Ezaya
23 Vii i vilacitikila Tuli:
Loosyini mwe yonsi aali umu mawato ya ku Tasyisyi!
Pa mulandu wakuti apakaimilila mawato ipononeka; kusi aangayapo.
Pano icimanyikwa nu ku yantu aakaika uku Kitimu.
2 Mwe yantu aakaikala umu mbali yakwe yemba, ikalini mya.
Pano aculuzi ya ku Sidoni aakalaamba yemba iyalenga muye sana ni vyuma.
3 Yalamvizye ingaano zya ku Syiholi,
Na vino yazombwile uku luzi Lwa Naelo pa manzi aingi iyavitwala uku Tuli,
Nu kutwala ivyuma uku nko.
4 Si uvwa insonyi we Sidoni, we musumba uucingililwe uwayela kuli yemba,
Pano yemba watalanda ati:
“Ntuvwapo ukuwaika kwa pa kupaapa nupya ntatala napaapapo,
Ntakuzyapo ana aonsi nanti akazyana.”
5 Wakwe vino cali lino antu yuvwile ivyacitikile Ijipti,
Avino antu yaluvwa sana uyi lino yaluvwa ilyasi pali Tuli.
6 Lambini muye uku Tasyisyi!
Loosyini mwe yantu ya mu mbali yakwe yemba!
7 Uzye ukwene ali musumba wako umwali sana insansa kufuma uku cisila?
Antu aakaikalamo yayanga umu kwikala uku ncende zya kutali.
8 A weni uwatapingula vii kuli Tuli,
Uwasonsile ya mwene,
Wino aculuzi yakwe yaali aa cilolo
Nupya wino aculuzi yakwe yaacindikwe umu nsi yonsi?
9 Yeova wa maumba uwatapingula,
Pakuti amale icilumba cino Tuli wakwata pa mulandu nu kuyemba kwakwe,
Na pakuti azewanye yonsi aacindikwa umu nsi yonsi.
10 Salanganilini umu mpanga kwati Uluzi Lwa Naelo mwe yantu ya ku Tasyisyi.
Kusi incende ukwa kupangila nu kulungisizya mawato.
11 Watakonzolola ikasa lyakwe pali yemba;
Nupya watasunkanya mawene.
Yeova watalanda ukuti yalovye yano Aina Fonisya yataila.
12 Watalanda nu kuti: “Mutalaya ni nsansa nupya,
Mwe ya nacisungu ya mu Sidoni mwemuno mukacuziwa.
Katukini mulambe nu kuya uku Kitimu.
Nako kwene mutalaya mukapuuze.”
13 Lolini! Impanga ya Ina Kalideya.
Aina Kalideya aatiyalenga impanga yako iye umwa kwikala ivinyama
Asi antu ya ku Asilya.
Iyakuula ulupungu ulukweti ivyanzo vya kulwilako;
Iyawisya impungu zyako izya kwikalamo,
Nupya iyazyonona iciipisye.
14 Loosyini mwe yonsi aali umu mawato ya ku Tasyisyi,
Pano wino mwataila wataononwa.
15 Mu wanda uuwa musumba wa Tuli yalawilila pa myaka 70, wa myaka ya mwene wenga. Pa mpela ya myaka 70, ivilacitikila Tuli vilaya wakwe vino vyacitikiile cizelele uwaya umu lwimbo ulukati:
16 “Tola izeeze ufume ukuzinguluka umusumba, we cizelele wino yilila.
Ulizye ningo izeeze lyako;
Uwimbe inyimbo izingi,
Pakuti yace yakwiusye.”
17 Pa mpela ya myaka 70, Yeova aliusya Tuli, nupya Tuli alaswilila uku mulimo wakwe uno waombanga nu kucita uzelele na mawene yonsi amu nsi. 18 Lelo malipilo yakwe nu mulimo wakwe vilaya ivya muzilo kuli Yeova. Vitalasungwa pano vilaya ivyakwe yano yakaikala pa nkoleelo yakwe Yeova, pakuti yalya nu kwikuta nu kuzwala ivyakuzwala vya mutengo.