Ezaya
15 Vii ivilacitikila Moabu:
Ali uwa ku Moabu alacimviwa,
Pa mulandu wakuti alononwa umu usiku sile onga.
Kili uwa ku Moabu alacimviwa,
Pa mulandu wakuti alononwa mu usiku sile onga.
2 Alaya uku ng’anda* nu ku Diboni
Ku ncende zya kupepelapo zino antu yakalola ukuti izya muzilo umu kuloosya.
Moabu alaloosya pa mulandu na Nebo na Medeba.
Antu yonsi yalapela malukuzu ni vilezu.
3 Yalapita umu miseo ala iyazwala ivyakuzwala vya kulangilamo ulanda.
Yonsi kwene yalaloosezya pa mapaala ya ma ng’anda yao nu mu ncende umukazanwa antu aingi;
Yalatentemuka ala yakuloosya.
4 Antu ya ku Hesyiboni na aku Eleale yalaloosya;
Na mazwi yao yaluvwika nu ku Yahazi.
Ali mulandu uno asilika ya ku Moabu yalatwalilila ukupunda.
Yalaya sana ni intete.
5 Ndaloosya pa mulandu na Moabu.
Mbutusi zya mu Moabu zilutukila uku Zoali nu ku Egilati-syelisyiya.
Yalafuma yakuloosya ala yakulemela ukuya uku Luiti;
Yalafuma yakuloosya pa mulandu nu uzanzo uwipisye ala yakuya uku Holonaimu.
6 Pano manzi ya mu Nimulimu yalakama;
Mulemvwe uluuma,
Mutalaya isote nanti umulemvwe uli onsi.
7 Ali mulandu uno yalasendela ivintu ivilasyala pa vintu vyao na pa vyuma vyao;
Yalalamba umukonko umwaya imiti.
8 Pano ukulila kuluvwika umu ncende yonsi iya Moabu.
Kuloosya kuluvwika uku Egilamu;
Nu ku Beele-elimu.
9 Pano manzi ya mu Dimoni yalazuulamo uwazi,
Nupya vyuze ivilacitikila Dimoni aevi:
Leza alatuma cisama uku yantu ya mu Moabu aalutuka
Nu ku yantu aalasyala umu mpanga.