Ezaya
17 Vii ivilacitikila Damasika:
“Musumba wa Damasika utalatwalilila ukuya vino waya,
Ulononwa.
2 Misumba ya Aloeli ilasyala umwaula antu;
Ilaya incende muno iviteekwa vilalaala
Ukwaula uwa kuvitiinya.
3 Misumba ya malinga iya mu ncende yakwe Efulemu ilalowa,
Kumwi nu wene uwa mu Damasika;
Ululumbi lwa yantu aalasyala umu Silya
Lulasila wakwe vino caya uku lulumbi lwa Ina Izlaeli,” vikwene avino Yeova wa maumba walanda.
4 “Mu wanda uuwa ululumbi lwakwe Yakobo lulacepa,
Nupya alonda.
5 Uwanda uuwa cilaya wa nsita ino kazombola akukolonganika ingaano umu calo
Nupya wakwe lino akusinza imitwe ya ngaano,
Wa muntu aakutolelezya ingaano mu Mukonko wa Ina Lefa.
6 Kulasyala sile utwa kutolelezya,
Wakwe vino cikaya ndi cakuti yakunta umuolivi,
Kuli kuti uku musambo wa papela kulasyala sile ivizao viili nanti vitatu ivice,
Nupya uku musambo uukaseeka ivizao kulasyala sile ivili 4 nanti 5,” vikwene avino Yeova Leza wa Ina Izlaeli walanda.
7 Uwanda uuwa umuntu alalenga uwazwilizyo kuli Kaumba wakwe, nupya alapaalila umu wa Muzilo wakwe Izlaeli. 8 Yatalapaalila umu maulambo yao yano yapanga sile nu kupaalila umu vintu vino yapanga; nanti sile umu ncesi zya kupepa* nanti umu vya kocelapo ivinunkile.
9 Mu wanda uuwa imisumba icingililwe ilasyala wa ncende ino antu yutukamo,
Nupya wa musambo uno yasiile pa mulandu na Ina Izlaeli;
Ilaya iya sile sile.
10 Wafilwa ukwiusya iciliwe cako;
Kacingilila wako.
Aali mulandu uno walemiile ivilimwa ivisuma
Nu kulemamo ivilimwa vya ku mpanga yuze.
11 Kasanya ukapindilila ningo ivilimwa vyako,
Katondo nako ukaleka imbezu zyako izimela,
Lelo utalazombola lino ulalwala sana nu kuvwa uyi.
12 Kuli icongo ca yantu aingi,
Atiyasoka wakwe ya yemba!
Kuli icongo ca yantu ya mu nko,
Icikuvwika wa congo ca manzi aingi!
13 Inko zilapanga icongo wa congo ca manzi aingi.
Leza alazikalipila nazyo zilutukila ukutali,
Yalutuka wakwe vino umuza ukaulusya ivipumbu vya mu myamba,
Nupya yalutuka wakwe vino ivikoona vikasendwa ni cimuza.
14 Manguzi kuli intete.
Lino kutatala kwaca alwani yonsi iyafwa.
Vikwene i vilacitikila antu
Aakatupokolola ivintu.