Ezekeli
22 Nupya kwene Yeova wanenyile ati: 2 “Naawe we mwana wa muntu, uzye watuipekanya ukulanda mazwi ya upinguzi pa musumba uukazwisya uwazi nu kusokolola ivintu vyonsi ivya winyi vya mu musumba uwo? 3 Ulande uti, ‘Yeova Umwene wa Papelapela walanda wati: “We musumba wemuno ukazwisya uwazi, wemuno insita yako ikwiza, wemuno ukapanga ivilubi vya winyi* ivyakuti uwaikowezyako, 4 kuzwisya uwazi ikulenga ukuti uye nu mulandu nupya ivilubi vyako ivya winyi ivilenga ukuti uye umukowele. Watulenga manda yako ukusila zuwa, ni mpela ya myaka yako yatiiza. Ali mulandu uno ndalenga ukuti uzewane uku nko nupya ulaasekwa uku mpanga zyonsi. 5 Impanga izyaya umupiipi ni zyaya ukutali naawe zilaakutumfya, wemuno izina lyako lyakowela nupya wemuno waya ni cimvulunganya. 6 Lola! Intunguluzi zyonsi izya mu Izlaeli zikaomvya maka yano zyakwata uku kuzwisya uwazi. 7 Antu aaya muli wewe yasicindika ya isi na ya nyina. Yakacenjezya antu aafuma uku mpanga zyuze, nupya yakacuzya ana ya nsiwa na ya mukamfwilwa.”’”
8 “‘Wasuula incende zyane izya muzilo na masabata yane. 9 Muli wewe mwaya antu ya lwambo aatemwa ukuzwisya uwazi. Muli wewe mwaya antu aakaliila malambo pa myamba nu kucita ivintu vya nsonyi. 10 Muli wewe mwaya antu aakalaala na aci yakwe ya isi, nupya yakalaala na anaci aali uku mwezi. 11 Muli wewe mwaya aonsi aakacita ivya winyi na aci ya inamupalamano, yauze nayo yakakowezya ya nyinavyala ukupitila umu kucita ivya nsonyi, alino yauze nayo yakalaala na ya kaci yao yano yavyalwa nayo. 12 Muli wewe mwaya antu aakapoka mafisakanwa pakuti yazwisye uwazi. Ukakongwesya pakuti upokelepo na vyuze nanti pakuti ukwatilepo umuzano, nupya ukapoka impiya uku maka uku inamupalamano yako. Ee wanjilila,’ avino Yeova Umwene wa Papelapela walanda.
13 “‘Nkauvwa uyi pali vino walonka ivintu mu ucenjezi na pali vino ukazwisya uwazi. 14 Uzye ulatwalilila ukuya umusipe nupya uwa maka umu manda yano ndakupingula? Nene ne Yeova indanda, nupya ndacita vino indanda. 15 Ndakusalanganyizizya umu nko nu mu mpanga zyuze, nupya ndalenga ukuti utatwalilila ukuya umukowele. 16 Ulazewana uku nko, nupya ulamanya ukuti nene Yeova.’”
17 Nupya kwene Yeova wanenyile ati: 18 “We mwana wa muntu, amu ng’anda yakwe Izlaeli iyaya aasile sile kuli nene. Yonsi kwene yali wakwe koopa, icela, nu mutovwe umwi lungu. Yali wa vikwi ivikafuma kuli siuva.
19 “Fwandi Yeova Umwene wa Papelapela walanda wati: ‘Pa mulandu wakuti mwensi imuya wa vikwi, nimamukolonganika umu Yelusalemu. 20 Wakwe vino siuva, koopa, icela, nu mutovwe yakavikolonganika umwi lungu pakuti yavyoce nu kuvisungulula avino nani ndamukolonganika nu kuleta ukali uuli wa moto pali mwemwe nu kumusungulula. 21 Ndamukolonganika nu kuleta ukali uuli wa moto pali mwemwe, nupya mulasunguluka umu Yelusalemu. 22 Wakwe vino siuva akasunguluka umwi lungu, avino namwe mulasunguluka umu Yelusalemu; nupya mulamanya ukuti nene ne Yeova indeta ukali pali mwemwe.’”
23 Nupya kwene Yeova wanenyile ati: 24 “We mwana wa muntu, nena impanga uti, ‘Utalasangululwa, ni mvula italatoonyezya muli wewe pa wanda wa ukali. 25 Ya kasesema aayamo yali ni pange wakwe cisama aakung’anza lino akusandola cino watalema. Yakukoma antu. Yakupoka ivyuma ni vintu vya mutengo. Iyalenga antu aingi ukuya ya mukamfwilwa. 26 Ya simapepo aayamo yakatama masunde yane nupya yatwalilila ukusaalula incende zyane izya muzilo. Yasipusanya icintu ca muzilo uku cintu cisi ca muzilo, nupya yasilenga antu ukumanya upusano uwaya pa cintu icisi cisanguluke ni cisanguluke, yasisunga masabata yane, nupya yakansaalula. 27 Ya cilolo yakwe yaaya wa mimbulu iikasandola cino yatilema; yakazwisya uwazi nupya yakakoma antu pakuti yakwate ivintu mu ucenjezi. 28 Lelo ya kasesema yakwe yakafisa iviipe vino yakacita kwati avino yakapenta iciumba ukuomvya penti umutiswe. Yakalola ivilolwa ivya ufi nu kusapoola ivya ufi, nupya yakalanda iyati: “Yeova Umwene wa Papelapela walanda wati,” lino Yeova atalanzile icili consi. 29 Antu ya mu mpanga yaaya nu ucenjezi nupya yakapokolola ivintu uku maka, yakacuzya alanda na apiina, nupya yakacenjezya antu aafuma uku mpanga zyuze nu kuyafyenga.’
30 “‘Nalondanga umuntu muli aliyo aangazifya ilinga ilyakuulilwa na mawe nanti aangimilila pa nkoleelo yane pa cipongo ci linga lya musumba pakuti aucingilile nu kuleka ukuti impanga itononwa, lelo ntaazanyile ali wensi. 31 Fwandi ndaleta ukali wane pali aliyo nupya ndayonona ukuomvya ukali wane uwaya wa moto. Ndayafulula ukulingana na vino yakacita,’ avino Yeova Umwene wa Papelapela walanda.”