Ezaya
3 Lolini! Umwene wa cumi Yeova wa maumba,
Amata ukutungilila Yelusalemu na Yuda,
Kuli kuti amata ukuyapeela ivyakulya na manzi,
2 Kumwi na aonsi ya maka na asilika,
Ya kapingula na ya kasesema, aakasowela ivya ku nkoleelo na akalamba,
3 Intunguluzi zya pa yantu 50, antu acindikwe, ni mpandamano,
Aamanyikisya ivya maleele na amanyikisya ivya kucinya inzoka ukuomvya inyimbo.
4 Ndalenga alumendo ukuya ya cilolo yao,
Na aatatailwa kuti aliyo yayateeka.
5 Antu yalaacuzya auze,
Cila muntu alaacuzya umuntu muze.
Mulumendo alacisa umukote
Nu muntu uwa sile sile alatuka umucindikwe.
6 Cila muntu alalemelela umwina uwa mu ng’anda yakwe isi nu kumunena ati:
“Wakwata icakuzwala icicindame, fwandi tuteekange.
Uwasakamala matongwa yaa.”
7 Lelo alakana nu kulanda ati:
“Ntalaya uwa kumunyepela ivilonda;
Ntakweti ivyakulya ni vyakuzwala
Mutaleka inje kateeka wa yantu.”
8 Yelusalemu watapumika,
Yuda nawe watapona,
Pa mulandu wakuti iyapondokela Yeova umu milandile yao nu mu vicitwa vyao;
Yamupondokela ala akulola nako.
9 Milolekele yao iya pa manso ikalangilila vino yakacita,
Nupya yakalanda apa membu zyao apaswe wa yantu ya mu Sodoma;
Yasizifisa.
Kalanda kuli aliyo, pano yakuiletela intazi!
10 Nenini alungami muti vintu vilayazipila;
Yalalambulwa pali vino yakacita.
11 Kalanda uku mwipe!
Intazi ziliza pali aliwe,
Pano vino akacitila yauze avino nawe kwene yalamucitila!
12 Lelo antu yane aakayangalila yakayacuzya,
Nupya anaci aakayatungulula.
Mwe yantu aakamutungulula yakulenga ukuti mwalulumba,
Nupya yakalenga ukuti mutamanya ningo inzila zino mufwile ukupitamo.
13 Yeova wataipekanya ukupeela antu mulandu;
Watakatuka kuti ayapingule.
14 Yeova alapingula akalamba ya yantu na ya cilolo.
Alayanena ati: “Moca ivyalo vya myangazi,
Nupya vino mwiila apiina vili umu mang’anda inu.”
15 Yeova Umwene wa Papelapela nupya Leza wa Maumba walanda nu kuti:
“U mulandu ci uno mukucuzizya sana antu yane nu kuliila apiina masuku pa mutwe?”
16 Yeova walanda wati: “Pa mulandu wakuti anaci ya mu Zioni yaya ni cilumba,
Yakapita ala iyakatusya imitwe,
Ala yakulolekesya uzelele uzelele nu kumeka pa kupita,
Nupya yakapita ala yakulizya insaawa zino yakazwala uku makulu,
17 Yeova nawe alalenga yakwate iviseseya umu mitwe,
Nupya Yeova alaleka yakwate mapala.
18 Mu wanda uuwa Yeova alapoka iviyembelo vyao, kuli kuti ivibango,
Vidana ni viyembelo vyuze ivikaloleka wa mwezi,
19 Maelena, ukasi, ni vitambala,
20 Ivyakuzwala uku mitwe, tumaceni twa ku makulu, ni misipi ya pa maele,
Umwa kusungila mafuta anunkile alino ni mpinga,*
21 Mbalaminwe na maelena ya pa mpuno,
22 Ivyakuzwala pa kuzevya, vyakuzwala vya kunzi, vyakuzwala ivicindame nu tuvyola,
23 Ya mila ya kulema uku minwe, vyakuzwala vya nsalu isuma,
Ivya kuivimba uku mutwe ni vitambala.
24 Apafwile ukuya mafuta yakwe basamu, palaya icinunu ca vintu iviole;
Apafwile ukuya umusipi palaya umwando,
Apafwile ukuya inyele izisuma palaya ipala;
Apafwile ukuya icakuzwala ca mutengo palaya icakuzwala ca masaaka;
Apafwile ukuya apayembe palaya icikwangule.
25 Antu yako yalakomwa uku lupanga,
Nupya aonsi yako aamaka yalakomwa umu ulwi.
26 Apa kwingilila umu musumba palaya wa mwanaci aakuloosya nupya aali nu ulanda,
Nupya umusumba ulikala pansi ala iukungumala.”