1 Milandu
19 Pa cisila Nahasyi umwene wa Ina Amoni wafwile, nupya umwanakwe u wamupyanyile pa wene. 2 Lyene Devedi walanzile ati: “Ndalanga ukutemwa kwa cumi kuli Hanuni mwana Nahasyi pa mulandu na vino isi wandanzile ukutemwa kwa cumi.” Fwandi Devedi watumile aomvi yakwe kuli Hanuni pakuti yakamuteekezye pa mfwa yakwe isi. Nomba lino aomvi yakwe Devedi yafisile umu mpanga ya Ina Amoni kuti yakateekezye Hanuni, 3 ya cilolo ya Ina Amoni yanenyile Hanuni iyati: “Uzye ukwelenganya ukuti Devedi watatuma aakwizakuteekezya pakuti acindike tata wako? Uzye atatumile aomvi yakwe pakuti ize yalondelezye nu kukufumya pa wene alino nu kuceeceta impanga?” 4 Fwandi Hanuni walemile aomvi yakwe Devedi nu kuyapela nupya wayalepwilile ivyakuzwala vyao ukufuma pansi kufika uku matako ayazinga nu kuyazinga. 5 Lino Devedi uvwile ivyacitikile aomvi yakwe, lilyo kwene sile watumile aakuti yakayakomenkanye, pano alanga iyazewana sana; nupya wayanenyile ati: “Mwikale umu Yeliko kufikila ivilezu vikakule alino muce muwele.”
6 Mu kuya kwa nsita Hanuni na Ina Amoni izile iyalola ukuti Devedi watayapata, fwandi yatumile matalanti yakwe siuva 1,000 uku Mesopotamya, ku Alamu-maaka nu ku Zoba kuti yayazime maceleta na asilika aakakwela pa mfwalasi. 7 Fwandi yazime maceleta 32,000 nupya umwene wa Ina Maaka na antu yakwe yaile umu kuyazwa. Lyene izile nu kupanga inkambi uku Medeba. Aina Amoni yakolongine ukufuma umu misumba yao nupya izile umu kulwa.
8 Lino Devedi uvwile vivyo, watumile Yoabu pamwi na asilika yonsi ukwikako sile na asilika yakwe aamaka sana. 9 Lyene Aina Amoni yaile iyatantama pa mpongolo ya musumba ala ya mwene aile umu kuyazwa yaali uku ncende iwatuke.
10 Lino Yoabu waweni alwani yakwiza umu kumulwisya kufuma uku nkoleelo nu ku cisila, wasoolwile asilika yamwi ukufuma pa yasilika amanyikisye ivya ulwi pa Ina Izlaeli nupya wayatantike umu maumba pakuti yakomenkanye Aina Silya. 11 Nupya walesile ukuti Abisyai umwinakwe aliwe atungulule asilika asyala, pakuti ayatantike umu maumba uku kukomenkanya Aina Amoni. 12 Lyene Yoabu walanzile ati: “Ndi cakuti Aina Silya yakwatisya maka wize ungazwe; lelo ndi cakuti Aina Amoni aliyo yakwatisya maka namaiza nkwazwe. 13 Tulinzile ukuya akome nupya asipe pakuti tucingilile antu itu ni misumba yakwe Leza witu, nupya Yeova amacita cino akulola ukuti ali cisuma.”
14 Lyene Yoabu na antu yakwe yatandike ukuya umu kukomenkanya Aina Silya pakuti yalwe nayo, nupya Aina Silya yutwike. 15 Lino Aina Amoni yaweni ukuti Aina Silya yutuka, nayo kwene yutwike ukufuma kuli Abisyai umwinakwe nu kuya umu musumba. Pa cisila Yoabu waswilile uku Yelusalemu.
16 Lino Aina Silya yaweni ukuti yacimviwa uku Ina Izlaeli, yatumile aakuyaama Aina Silya aikalanga umu ncende ya Luzi,* nupya Syofaki umukalamba wa yasilika yakwe Hadadeza u wayatungululanga.
17 Lino yanenyile Devedi ilyasi lilyo, lilyo kwene sile wakolonganike Aina Izlaeli yonsi nu kulamba Uluzi Lwa Yodani iyaya kuli aliyo, nupya yatantime umu maumba kuti yayalwisye. Devedi wayatantike kuti yakakomenkanye Aina Silya, nayo yaile iyamulwisya. 18 Lelo Aina Silya yutwike ukufuma uku Ina Izlaeli nupya Devedi wakomile aonsi 7,000 aali pa maceleta na asilika 40,000 aapitanga ulwa pansi, nupya wakomile na Syofaki umukalamba wa yasilika. 19 Lino aomvi yakwe Hadadeza yaweni ukuti yacimviwa uku Ina Izlaeli, lilyo kwene sile yapanzile umutende na Devedi nupya aliwe watandike ukuyatungulula; nupya Aina Silya yatalondanga ukwazwa Aina Amoni nupya.