2 Milandu
27 Yotamu wali ni myaka 25 lino watandike ukuteeka, nupya wateesile pa myaka 16 umu Yelusalemu. Nyina wali a Yelusya mwana Zadoki. 2 Wazanzyanga Yeova wakwe vino Uziya isi wacisile, nupya wene atakolinye vino isi wacisile ivya kwingila umwi tempele lyakwe Yeova ukwaula ukuzumiliziwa. Lelo antu yatwalilile ukucita iviipe. 3 Wapanzile ni mpongolo ya papela pa ng’anda yakwe Yeova, nupya wakuuzile ni linga lya Ofeli. 4 Wakuuzile ni misumba umu ncende ya myamba yakwe Yuda alino ni misumba ya malinga ni vikuulwa ivitali umu mitengo. 5 Waile umu kulwa nu mwene wa Ina Amoni nupya waile amucimvya, lyene umu mwaka kwene uwo Aina Amoni yamupeezile matalanti* yakwe siuva 100, makilogilamu 1,600,000 aa ngaano na makilogilamu 1,700,000 yakwe baale. Nupya iizile iyamupeela ivintu vivyo nu mu mwaka wakwe ciili na wakwe citatu. 6 Yotamu wakwatilangako maka, pano walondelanga masunde yakwe Yeova Leza wakwe.
7 Ilyasi lyonsi iyasyala ilikalanda pali Yotamu na pa nkondo zino walwile alino na pali vyonsi vino wacisile, lyalembwa umwi buku ilikalanda pali ya mwene ya mu Izlaeli nu mu Yuda. 8 Wali ni myaka 25 lino watandike ukuteeka, nupya wateesile imyaka 16 umu Yelusalemu. 9 Lyene wafwile nu kuziikwa ukwalaala ivikolwe vyakwe umu Musumba Wakwe Devedi. Nupya Ahazi umwanakwe u wamupyanyile pa wene.