolekesya Pali Vino Vikumile ya Nte Yakwe Yeova yazumilizye ukuti impiya ukucila pa madola 25 milyoni ziomviwe uku kwazwilizizyako atiyaponelwa na mazanzo lino kuli ulwale uu wakwe COVID-19. Aa mu misambo na aa mu makomiti yakaezya na maka pakuti yazane ivintu ivilinge umutengo. Wakwe, uku Chile aina yalondanga ukukala intonga makiloglamu 750. Nomba umu mwezi sile onga umutengo wa tonga wakuzile sana. Lino papisile maawazi yaili kufuma pano yazumilizyanyizizye ukuti yamakala pa mutengo ukome kwene, uwakazyanga wayamanyisizye ukuti umwi wawezizye intonga zino wakazile. Fwandi mu cifulo cakuyakazya intonga pa mutengo ukome, uwakazyanga wakazizye aina intonga zino yamwi yawezizye pa mutengo utonte uno wakazizyangapo mu mwezi wa ku cisila.

Nomba lino aina yaile umukusenda vino yakazile, uwakazyanga wakasi akane ukuyakazya pano wayapeezile umulandu wakuti yasiya nu mulinganya lino yakwankanya ivyakulya wakwe vino na aa mu tuungwe tuze yakacita. Pa cisila ica kupepa umu mwenzo, umwina umwi pa ina aile umu kusenda intonga wanenyile uwakazyanga ukuti iyalondelezya muli cila cilongano nu kumanya aakulondekwa sana uwazwilizyo. Nupya aina yalondolwile nu kuti pa mulandu nu kupusana kwa nkulilo, yali nu kupeela ivyakulya kuli cila lupwa ukulingana na vino lungaomvya sana. Nu mukusyalikizya, yanenyile uwakazyanga ukuti impiya izikaomviwa, a zino ya Nte Yakwe Yeova yakaitemelwa ukusangwilako alino yakaitemelwa sile ukuomba. Uvwile ningo sana. Nupya atapelelile sile pa kuyacefyezya umutengo, lelo wayalundilepo ni intonga makiloglamu 400 lino yaswilile nupya umukukala.

“Ivyakumanyilako Ukutemwa Kwa Cumi”

Ya Lusu ya mukamfwilwa acikoloci aakaikala uku Liberia yakaikala pamwi na ya lupwa yao aali 5. Wanda umwi katondo, pa cisila ica kusambilila Ilembo lya wanda nu kulya icakulya ica katondo, mwizikulu wakwe ya Lusu waweni ukuti ivyakulya umu ng’anda ivisila. Lyene uzizye ati: “Uzye tukwizatulye vyani?” Ya Lusu yamunenyile ukuti iyapepa mpiti kuli Yeova nupya iyataila nu kuti Yeova amayapeela ivyakulya. Wanda kwene uwa umusanya, ya eluda yatumiile ya Lusu foni nu kuyanena ukuti yaye yakasende ivyakulya. Yalanzile iyati: “Umwizikulu wane walanzile ukuti lyene namanya ukuti Yeova akauvwa mapepo pano wataasuka ipepo lyane.”

Umwanaci umwi uwa ku Democratic Republic of Congo akaikala umupiipi na ya Nte. Lino waweni ya Nte yamwi yatwalila ya Nte yano wapalamine nayo ivyakulya, walanzile ukuti: “Nga ulwale uu uwipisye wasila, nani ndaya Inte Yakwe Yeova pano ya Nte yakusakamalana umu nsita yii itale.” Iya wakwe wamuzizye ati, “Uzye ukulonda ukuya Inte Yakwe Yeova pa mulandu ni saka lya mupunga?” Nawe waswike ati, “Awe foo, nomba isaka lya mupunga likulangilila sile ukuti yakwata ukutemwa kwa cumi.”

Ya Nte Yakwe Yeova yakukwanisya ukwazwilizya aina na ya nkazi aakulondekwa uwazwillizyo pa nsita ino kuli ulwale uu pa mulandu ni misangulo inu iyakuitemelwa. Tukataizya sana pa misangulo ino mukasangwilako ukuomvya inzila izyaya pa donate.jw.org.