1 Milandu

14 Umwene Hilamu uwa ku Tuli watumile antu kuli Devedi kuti yatwale imbao zya mikedali, na aakuputula amawe* na ya kawaza kuti yakamukuulile ing’anda.* 2 Nupya Devedi wamanyile ukuti Yeova u walenzile ukuti aye umwene wa Ina Izlaeli, pano uwene wakwe walumbwike pa mulandu na Ina Izlaeli antu yakwe Leza.

3 Devedi watwazile anaci aingi umu Yelusalemu nupya wizile akwata ana aingi aonsi na akazyana. 4 Ana yakwe aavyaliilwe umu Yelusalemu aeya: Syamua, Syobabu, Natani, Solomoni, 5 Ibaala, Elisyua, Elipeleti, 6 Noga, Nefegi, Yafiya, 7 Elisyama, Beeliyada, na Elifeleti.

8 Lino Aina Filisti yuvwile ukuti Devedi watasontwa ukuya umwene wa Ina Izlaeli, Aina Filisti yonsi yaile umu kumulonda. Lino Devedi uvwile vivyo waile umu kuyalwisya. 9 Lyene Aina Filisti yaile nu kutandika ukuzanza antu aikalanga umu Mukonko wa Ina Lefa. 10 Devedi uzizye kuli Leza ati: “Uzye inje umu kulwisya Aina Filisti? Uzye umayapeela kuli nene?” Lyene Yeova wamwaswike ati: “Yanga, pano nimayapeela kuli wewe.” 11 Fwandi Devedi waile uku Baali-pelazimu nu kukoma Aina Filisti. Nupya walanzile ati: “Leza wa cumi watangavwa ukucimvya alwani yane wakwe vino manzi yakaponya iciumba.” Aali mulandu uno yatemeliile incende iiya ukuti Baali-pelazimu.* 12 Aina Filisti yasile ya leza yao kuuku kwene, nupya lino Devedi walanzile ukuti yoce ya leza yayo umu moto, yacisile vivyo kwene.

13 Lino papisile insita Aina Filisti yawezile umu kuzanza aikalanga umu mukonko wa Ina Lefa. 14 Nupya Devedi uzizye kuli Leza, lelo Leza wa cumi wamunenyile ati: “Utayalungama. Uye ukwi tundu lyao nu kuyalwisizya pa nkoleelo ya miti ya baka. 15 Nupya ndi cakuti uvwa icongo papela ya miti ya baka kwati antu yakupita, uyazanze pano ala Leza wa cumi watakukoleelela uku kukoma asilika ya Ina Filisti.” 16 Fwandi Devedi wacisile viivi kwene vino Leza wa cumi wamunenyile, nupya Aina Izlaeli yakomile Aina Filisti ukutandikila uku Gibyoni ukufika uku Gezeli. 17 Devedi walumbwike umu mpanga zyonsi, nupya Yeova walesile ukuti inko zyonsi zyamutiina.